இது இந்தியாவிற்கும் பாகிஸ்தானுக்கும் இடையிலான மோதல் மட்டுமல்ல. கூர்ந்து கவனித்தால், இந்த மோதல் மேற்கத்திய நாடுகளின் தொழில்நுட்பத்திற்கும், சீனாவிற்கும் இடையிலான மோதலாகவும் தென்பட்டது.

“இந்தியா-பாகிஸ்தான் மோதலுடன், உலக நாடுகள் ஏற்கனவே இந்தப் பிரச்னையைப் பற்றி விவாதிக்கத் தொடங்கிவிட்டது. இது சீன மற்றும் மேற்கத்திய தொழில்நுட்பத்திற்கு இடையிலான மோதல் என்று அனைவரும் கூறுகிறார்கள்” என்கிறார் பேராசிரியர் முக்ததர் கான்.

யாருடைய தொழில்நுட்பம் யாரை விட, எந்த அளவிற்கு உயர்ந்தது என்பது பகுப்பாய்வுக்குப் பிறகு தெரியவரும்.

ஆனால், இந்தியாவுக்கும் பாகிஸ்தானுக்கும் இடையிலான உறவுகள் எந்த திசையை நோக்கிச் செல்லும் என்பது தான் இப்போது எழும் முக்கியக் கேள்வி.

“இந்தியா-பாகிஸ்தான் மோதலுக்குப் பிறகு, சீனா எந்த வகையில் செயல்பட்டாலும், அதற்கு இந்தியா எந்தளவுக்கு தயாராக உள்ளது என்பது விவாதிக்கப்பட வேண்டும்.

இந்தியா சீனாவை எவ்வாறு கையாளப்போகிறது என்பதும் ஒரு முக்கிய கேள்வியாக உள்ளது.

இந்தியாவுக்கு சீனாவுடன் வர்த்தக உறவுகள் உள்ளன. சீனா ஒரு அண்டை நாடாகவும் உள்ளது” என்று பேராசிரியர் முக்ததர் கான் கூறுகிறார்.

இந்தியாவிற்கும் பாகிஸ்தானுக்கும் இடையிலான பேச்சுவார்த்தையின் முடிவு, பெரும்பாலும் பேச்சுவார்த்தை எங்கு நடைபெறும் என்பதைப் பொறுத்தது என்று பேராசிரியர் முக்ததர் கான் நம்புகிறார்.

ஆனால், “மே 12 அன்று இந்தியா மற்றும் பாகிஸ்தான் டிஜிஎம்ஓக்கள் பேச்சுவார்த்தை நடத்துவார்கள்” என்று மட்டுமே இந்திய வெளியுறவு அமைச்சகம் கூறியுள்ளது.

இந்த சந்திப்பு நிச்சயமாக நடக்குமா என்பது குறித்து இந்திய வெளியுறவு அமைச்சகம் எதுவும் கூறவில்லை .

“வேறு எந்த பிரச்னை தொடர்பாகவும் வேறு எந்த இடத்திலும் பேச்சுவார்த்தை நடத்துவது குறித்து எந்த முடிவும் எடுக்கப்படவில்லை” என்று தகவல் மற்றும் ஒளிபரப்பு அமைச்சகம் சனிக்கிழமை மாலை சமூக ஊடக தளமான ‘எக்ஸ்’ இல் தெரிவித்தது.

“சிம்லா ஒப்பந்தத்தை பாகிஸ்தான் நிறுத்தி வைத்துள்ளது.

இத்தகைய சூழ்நிலையில், அமெரிக்க வெளியுறவுத்துறையின் குறிப்பின்படி, நிலுவையில் உள்ள பிரச்னைகளில் காஷ்மீரையும் சேர்க்கலாம்.

இது இந்தியாவின் நலனுக்காக இருக்காது. இது காஷ்மீரின் பிரச்னை அல்ல, எல்லை தாண்டிய பயங்கரவாதம் என்று இந்தியா கூற வேண்டும்,” என்று பேராசிரியர் முக்ததர் கான் கருதுகிறார்.

பேராசிரியர் கான் தொடர்ந்து பேசுகையில், “இரு நாடுகளுக்கும் இடையே சிந்து நதி நீர் ஒப்பந்தம் மற்றும் வர்த்தகம் போன்ற பல பிரச்னைகள் விவாதிக்கப்படலாம்.

கடந்த ஆண்டு, இரு நாடுகளுக்கும் இடையே 1.3 பில்லியன் டாலர் வர்த்தகம் நடந்தது. பாகிஸ்தானுக்கு இந்தியாவிலிருந்து விலை குறைவான மருந்துகள் மிகவும் தேவைப்படுகின்றன”என்றார்.

அமெரிக்காவின் தெற்காசியக் கொள்கையை உத்தி சார்ந்த ஆய்வாளர் பர்மா சின்ஹா ​​பாலிட் கேம்பிரிட்ஜ் இதழில் ஆய்வு செய்துள்ளார்.

அதில், இரண்டாம் உலகப் போருக்குப் பிறகு, தெற்காசியாவின் அதிகார சமநிலையில் காஷ்மீர் பிரச்சினை ஒரு முக்கியக் காரணியாக இருந்து வருகிறது என்று அவர் குறிப்பிட்டுள்ளார்.

இதுபோன்ற சூழ்நிலையில், இந்தியாவிற்கும் பாகிஸ்தானுக்கும் இடையிலான உறவை மேம்படுத்துவதில் அமெரிக்கா எந்த வகையிலாவது வெற்றி பெற்றால், அது அமெரிக்காவிற்கு ஒரு பெரிய வெற்றியாக இருக்கும் என்று ஆய்வாளர்கள் நம்புகின்றனர்.

– இது பிபிசிக்காக கலெக்டிவ் நியூஸ்ரூம் வெளியீடு