அதேவேளையில், ஸ்பெயின் அணி இப்போது நியூ ஜெர்சிக்குச் செல்லும். அங்கு அது புதன்கிழமை இங்கிலாந்து மற்றும் அர்ஜென்டினா அணிகளுக்கு இடையே நடக்கவுள்ள இரண்டாவது அரையிறுதிப் போட்டியில் வெற்றிபெறும் அணிக்காகக் காத்திருக்கும்.

ஸ்பெயின் அணியின் பார்வை இப்போது இரண்டாவது முறையாக உலகக் கோப்பை பட்டத்தைக் வெல்வதன் மீது இருக்கும்.

இந்த உலகக் கோப்பையின் மிக வலுவான தாக்குதல் ஆட்டத்தைக் கொண்ட அணிக்கும், இந்தத் தொடரின் மிகச் சிறந்த தடுப்பாட்டத்தைக் கொண்ட அணிக்கும் இடையிலான மோதலாக இப்போட்டி வர்ணிக்கப்பட்டது.

ஆனால் இறுதியில், இப்போட்டி ஒருதலைப்பட்சமான ஒன்றாக மாறியது. ஸ்பெயின் அணியின் தற்காப்பு வீரர்கள் பிரான்ஸ் அணியின் நட்சத்திர வீரரான எம்பாப்பேயைக் கூட தங்கள் கட்டுப்பாட்டுக்குள் வைத்திருந்தனர்; இதனால் அவரால் ஸ்பெயின் அணிக்கு எந்தவொரு அச்சுறுத்தலையும் ஏற்படுத்த முடியாமல் போனது.

இந்தத் தொடர் முழுவதும் தங்களின் ஆக்ரோஷமான தாக்குதல் ஆட்டத்தால் பிரான்ஸ் அணி பலரையும் கவர்ந்தது. அதே நேரத்தில், ஸ்பெயின் அணி எந்தவொரு ஆரவாரமும் இன்றி, மிகுந்த அமைதியுடனும் நிதானத்துடனும் விளையாடியது. அவர்களின் ஆட்டம் பார்ப்பதற்கு அந்தளவுக்கு கவர்ச்சிகரமாக இல்லாமல் இருந்திருக்கலாம்; ஆனால் அவர்களின் திறமை குறித்து இருந்த அனைத்து சந்தேகங்களும் இப்போது முற்றிலும் நீங்கியிருக்கும்.

யூரோ 2024 பட்டத்தை வென்ற ஸ்பெயின் அணியின் மிகப்பெரிய பலமாக இருந்தது, லாமின் யமால் மற்றும் நிக்கோ வில்லியம்ஸ் ஆகியோரின் மிகச்சிறந்த விங் ஆட்டம் ஆகும்.

ஆனால், இந்த சீசனில் ஏற்பட்ட காயங்கள் அவர்களின் தாக்கத்தை முடக்கியுள்ளதால், அவர்கள் இருவரும் இணைந்து இதுவரை ஒரே ஒரு கோல் மட்டுமே அடித்துள்ளனர். இருப்பினும், இந்தத் தொடர் முன்னேறிச் செல்லச் செல்ல லாமின் யமாலின் பங்களிப்பு படிப்படியாக அதிகரித்துள்ளது.

ஸ்பெயின் அணி தனது வரலாற்றில் இரண்டாவது முறையாக மட்டுமே உலகக் கோப்பை இறுதிப் போட்டிக்கு முன்னேறியுள்ளது. தென்னாப்பிரிக்காவில் உலகக் கோப்பையைக் கைப்பற்றிய 2010ஆம் ஆண்டின் அந்தச் சிறந்த அணியின் சாதனையை மீண்டும் நிகழ்த்துவதே இவர்களின் இலக்காக இருக்கும்.

பிரான்ஸ் அணிக்கு எதிரான போட்டியில் ரோட்ரியின் நடுகள ஆட்டம் மிகச்சிறப்பாக இருந்தது. அவர் எதிரணியின் ஆரம்பகட்ட தாக்குதல்கள் பலவற்றை முறியடித்ததுடன், தன் அணியின் தாக்குதல் ஆட்டத்துக்கான அடித்தளத்தையும் அமைத்துக் கொடுத்து, போட்டியின் வேகத்தைக் கட்டுப்படுத்தினார்.

கடுமையான முன்புற சிலுவை தசைநார் காயம் காரணமாக நீண்ட காலம் விளையாடாமல் இருந்த அவர், 2024இல் பாலன் டி ஓர் விருதை வென்ற தனது பழைய ஃபார்முக்குத் தற்போது திரும்பியுள்ளார்.

பார்சிலோனா அணியின் பிளேமேக்கர் பெத்ரிக்கு பதிலாகத் தேர்ந்தெடுக்கப்பட்டதை நியாயப்படுத்தும் வகையில் ஃபேபியன் ரூயிஸும் மிகச்சிறப்பாக விளையாடினார். அத்துடன் ஸ்பெயின் அணியின் தடுப்பாட்டம் தனது பலத்தை மீண்டும் ஒருமுறை நிரூபித்தது.

தடுப்பு வீரர்கள் மற்றும் கோல்கீப்பர் மட்டுமல்லாமல், ஒட்டுமொத்த அணியின் கூட்டு உழைப்பும் மற்றும் பயிற்சியாளர் டி லா ஃபுயெண்டேவின் வியூகமுமே, போட்டியின் 81ஆவது நிமிடம் வரை பிரான்ஸ் அணியை கோல் போஸ்ட்டை நோக்கி ஒரு ஷாட் கூட அடிக்க முடியாமல் தடுத்து நிறுத்தியது.

முக்கியமான தொடர்களில் சரியான நேரத்தில் தங்களின் மிகச்சிறந்த ஆட்டத்தை வெளிப்படுத்தும் அணிகளே கோப்பையை வெல்லும் என்று பொதுவாகக் கூறப்படுவதுண்டு. பிரான்ஸ் போன்ற ஒரு பலமான அணியை ஸ்பெயின் வீழ்த்திய விதம், அவர்கள் சரியான தருணத்தில் தங்களின் உச்சக்கட்ட ஃபார்மை எட்டியுள்ளதை உணர்த்துகிறது.

இந்த உலகக் கோப்பைத் தொடரின் பல தருணங்களில், பிரான்ஸ் அணி கோப்பையைக் கைப்பற்றுவது என்பது வெறும் நேரத்தைப் பொறுத்த விஷயம் மட்டுமே என்று தோன்றும் வகையில் இருந்தது.

எம்பாப்பே தலைமையிலான பிரான்ஸ் அணியின் நட்சத்திரங்கள் நிறைந்த தாக்குதல் இந்தத் தொடர் முழுவதும் மிகச்சிறந்த ஃபார்மில் இருந்ததால் அந்த அணி மிக எளிதாக அரையிறுதிக்கு முன்னேறியது.

நாக்-அவுட் சுற்றில், பிரான்ஸ் அணி ஸ்வீடனை மிக எளிதாக வீழ்த்தியது. பலமான பராகுவே அணிக்கு எதிராக மிகுந்த பொறுமையையும் ஒழுங்கையும் வெளிப்படுத்தியது, பின்னர் மொராக்கோ அணியையும் எளிதில் தோற்கடித்தது.

எம்பாப்பேயுடன் மைக்கேல் ஒலிசே, உஸ்மான் டெம்பேலே மற்றும் இருமுறை சாம்பியன்ஸ் லீக் வென்ற பிராட்லி பார்கோலா மற்றும் டெசிரே துவே போன்ற சிறந்த வீரர்கள் அணியில் இருந்தனர். எனவே, ஏதேனும் ஒரு நாளில் எம்பாப்பேயின் ஆட்டம் எதிர்பார்ப்புக்கு ஏற்ப அமையாவிட்டாலும், ஆட்டத்தின் போக்கை மாற்றக்கூடிய தகுதியான வீரர்கள் அந்த அணியில் இருந்தனர்.

ஆனால், இந்த முறை அப்படி நடக்கவில்லை. ஸ்பெயின் அணி மிகச்சிறப்பாக விளையாடியது, அதே நேரத்தில் பிரான்ஸ் அணியும் இந்த உலகக் கோப்பைத் தொடரில் தங்களின் மிக சுமாரான ஆட்டத்தை வெளிப்படுத்தியது. நீண்ட காலமாக வேகமான மற்றும் ஆக்ரோஷமான கால்பந்து ஆட்டத்துக்குப் பெயர் பெற்ற பிரான்ஸ் அணி, இப்போட்டியில் முற்றிலும் செயலற்றுப் போனது.

லுகாஸ் திக்னே செய்த தவறால், இந்தத் தொடரிலேயே முதன்முறையாக பிரான்ஸ் அணி பின்னடைவைச் சந்தித்தது. அது நடந்த சில நிமிடங்களிலேயே வில்லியம் சலிபாவிற்கு ஏற்பட்ட காயம் அவர்களின் இன்னல்களை மேலும் அதிகரித்தது.

தங்களின் ஆபத்தான தாக்குதல் ஆட்டக்காரர்களை எவ்விதக் கட்டுப்பாடும் இன்றி சுதந்திரமாக விளையாட வைக்க வேண்டும் என்ற நோக்கத்துடன்தான் பிரான்ஸ் களம் இறங்கியது, ஆனால் அது சாத்தியப்படவில்லை. ஸ்பெயின் அணியின் மிகச்சிறந்த வியூகங்கள், குறிப்பாக இரண்டாவது பாதியில், பிரான்ஸின் ஆபத்தான வீரர்களை மிக எளிதாகத் தடுத்து நிறுத்தக்கூடிய பகுதிகளில் மட்டுமே பந்தைப் பெறும்படி செய்தன.

பிரான்ஸ் அணி ஒரு கோல் அடித்தால் இந்த ஆட்டத்தின் போக்கே மாறிவிடும் என்று தோன்றியது. ஆனால், பந்து தங்களின் வசம் இருக்கும்போதும் இல்லாதபோதும் ஸ்பெயின் அணி ஆட்டத்தை முழுமையாகக் கட்டுப்படுத்தியதால், கோல் அடிப்பதற்கான வாய்ப்புகளை உருவாக்குவது பிரான்ஸ் அணிக்கு மிகவும் கடினமாக இருந்தது.

இந்தத் தொடர் முழுவதும் விறுவிறுப்பான ஆட்டத்தை வெளிப்படுத்திய பிரான்ஸ் அணியின் பயணம், இந்த முறை மிகவும் ஏமாற்றமளிக்கும் வகையில் முடிவுக்கு வந்துள்ளது.

பயிற்சியாளர் திதியேர் தெஷாம்ப் தனது பதவிக்காலத்தில் இரண்டாவது உலகக் கோப்பை பட்டத்தை வென்று, ஒரு பிரமாண்டமான விடைபெறலைப் பெறுவார் என்று எதிர்பார்க்கப்பட்டது.

ஆனால், இப்போது அந்த நாட்டின் இறுதிப் போட்டி என்பது மூன்றாவது இடத்துக்கான பிளே-ஆஃப் போட்டியாக மட்டுமே இருக்கும்.

இருப்பினும், இந்த போட்டி தங்கக் காலணி விருதுக்கான தனது வாய்ப்பை மேலும் வலுப்படுத்திக் கொள்ள எம்பாப்பேவுக்கு ஒரு வாய்ப்பை வழங்கும். அவர் உலகக் கோப்பை வரலாற்றிலேயே அதிக கோல் அடித்த வீரராகக் கூட மாறக்கூடும். ஆனால் அவரும் பிரான்ஸ் அணியும் எந்தக் கோப்பைக்காக இங்கு வந்தார்களோ, அதற்கு இன்னும் நான்கு ஆண்டுகள் காத்திருக்க வேண்டும்.

– இது, பிபிசிக்காக கலெக்டிவ் நியூஸ்ரூம் வெளியீடு