“முதல் பந்தில் இருந்தே, பந்தை பேட்டின் நடுவில் வாங்கி சரியான ஷாட்டுகளை அவர் ஆடினார். வழக்கமாக பவுண்டரி எல்லையைத் தாண்டி விழும் சிக்சர்கள் அல்ல அவை. ரசிகர்கள் இருக்கும் ஸ்டாண்டுகளில் மீண்டும், மீண்டும் பந்துகள் விழுந்தன” எனத் தனது வியப்பை வெளிப்படுத்துகிறார் கவாஸ்கர்.

டெல்லி கேப்பிட்டல்ஸ் மற்றும் லக்னௌ சூப்பர் ஜெயண்ட்ஸ் அணிகளுக்கு இடையே நேற்று நடந்த போட்டியில் 210 ரன்கள் இலக்கை துரத்திக் கொண்டிருந்தது டெல்லி அணி. 6.4 ஓவர்களில் வெறும் 65 ரன்களுக்கு 5 விக்கெட்டுகளை இழந்து தவித்துக் கொண்டிருந்தது.

கணினி கணிப்புகளின்படி டெல்லி அணி வெல்வதற்கு சுமார் 1 சதவீதம் மட்டுமே வாய்ப்பு இருப்பதாகக் கூறப்பட்டது. அப்போது களத்தில் நின்ற விப்ராஜ் நிகம் மற்றும் அசுதோஷ் ஷர்மா அதிரடி ஆட்டமென்றால் என்னவென்று காட்டினர்.

வெறும் 15 பந்துகளில் 39 ரன்களை எடுத்தார் அறிமுக வீரர் நிகம். மறுபுறம் தான் சந்தித்த பந்துகளையெல்லாம் பவுண்டரியை நோக்கி விரட்டத் தொடங்கினார் அசுதோஷ், அதுவும் பவுண்டரி எல்லை பார்வையாளர் மாடங்களில் இருப்பதாக எண்ணிக்கொண்டு அனைத்துப் பந்துகளையும் அங்கேயே விரட்டினார்.

இருவரும், 13 முதல் 16வது ஓவர் வரை, 15 ரன்களுக்கு குறையாமல் அடித்தனர். பிரின்ஸ் யாதவ் வீசிய 16வது ஓவரில் 20 ரன்களை குவித்தனர். 17வது ஓவரின் முதல் பந்தில் விப்ராஜ் ஆட்டமிழந்தாலும் ஆட்டத்தின் இறுதி வரை களத்தில் இருந்த அசுதோஷ் வெற்றி இலக்கை சிக்சர் அடித்து நிறைவு செய்தார்.

விப்ராஜ் ஆட்டமிழந்த பின்னர் எதிர்முனையில் பவுலர்கள் இருந்த போதிலும் அசராமல் ஸ்டிரைக்கர் எண்டை கைப்பற்றுவதிலேயே அசுதோஷ் குறியாக இருந்தார்.

இது பற்றிப் பேசிய அசுதோஷ், “கடைசி பந்து வரை நான் ஆடினால் எது வேண்டுமானாலும் நடக்கும் என்று எனக்கு நம்பிக்கை இருந்தது. என்ன விதமான ஷாட்களை விளையாட வேண்டும் என்பதில் தெளிவாக இருந்தேன், வலையில் பயிற்சி எடுத்த அதே ஷாட்களை ஆடினேன்,” என்றார்.