“நீங்கள் உண்மையிலேயே இதைச் செய்யப் போகிறீர்களா?” என்று பலர் தன்னிடம் கேட்டதாக அவர் கூறினார். ஆனால், இதில் பங்கேற்பதன் மூலம் தான் உதவுவதாக அவர் உணர்ந்தார்.

போக்குவரத்து நிறுவனத்தை நடத்தி வரும் பக்ஸ்டன், ஜிப்ரால்டரில் தொலைதூர அறுவை சிகிச்சையைத் தேர்வு செய்யாவிட்டால், லண்டனுக்கு விமானத்தில் செல்ல வேண்டியிருக்கும் என்று விளக்கினார். அங்கு, பொது சுகாதார அமைப்பின் மூலம் சிகிச்சைக்காகக் காத்திருக்க வேண்டியிருக்கும். சுமார் மூன்று வாரங்கள் லண்டனில் தங்கியிருக்க நேரலாம்.

எனவே, இதை ஒரு எளிதான மற்றும் விவேகமான முடிவாக அவர் கருதினார். ஜிப்ரால்டருக்கு அறுவை சிகிச்சை முக்கியமானது என்றும் அவர் குறிப்பிட்டார். ஏனெனில், அங்குள்ள மக்கள் இப்போது தங்கள் பகுதியை விட்டு வெளியேறாமலே இந்த சிகிச்சையைப் பெறலாம்.

மருத்துவக் குழு தன்னை மிகவும் நன்றாக கவனித்துக் கொண்டதாகவும், பிப்ரவரி 11 அன்று நடந்த அறுவை சிகிச்சைக்குப் பிறகு தான் மிகவும் மகிழ்ச்சியாக உணர்ந்ததாகவும் பக்ஸ்டன் கூறினார்.

3டி ஹெச்.டி கேமரா மற்றும் நான்கு கைகள் பொருத்தப்பட்ட ஒரு ரோபோவை பயன்படுத்தி லண்டன் கிளினிக்கில் இருந்து அறுவை சிகிச்சை செய்யப்பட்டது. அனைத்தும் 0.06 விநாடிகள் தாமதத்துடன் ஒரு கன்சோல் மூலம் கட்டுப்படுத்தப்பட்டன.

பிரிட்டனில் உள்ள கன்சோல் ஃபைபர்-ஆப்டிக் கேபிள்கள் வழியாக, 5ஜி இணைப்புடன், ஜிப்ரால்டரில் உள்ள ரோபோவுடன் இணைக்கப்பட்டது.

இணைய இணைப்பு செயலிழந்தால் அறுவை சிகிச்சையில் உதவ ஜிப்ரால்டரில் ஒரு மருத்துவக் குழு தயாராக இருந்தது. ஆனால், முழு அறுவை சிகிச்சையும் நடக்கும் போது இணைப்பு நிலையாகவே இருந்தது.

இந்த அறுவை சிகிச்சை டூமாய் ரோபோடிக் சிஸ்டத்தை பயன்படுத்தியது. அதோடு, லண்டன் கிளினிக் மற்றும் ஜிப்ரால்டர் சுகாதார ஆணையத்தின் கூட்டு முயற்சியின் மூலம் இது மேற்கொள்ளப்பட்டது.

சிறந்த அறுவை சிகிச்சை நிபுணர்கள் எங்கிருந்து வேண்டுமானாலும் செயல்படலாம் என்பதால் தொலைதூர இடங்களிலும் உள்ள நோயாளிகளுக்கு சிகிச்சையளிக்க இந்தத் தொழில்நுட்பம் உதவும் என்று அறுவை சிகிச்சை நிபுணர் ப்ரோகர் தாஸ்குப்தா கூறினார்.

இந்த அறுவை சிகிச்சை இரண்டு சோதனை நிகழ்வுகளில் முதலாவதாகும். இரண்டாவது அறுவை சிகிச்சை மார்ச் 4ஆம் தேதி ஜிப்ரால்டரில் உள்ள 52 வயதான மற்றொரு நோயாளிக்கு செய்யப்பட்டது.

மார்ச் 14ஆம் தேதி தாஸ்குப்தா மீண்டும் இந்த அறுவை சிகிச்சையைச் செய்வார். இது ஐரோப்பிய சிறுநீரக சங்க மாநாட்டில் உலகின் முன்னணி சிறுநீரக அறுவை சிகிச்சை நிபுணர்கள் 20,000 பேருக்கு நேரடியாக ஒளிபரப்பப்படும்.

“இது மிகவும் உற்சாகமானது. மனிதாபிமான நன்மை இதில் குறிப்பிடத்தக்கதாக இருக்கும்,” என்று அவர் மேலும் கூறினார்.

2035ஆம் ஆண்டுக்குள், ஆண்டுதோறும் 500,000 ரோபோ உதவியுடன் அறுவை சிகிச்சைகளைச் செய்வதை இலக்காகக் கொண்டு, பிரிட்டனின் தேசிய சுகாதார சேவை உள்ளூர் ரோபோ உதவி அறுவை சிகிச்சைகளுக்கு முன்னுரிமை அளிக்கிறது.

– இது, பிபிசிக்காக கலெக்டிவ் நியூஸ்ரூம் வெளியீடு