குஜராத் அணியில் வாங்கப்பட்ட புதிய வீரர்களான முகமது சிராஜ், காகிசோ ரபாடா, பிரசித் கிருஷ்ணா ஆகியோரின் பந்துவீச்சை நேற்று ஸ்ரேயாஸ், சஷாங் நொறுக்கினர். 3 பேரும் சேர்ந்து 12 ஓவர்கள் வீசி 135 ரன்கள் கொடுத்து ஒரு விக்கெட்டை மட்டுமே சேர்த்து, ஓவருக்கு 13 ரன்கள் வீதம் வாரி வழங்கினர். ஆனால் தமிழக சுழற்பந்துவீச்சாளர் சாய் கிஷோர் 4 ஓவர்கள் வீசி 30 ரன்கள் கொடுத்து முக்கியமான 3 விக்கெட்டுகளை வீழ்த்தினார். அனுபவ வீரர் ரஷித்கான் பந்துவீச்சுகூட ஒரு கட்டத்தில் அடித்து நொறுக்கப்பட்டது. ஆனால், சாய் கிஷோர் ஓவர்களில் 12 டாட் பந்துகளை வீசி 30 ரன்கள் மட்டுமே கொடுத்து ஓவருக்கு 7 ரன்கள் சராசரியே விட்டுக்கொடுத்தார்.

அதேபோல பேட்டிங்கில், தொடக்க வீரராக வந்த தமிழகத்தைச் சேர்ந்த சாய் சுதர்சன் கடந்த 2 சீசன்களிலும் பிரமாதப்படுத்தி வருகிறார். இந்த ஆட்டத்திலும் அவரின் ஆகச்சிறந்த பேட்டிங்கை வெளிப்படுத்தத் தவறவில்லை. சுப்மான் கில் விரைவாக ஆட்டமிழந்தநிலையில் குஜராத் அணிக்கு நம்பிக்கையூட்டி, பட்லருடன் 84 ரன்கள் பார்ட்னர்ஷிப் அமைத்து சாய் சுதர்சன் 41 பந்துகளில் 74 ரன்கள் சேர்த்து ஆட்டமிழந்தார். கேப்டன் கில்லுடன் 45 ரன்கள் பார்ட்னர்ஷிப் என தமிழக வீரர்கள் தங்கள் முத்திரையைப் பதித்தனர். கடைசி நேரத்தில் களமிறக்கிவிடப்பட்ட தமிழக வீரர் ஷாருக்கான் தான்சந்தித்த முதல்பந்திலேயே சிக்ஸர் விளாசி ஆட்டத்தை முடித்தார். ஷாருக்கான் போன்ற பெரிய ஹிட்டர்களை குஜராத் அணி நடுவரிசையில் களமிறக்காமல் பின்வரிசையில் களமிறக்கி திறமையை வீணடிக்கிறது.

ஐபிஎல் ஏலத்தில் பஞ்சாப் அணி வாங்கிய பிரியான்ஷ் ஆர்யா, விஜயகுமார் வைசாக், தக்கவைக்கப்பட்ட சஷாங் சிங் ஆகியோர் வெற்றிக்கு முக்கியக் காரணமாகினர். அறிமுக வீரர் பிரியான்ஷ் ஆர்யா, தொடக்க வீரராகக் களமிறங்கி ரபாடா, சிராஜ் பந்துவீச்சை வெளுத்துக்கட்டினார். 23 பந்துகளில் 47 ரன்கள்(2 சிக்ஸர்கள், 7பவுண்டரிகள்) என பயிற்சியாளர் பாண்டிங் வைத்த நம்பிக்கையை பிரியான்ஷ் ஆர்யா காப்பாற்றியுள்ளார்.

சஷாங் சிங் பஞ்சாப் அணிக்கு கடந்த பல சீசன்களில் அற்புதமான வெற்றிகளைப் பெற்றுக் கொடுத்துள்ளார். இந்த ஆட்டத்திலும் சஷாங் கடைசி நேரத்தில் களமிறங்கி குஜராத் பந்துவீச்சை துவம்சம் செய்தார். சிராஜ் வீசிய கடைசி ஓவரில் 5 பவுண்டரிகளை விளாசினார். ஒட்டுமொத்தத்தில் 16 பந்துகளில் 2 சிக்ஸர்கள், 6 பவுண்டரிகள் உள்பட 44 ரன்களுடன் சஷாங் இறுதிவரை ஆட்டமிழக்காமல் இருந்தார்.

3-வதாக வேகப்பந்துவீச்சாளர் விஜயகுமார் வைசாக்கை ரூ.1.80 கோடிக்கு ஏலத்தில் பஞ்சாப் அணி வாங்கியது. ஆர்சிபி அணியில் இடம் பெற்ற வைசாக்கை அந்த அணி பெரிதாகப் பயன்படுத்தவில்லை. ஆனால், இந்த ஆட்டத்தில் விஜயகுமாரின் பந்துவீச்சுதான் நடுப்பகுதியில் துருப்புச்சீட்டாக இருந்தது. ஒட்டுமொத்தத்தில் குஜராத் அணி தோல்விக்கு பெரும்பங்கு விஜயகுமார்தான் காரணமாக இருந்தார்.

விஜயகுமார் 3 ஓவர்கள் வீசி 28 ரன்கள் கொடுத்தார். இதில் 3 பவுண்டரி, ஒரு சிக்ஸர் மட்டுமே அடங்கும். அதிலும் வைசாக் வீசிய 19-வது ஓவரில் மட்டுமே 18 ரன்கள் அடிக்கப்பட்டது. அதற்கு முன் வீசிய 2 ஓவர்களிலும் ஒரு பவுண்டரி கூட அடிக்கவிடாமல் 10 ரன்கள் மட்டுமே கொடுத்ததுதான் ஆட்டத்தின் திருப்புமுனையாக மாறியது. வைசாக்குடன் சேர்ந்து யான்சென் பந்துவீச்சும் நெருக்கடி கொடுத்தது.

15 முதல் 17 வரையிலான 3 ஓவர்களில் குஜராத் அணி 18 ரன்கள் மட்டுமே சேர்த்து ஒரு பவண்டரிகூட அடிக்காமல் இருந்ததுதான் தோல்விக்கான காரணமாக இருந்தது. இந்த 3 ஓவர்களில் குஜராத் அணி வழக்கமான அதிரடி ஆட்டத்தை ஆடி ஸ்கோர் செய்திருந்தால் நிச்சயமாக சேஸிங் செய்திருக்கும். ஆனால், இந்த 3 ஓவர்கள்தான் ஆட்டத்தை மாற்றிய தருணமாகும்.