அதனைத் தொடர்ந்து பிரசித் கிருஷ்ணா பந்துவீச்சில் ஜேமி ஓவர்டன் எல்பிடபிள்யூ ஆனார். 12 பந்துகளைச் சந்தித்த ஜோஷ் டங் 0 ரன்களில் பிரசித் கிருஷ்ணா வீசிய ஃபுல் லெந்த் பந்தில் க்ளீன் போல்ட் ஆனார். இதனைத் தொடர்ந்து கையில் காயம் ஏற்பட்ட நிலையில் கிறிஸ் வோக்ஸ் பேட்டிங் செய்ய வந்தார்.

ஒரு விக்கெட் மட்டுமே மீதமிருந்த நிலையில் மறுபுறம் கஸ் அட்கின்சன் நிலைத்து நின்று ஆடினார். இங்கிலாந்தின் வெற்றிக்கு 17 ரன்களும் இந்தியாவின் வெற்றிக்கு 1 விக்கெட்டும் தேவை என்கிற நிலையில் ஆட்டம் இருந்தது.

சிராஜின் பந்து வீச்சில் சிக்ஸர் பறக்கவிட்டு ஆட்டத்தை உயிர்ப்புடன் வைத்திருந்தார் அட்கின்சன். அவர் அடித்த பந்து ஆகாஷ்தீபின் கடினமாக கேட்ச் முயற்சியையும் கடந்து எல்லைக் கோட்டிற்கு வெளியே சென்று விழுந்தது.

கிறிஸ் வோக்ஸை ஸ்ட்ரைகர் எண்டிற்கு வரவைக்கக்கூடாது என்பதில் அட்கின்சன் குறியாக இருந்தார். பவுண்டரி அல்லது சிக்ஸர் அடிப்பது மட்டுமே அவருடைய இலக்காக இருந்தது. இரண்டு ஓவர்களில் கடைசி பந்தில் 1 ரன்கள் எடுத்து ஸ்ட்ரைகர் எண்டிற்கு வந்தார் அட்கின்சன்.

ஆனால் இந்த உத்தி நீண்ட நேரம் நிலைக்கவில்லை. சிராஜ் வீசிய யார்க்கர் பந்தில் அட்கின்சனின் அட்டமிழக்க 6 ரன்கள் வித்தியாசத்தில் இந்திய அணி த்ரில் வெற்றி பெற்றது.

இந்தியா-இங்கிலாந்து அணிகளுக்கிடையிலான 5வது மற்றும் கடைசி டெஸ்ட் போட்டி லண்டன் ஓவல் மைதானத்தில் நடைபெற்றது. இந்த தொடரில் ஏற்கெனவே இங்கிலாந்து 2-1 என முன்னிலை வகித்தது. ஒரு போட்டி டிராவில் முடிவடைந்தது.

இத்தொடரின் அனைத்து போட்டிகளிலும் டாஸை இந்திய அணி இழந்தது. டாஸ் வென்ற இங்கிலாந்து அணி இந்திய அணியை பேட் செய்ய பணித்தது.

முதல் இன்னிங்சில் இந்திய அணி 224 ரன்கள் எடுத்தது. இங்கிலாந்து அணி 247 ரன்கள் எடுத்தது. இந்திய அணிக்காக பெரிதும் எதிர்பார்க்கப்பட்ட கருண் நாயர் முதல் இன்னிங்சில் மட்டும் அரை சதம் அடித்தார்.

இரண்டாவது இன்ங்சில் 396 ரன்களை இந்திய அணி எடுக்கவே, ஓவல் மைதானத்தின் வரலாற்றில் மிகப்பெரிய சேஸிங் வெற்றி என்ற இலக்கை நோக்கி இங்கிலாந்து அணி பேட்டிங் செய்தது.

கிராலி மற்றும் கேப்டன் ஆலி போப் ஏமாற்றமளித்த போதிலும், நான்காவது நாள் ஆட்டத்தில் பென் டக்கெட் மற்றும் ஜோ ரூட் இணைந்து பெரிய இன்னிங்சை கட்டமைத்தனர். 83 பந்துகளில் 54 ரன்கள் எடுத்த பென் டக்கெட் பிரசித் கிருஷ்ணா பந்து வீச்சில் ஆட்டமிழந்தார்.

எனினும் ஹாரி புரூக் ஜோ ரூட்டுடன் இணைந்து பார்ட்னர் ஷிப் அமைத்தார். ஒரு நாள் போட்டியைப் போன்று விளையாடிய புரூக் 98 பந்துகளில் 111 ரன்களைக் குவித்தார். இந்த இணை இங்கிலாந்து அணியை வெற்றிக்கு நெருக்கமாக கொண்டு சேர்த்தது.

இவர்கள் இருவரின் விக்கெட்டுகளும் விழவே ஆட்டம் மீண்டும் சவாலான கட்டத்திற்குச் சென்றது. இந்நிலையில் கடைசி நாளில் சிராஜின் சவாலான பந்து வீச்சால் ஆட்டம் முழுமையாக இந்திய அணி பக்கம் திரும்பியது.

-இது, பிபிசிக்காக கலெக்டிவ் நியூஸ்ரூம் வெளியீடு