இது தொற்று பரவிய நாட்டில் இருந்து பயணத்தால் அமெரிக்காவுக்கு பரவிய என் டபிள்யு எஸ் மையாசிஸ் முதல் மனித பாதிப்பு என்று சுகாதார மற்றும் மனித சேவைகள் துறையின் செய்தித் தொடர்பாளர் ஆண்ட்ரூ நிக்சன் தெரிவித்தார்.

இந்த அழிவுகரமான ஒட்டுண்ணி பொதுவாக தென் அமெரிக்காவிலும் கரீபியன் பகுதிகளிலும் காணப்படுகிறது.

வடக்கு நோக்கி பரவாமல் இதைத் தடுக்க முயற்சிகள் மேற்கொள்ளப்பட்ட போதிலும், மெக்ஸிகோ உட்பட மத்திய அமெரிக்காவின் அனைத்து நாடுகளிலும் தொற்று உறுதி செய்யப்பட்டுள்ளது.

மனிதர்கள், அதிலும் குறிப்பாக திறந்த காயங்கள் உள்ளவர்கள் இந்த தொற்றுக்கு எளிதில் ஆளாகலாம். இந்த ஈக்கள் உள்ள பகுதிகளுக்கு பயணம் செய்பவர்கள் அல்லது கிராமப்புறங்களில் கால்நடைகளுடன் இருப்பவர்கள் அதிக ஆபத்தில் உள்ளனர் என்று சிடிசி எச்சரிக்கிறது.

இந்த தொற்றை எதிர்கொள்ள மற்ற வேளாண் அமைப்புகள், மாநிலத் துறை மற்றும் ஐக்கிய நாடுகளின் உணவு மற்றும் வேளாண் அமைப்புடன் (Food and Agriculture Organization) இணைந்து செயல்படுவதாக யு.எஸ்.டி.ஏ-வின் விலங்கு மற்றும் தாவர சுகாதார ஆய்வு சேவை (USDA’s Animal and Plant Health Inspection Service),தெரிவித்துள்ளது.

“நியூ வேர்ல்ட் ஸ்க்ரூவர்ம் ஈயின் லார்வாக்கள் (புழுக்கள்) உயிருள்ள விலங்கின் தசையில் புதைந்து, அந்த விலங்குக்குக் கடுமையான, பெரும்பாலும் மரணத்துக்கு வழிவகுக்கும் சேதத்தை ஏற்படுத்துகின்றன,” என்று யு.எஸ்.டி.ஏ தெரிவிக்கிறது. “என் டபிள்யுஎஸ் கால்நடைகள், செல்லப்பிராணிகள், வனவிலங்குகள், அரிதாக பறவைகள், மற்றும் அரிய சந்தர்ப்பங்களில் மனிதர்களையும் தொற்றலாம்.”

கால்நடைகளில் ஸ்க்ரூவர்ம் தொற்று பரவினால், கால்நடை மற்றும் மாட்டுத் தொழிலுடன் தொடர்புடைய 100 பில்லியன் டாலருக்கு ($73.9 பில்லியன் பவுண்டுகள்) மேற்பட்ட பொருளாதார செயல்பாடுகளை அச்சுறுத்தும் கடுமையான பொருளாதார தாக்கங்களை ஏற்படுத்தலாம் என்று யு.எஸ்.டி.ஏ இந்த மாத தொடக்கத்தில் தெரிவித்தது.

– இது, பிபிசிக்காக கலெக்டிவ் நியூஸ்ரூம் வெளியீடு