பசு, காளை, ஆடு, ஆட்டுக்குட்டி, செம்மறி ஆடு, மான், கோழி, வான்கோழி, காடை, வாத்து போன்ற விலங்குகள் இஸ்லாத்தின் ‘ஹலால்’ என்ற பிரிவில் வரும். ஆனால், அந்த விலங்கை கொல்வதற்கு/வெட்டுவதற்கு என சில விதிமுறைகள் உள்ளன.

1) கொல்லப்படும் விலங்கு/பறவை ஹலால் (சட்டப்பூர்வமான) இனத்தைச் சேர்ந்ததாக இருக்க வேண்டும்.

2) கொல்லப்படும் விலங்கு/பறவை கருணையுடன் கையாளப்பட வேண்டும்.

3) அந்த விலங்கு/பறவை அறுக்கப்படும்போது உயிருடன் இருக்க வேண்டும்.

4) கொல்லப்படும் முன் விலங்கு/பறவையின் உடலின் எந்தப் பகுதியையும் வெட்டக்கூடாது.

5) இதில் ஈடுபடும் நபர் மனரீதியாக நல்ல நிலையில் இருக்க வேண்டும், ஒரு முஸ்லிமாக இருக்க வேண்டும் மற்றும் இஸ்லாமிய நடைமுறைகளை அறிந்தவராக இருக்க வேண்டும்.

6) தஸ்மியா, பிஸ்மில்லாஹ் (அல்லாஹ்வின் பெயரால்), மற்றும் தக்பீர் (அல்லாஹ் மிகப் பெரியவன்) ஆகியவை ஒவ்வொரு விலங்கு/பறவையையும் கொல்வதற்கு முன் மற்றும் கொல்லப்படும்போது, அந்த நபரால் கூறப்பட வேண்டும்.

7) விலங்கின் முதுகுத் தண்டு துண்டிக்கப்படாமல், கழுத்துப் பகுதியில் உள்ள மூச்சுக்குழாய், உணவுக்குழாய் மற்றும் பிரதான கரோடிட் தமனிகள் மற்றும் கழுத்து நரம்புகளைத் துண்டிக்க வேண்டும்.

8) ரத்தம் முழுமையாக வெளியேற அனுமதிக்கப்பட வேண்டும். ரத்தப்போக்கின் விளைவாக விலங்கின் மரணம் நிகழ வேண்டும்.

9) கொல்லப்பட்ட பிறகு, விலங்கு/பறவையை தன்மையாகக் கையாள வேண்டும். கொல்லப்பட்ட விலங்கு/பறவையின் தலை, தோல் மற்றும் பிற பாகங்கள் அவை இறந்த பின்னரே அகற்றப்பட வேண்டும்.

இறைச்சிக்காக விலங்குகளைக் கொல்வதற்கு முன் அவற்றை மயக்கமடையச் செய்து கொல்வது (Stunning– ஸ்டன்னிங்) உலகின் பல இடங்களில் பின்பற்றப்படுகிறது. அதாவது, கொல்லப்படும்போது அந்த விலங்குக்கு எந்த வலியும் பயமும் இருக்கக்கூடாது என்பதற்காக அதை மயக்கமடையச் செய்வது.

அமெரிக்க ஹலால் அறக்கட்டளையின் படி, மயக்கமடையச் செய்வதால் அந்த விலங்குக்கு காயம் ஏதும் ஏற்படக்கூடாது மற்றும் உயிர் பிரியாமல் இருக்க வேண்டும். அதாவது, இஸ்லாமிய முறைப்படி மட்டுமே அந்த விலங்கின் உயிர் பிரிய வேண்டும். ஸ்டன்னிங் காரணமாக அந்த விலங்கு இறந்துவிட்டால், அது நிச்சயம் ‘ஹராம்’ இறைச்சி தான்.