பொள்ளாச்சி விவகாரம் தொடர்பாக புகார் அளித்த பெண்ணின் சகோதரரை மிரட்டியதாக குற்றச்சாட்டு எழுந்ததைத் தொடர்ந்து, தி.மு.க. உள்ளிட்ட எதிர்க்கட்சிகள் இது தொடர்பாக கடுமையாக அ.தி.மு.கவை விமர்சிக்க ஆரம்பித்தன. நாடாளுமன்றத் தேர்தல் வேறு நெருங்கிவந்த நிலையில், இந்த விவகாரம் மேற்கு மாவட்டங்களில் மிகச் சிக்கலான விவகாரமாக உருவெடுத்தது.

அப்போது பிரதான எதிர்க்கட்சியாக இருந்த தி.மு.க. மட்டுமல்லாமல் காங்கிரஸ் கட்சியின் மூத்த தலைவர் ராகுல் காந்தி, மக்கள் நீதி மய்யம் கட்சியின் தலைவர் கமல்ஹாசன் வரை இந்த விவகாரத்துக்காகக் குரல் கொடுத்தனர். திமுக எம்.பி. கனிமொழி பொள்ளாச்சிக்கே சென்று போராட்டம் நடத்தினார்.

கல்லூரி மாணவர்களும் போராட்டங்களில் இறங்கினர். இந்த விவகாரம் குறித்துப் பதிலளிக்கும்படி தேசிய மனித உரிமை ஆணையம் தமிழக அரசுக்கு நோட்டீஸ் அனுப்பியது. இந்த வழக்கில் தொடர்புடைய அ.தி.மு.கவினர் கட்சியிலிருந்து நீக்கப்பட்டனர்.

வழக்கு உள்ளூர் காவல் துறையினரிடமிருந்து மார்ச் 12ஆம் தேதி மத்திய குற்றப் பிரிவு குற்றப் புலனாய்வுத் துறைக்கு மாற்றபட்டபோதிலும் போராட்டங்கள் ஓயாத நிலையில், ஏப்ரல் 25ஆம் தேதி வழக்கை மத்தியப் புலனாய்வுத் துறைக்கு (சிபிஐ) மாற்றியது அப்போதைய அ.தி.மு.க. அரசு.

இந்த வழக்கைப் பொறுத்தவரை காவல்துறையின் செயல்பாடு குறித்து கடுமையான விமர்சனங்கள் முன்வைக்கப்பட்டன. இவ்வளவு பெரிய விவகாரம் வெடித்து ஒரு வாரம் ஆன நிலையிலும் மாவட்ட காவல்துறை கண்காணிப்பாளர் நேரில் சென்று விசாரணை நடத்தாதது, காவல்துறை வெளியிட்ட செய்திக் குறிப்பில் பாதிக்கப்பட்ட பெண்ணின் பெயர் இடம்பெற்றது, கைது செய்யப்பட்டவர்களை உடனடியாக காவல்துறை தனது காவலில் எடுத்து விசாரிக்காதது என கடுமையான குற்றச்சாட்டுகளை முன்வைத்தன எதிர்க்கட்சிகள்.

குறிப்பாக, அப்போதைய கோயம்புத்தூர் மாவட்ட காவல்துறை கண்காணிப்பாளர் ஆர்.பாண்டியராஜன், காவல்துறை துணை கண்காணிப்பாளர் ஜெயராம் ஆகியோர் மீது வழக்கை நீர்த்துப்போகச் செய்வதாக குற்றம்சாட்டப்பட்டது.

மேலும், இந்த வழக்குகளில் ஆளும் அ.தி.மு.க. தொடர்பானவர்களும் சம்பந்தப்பட்டிருந்தது எதிர்க்கட்சிகள் இந்த விவகாரத்தைக் கையில் எடுத்துப் போராட ஏதுவாக அமைந்தது.

வழக்கில் கைதான ஹேரோனிமோஸ் பால் என்கிற ஹேரோன், அதிமுக சிறுபான்மையினர் அணியில் நிர்வாகியாக இருந்தார். அருள் ஆனந்தம் என்கிற அருள், அதிமுக மாவட்ட மாணவரணி நிர்வாகியாக இருந்து வந்தார்.

தி.மு.கவின் மக்களவை உறுப்பினர் கனிமொழி போராட்டம் நடத்தச் சென்றபோது அவருக்கு அனுமதி மறுக்கப்பட்டது.

இந்த விவகாரம் மாநிலம் முழுவதும் கொந்தளிப்பை ஏற்படுத்தியிருந்தது. பாதிக்கப்பட்ட பெண்ணின் சகோதரரை மிரட்டியதாகக் குற்றம்சாட்டப்பட்ட நாகராஜின் பார் அடித்து நொறுக்கப்படும் அளவுக்கு, அந்தப் பகுதி மக்கள் ஆத்திரம் அடைந்திருந்தனர்.

அ.தி.மு.க. வலுவாக உள்ள மேற்கு மாவட்டம் ஒன்றில் வெடித்த இந்த விவகாரம், பொதுமக்களின் கோபம் எதிர்காலத் தேர்தல்களில் எதிரொலிக்குமோ என்ற அச்சம் அ.தி.மு.கவுக்கு ஏற்படும் அளவுக்கு இந்த விவகாரம் உருவெடுத்தது.