இங்கிலாந்து அணியிலும் பேட்டிங் பிரச்னை இருக்கிறது. கரிபியன் மண்ணில் சதம் அடித்த பில் சால்ட் இந்தியத் தொடரில் திணறுகிறார். ஐபிஎல் தொடரில் கொல்கத்தா அணியில் நன்றாக விளையாடிய சால்ட் இந்தத் தொடரில் சுணங்குவது வியப்பாக இருக்கிறது.

ஹேரி ப்ரூக், ஸ்மித், பெத்தெல் இதுவரை பெரிதாக பங்களிப்பு செய்யவில்லை. இந்திய சுழற்பந்துவீச்சு அதிலும் வருண் பந்துவீச்சைக் கண்டு வியப்பில் உள்ளனர். கேப்டன் பட்லர் ஒரு போட்டியில் அரைசதம் அடித்தநிலையில், அடுத்த 2 ஆட்டங்களிலும் பெரிதாக ஸ்கோர் செய்யவில்லை. லிவிங்ஸ்டன் கடந்த ஆட்டத்தில் கடைசி நேரத்தில் ஒரு கேமியோ ஆடியதால் ரன்கள் கிடைத்தன. இல்லாவிட்டால் இங்கிலாந்தின் நிலை மோசமாகியிருக்கும்.

இங்கிலாந்து அணியும் பேட்டிங் சிக்கலில் சிக்கியிருக்கிறது. அதிலும், இங்கிலாந்து அணி வீரர்களின் விக்கெட்டை வீழ்த்த இந்திய அணியின் சுழற்பந்துவீச்சு பெரிய ஆயுதமாக அமையும்.

மகாராஷ்டிராவின் புனே மைதானத்தில் 42 ஆயிரம் பேர் வரை அமரலாம். புனே ஆடுகளம் முற்றிலும் சுழற்பந்துவீச்சுக்கு ஏற்றது. கருப்பு மண்ணால் விக்கெட் அமைந்திருப்பதால், தொடக்கத்தில் சில ஓவர்கள் வேகப்பந்துவீச்சுக்கும் பின்னர் சுழற்பந்து வீச்சுக்கும் முற்றிலும் ஏதுவாக மாறிவிடும்.

இந்த ஆடுகளத்தில் 4 சர்வதேச டி20 போட்டிகள் நடந்துள்ளன. இதில் 2 ஆட்டங்களில் முதலில் பேட் செய்த அணியும், 2 ஆட்டங்களில் சேஸிங் செய்த அணியும் வென்றுள்ளன. ஆடுகளத்தின் தன்மையை உடனடியாக கண்டுபிடிப்பது கடினம் என்பதால் போட்டியில் சுவாரஸ்யத்துக்கு குறைவிருக்காது. குறிப்பாக, நடுப்பகுதி ஓவர்கள்தான் ஆட்டத்தில் மாற்றத்தைத் தரப்போகும் ஓவர்களாக மாறும். நடுப்பகுதி ஓவர்களை பேட்டர்கள் சமாளித்து ஆடிவிட்டால் டெத் ஓவர்களில் ஸ்கோர் செய்யலாம்.

இதுவரை 64 டி20 போட்டிகள் ஒட்டுமொத்தமாக நடந்துள்ளன. இதில், 35 முறை முதலில் பேட் செய்த அணியே வென்றுள்ளன. இந்த ஆடுகளத்தில்தான் கடந்த ஆண்டு அக்டோபர் மாதம் நியூசிலாந்து சுழற்பந்துவீச்சாளர் மிட்ஷெல் சான்ட்னர் 13 விக்கெட்டுகளை வீழ்த்தியது நினைவிருக்கும். ஆதலால் சுழற்பந்துவீச்சு ஆயுதத்தை எந்த அணி வலுவாகக் கையாள்கிறதோ அந்த அணி வெற்றிக்கு முன்னெடுக்கும்.