இந்த வைரஸ் தொற்று கட்டுப்படுத்தக்கூடியது என்பதால் பீதி அடையத் தேவையில்லை என தெரிவிக்கப்பட்டுள்ளது என்கிறது அந்த செய்தி.

சென்னை மாநகர பேருந்துகளில் சிங்கார சென்னை ஸ்மார்ட் அட்டையை பயன்படுத்தி பயணிக்கும் திட்டத்தை தமிழக போக்குவரத்துத்துறை அமைச்சர் சிவசங்கர் தொடங்கி வைத்தார் என தினமணி செய்தி வெளியிட்டுள்ளது.

ஸ்மார்ட் அட்டையை பயன்படுத்தி இதுவரை மெட்ரோ ரயில்களில் மட்டுமே பயணித்தவர்கள், தற்போது மாநகர பேருந்துகளில் மட்டுமின்றி அனைத்து பொது போக்குவரத்திலும் பயணிக்கலாம். முதல் கட்டமாக 50 ஆயிரம் ஸ்மார்ட் அட்டைகள் விநியோகிக்கப்பட உள்ளது. சென்னையின் முக்கிய பேருந்து நிலையங்களில் கட்டணமின்றி இந்த ஸ்மார்ட் அட்டைகளை வழங்கும் பணி தொடங்கப்பட்டுள்ளது என்கிறது அந்த செய்தி.

ஆந்திர முதல்வர் சந்திரபாபு நாயுடு, தனது குப்பம் தொகுதிக்கு 2 நாள் சுற்றுப்பயணமாக சென்றுள்ளார். அங்குள்ள குப்பம் திராவிட பல்கலைக்கழத்தில் நடந்த நிகழ்ச்சியொன்றில் பேசிய அவர், பாலாற்றில் மீண்டும் தடுப்பணை கட்ட நடவடிக்கை எடுக்கப்படும் என கூறியுள்ளதாக தி இந்து தமிழ் செய்தி வெளியிட்டுள்ளது.

மேலும் அவர், ”மாநிலத்தின் மக்கள் தொகை கவலை அளிப்பதாக உள்ளது. அதிகமான குழந்தைகளை பெற்றுக்கொள்ளுங்கள். ஆந்திர மக்கள் தொகை ஆண்டுக்கு 1.5 சதவீதம் மட்டுமே வளர்ச்சி பெறுகிறது. இதுகுறித்து மக்கள் ஆலோசிக்க வேண்டும்” ‘என பேசியுள்ளார் என்கிறது தி இந்து தமிழ் செய்தி.

ஆசியாவிலேயே மிகப்பெரிய ஆழமற்ற கடல் அலைப்படுகை ஆராய்ச்சி மையத்தை சென்னை ஐஐடி தொடங்கியுள்ளதாக தி டைம்ஸ் ஆப் இந்தியா செய்தி வெளியிட்டுள்ளது.

சென்னை ஐஐடி வளாகத்தில் இருந்து 36 கிலோ மீட்டர் தொலைவில் தையூரில் அமைந்துள்ள டிஸ்கவரி செயற்கைகோள் வளாகத்தில் இந்த அலைப்படுகை ஆராய்ச்சி மையத்தை ஐஐடி அமைத்துள்ளது. இது ஆசியாலேயே மிகப்பெரிய ஆராய்ச்சி மையமாகும். துறைமுகங்கள், நீர்வழிப்பாதைகள், கடல்சார் பொறியியல் போன்றவற்றில் உள்ள பிரச்னைகளுக்கு தீர்வு காணுவதற்கான சிறப்பு வசதிகள் உள்ளன.

– இது, பிபிசிக்காக கலெக்டிவ் நியூஸ்ரூம் வெளியீடு.