தென் ஆப்ரிக்க அணிக்கு எதிரான முதலாவது ஒருநாள் போட்டியில் விராட் கோலியின் சதத்தால் 349 ரன்களைக் குவித்தது இந்திய அணி. இறுதி வரை போராடிய தென் ஆப்ரிக்கா 332 ரன்களுக்கு 10 விக்கெட்டுகளை இழந்தது. இந்திய அணி 17 ரன்கள் வித்தியாசத்தில் வெற்றி பெற்றது.
இந்திய அணியின் கேப்டன் ஷுப்மன் கில் மற்றும் துணை கேப்டன் ஷ்ரேயாஸ் ஐயர் காயம் காரணமாக விலகிய நிலையில் கே.எல். ராகுல் ஒருநாள் தொடருக்கான கேப்டனாக நியமிக்கப்பட்டுள்ளார். நீண்ட இடைவெளிக்குப் பிறகு ருதுராஜ் கெய்க்வாட் இந்திய ஒருநாள் அணியில் இடம்பெற்றிருந்தார்.
முதலாவது ஒருநாள் போட்டியில் டாஸ் வென்ற தென் ஆப்ரிக்க அணி முதலில் பந்துவீச்சை தேர்வு செய்தது.
யஷஸ்வி ஜெய்ஸ்வால் மற்றும் ரோஹித் சர்மா தொடக்க வீரர்களாக களம் இறங்கினர். ஆரம்பத்திலே அதிரடி காட்டிய ஜெய்ஸ்வால் 2 பவுண்டரி, 1 சிக்ஸர் அடித்த நிலையில் 18 ரன்களுக்கு ஆட்டமிழந்தார்.
பட மூலாதாரம், Getty Images
நிலைத்து நின்று ஆடிய கோலி – ரோஹித்
இரண்டாவது விக்கெட்டுக்கு களமிறங்கிய விராட் கோலி, ரோஹித் சர்மா உடன் இணைந்து சிறப்பான பார்ட்னர்ஷிப் அமைத்து ஆடினார்.
இருவருமே பவர்பிளேயில் அதிரடியான ஆட்டத்தை வெளிப்படுத்தி 10 ஓவர்களில் 80 ரன்கள் சேர்த்தனர். சீரான இடைவெளிகளில் இருவருமே பவுண்டரிகளையும் சிக்ஸர்களையும் அடித்தனர்.
அரைசதம் கடந்த நிலையில் ரோஹித் சர்மா 56 ரன்களில் ஆட்டமிழந்தபோது இருவரும் 109 பந்துகளில் 136 ரன்கள் பார்ட்னர்ஷிப் சேர்த்திருந்தனர். ரோஹித்தின் விக்கெட்டிற்குப் பிறகு கோலி நிதானமாக ஆட ஆரம்பித்தார்.
ஆனால் அடுத்தடுத்து களமிறங்கிய ருதுராஜ் கெய்க்வாடும் வாஷிங்டன் சுந்தரும் பெரிதாக சோபிக்கவில்லை. கெய்க்வாட் 8 ரன்களிலும் (14 பந்துகள்) சுந்தர் 13 ரன்களில் (19 பந்துகள்) ஆட்டமிழந்தனர். இதனால் இந்திய அணி ரன்ரேட் 6 ஆக சரிந்தது.
ஐந்தாவது விக்கெட்டுக்கு களமிறங்கிய கே.எல்.ராகுல் நிதானமாக ஆடி கோலியுடன் 76 ரன்களுக்கு நிலையான பார்ட்னர்ஷிப் அமைத்தார்.
அதிரடிக்கு மாறிய கோலி, ஜடேஜா
பட மூலாதாரம், Getty Images
நீண்ட நேரம் 90 ரன்களிலே இருந்த கோலி பொறுமையாக ஆடி 102 பந்துகளில் தனது 52வது சதத்தை அடித்தார். அதன் பின்னர் அதிரடி மோடுக்கு மாறிய கோலி ப்ரேனெலன் சுப்ராயன் வீசிய 39வது ஓவரில் 2 பவுண்டரிகள் மற்றும் 2 சிக்ஸர்களை அடித்தார். 120 பந்துகளில் 135 ரன்கள் எடுத்து விராட் கோலி ஆட்டமிழந்தார்.
கோலி ஆட்டமிழக்கும் வரை நிதானத்தைக் கடைப்பிடித்த கே.எல்.ராகுல் 6வது விக்கெட்டுக்கு களமிறங்கிய ஜடேஜாவுடன் இணைந்து அதிரடியாக ஆடத் தொடங்கினார். இருவரும் இணைந்து 36 பந்துகளில் 65 ரன்கள் சேர்க்க இந்திய அணியின் ஸ்கோர் 300 ரன்களைக் கடந்தது. ஆட்டத்தின் இறுதியில் இந்திய அணி 349 ரன்கள் எடுக்க தென் ஆப்ரிக்க அணி வெற்றி பெற 350 ரன்கள் இலக்காக நிர்ணயிக்கப்பட்டது.
350 ரன்கள் இலக்கை துரத்தி இரண்டாவது இன்னிங்ஸைத் தொடங்கிய தென் ஆப்ரிக்காவிற்கு ஆரம்பத்திலே அதிர்ச்சி காத்திருந்தது. ஹர்ஷித் ராணா வீசிய 2வது ஓவரிலே ரயன் ரிக்கில்டன் மற்றும் குயின்டன் டி காக் அடுத்தடுத்து ஆட்டமிழக்க தென் ஆப்ரிக்க அணி 7 ரன்களுக்கு 2 விக்கெட்டுகளை இழந்து தடுமாறியது.
இந்த அதிர்ச்சியிலிருந்து மீள்வதற்குள்ளாகவே 5வது ஓவரில் தென் ஆப்ரிக்க அணியின் கேப்டன் எய்டன் மார்க்கரம் 15 பந்துகளில் 7 ரன்கள் மட்டுமே எடுத்து ஆட்டமிழந்தார். தென் ஆப்ரிக்க அணி 11 ரன்களுக்கு 3 விக்கெட்டுகளை இழந்திருந்தது.
நான்காவது விக்கெட்டிற்கு டோனி டி ஸோர்சி மற்றும் மேத்யூ ப்ரெட்ஸ்கி 66 ரன்கள் சேர்த்தனர். ஸோர்சி 39 ரன்கள் எடுத்து குல்தீப் யாதவ் பந்துவீச்சில் ஆட்டமிழந்தார்.
இவரைத் தொடர்ந்து 5 விக்கெட்டிற்கு களமிறங்கிய டெவால்ட் பிரெவிஸ் அதிரடியாக தொடங்கினார். ஆனால் அந்த அதிரடி நிலைக்கவில்லை. 2 பவுண்டரிகள் மற்றும் 3 சிக்ஸர்கள் விளாசிய பிரெவிஸ் 28 பந்துகளில் 37 ரன்கள் எடுத்து ஆட்டமிழந்தார்.
பட மூலாதாரம், Getty Images
படக்குறிப்பு, கோர்பின் போஷ்
அதன் பிறகு 6வது விக்கெட்டிற்கு களமிறங்கிய மார்கோ யான்சென், ப்ரெட்ஸ்கி உடன் இணைந்து அதிரடியான பார்ட்னர்ஷிப் அமைத்தார். பவுண்டரி மற்றும் சிக்ஸர்கள் விளாசிய யான்சென் 39 பந்துகளில் 70 ரன்கள் எடுத்து ஆட்டமிழந்தார். இந்த பார்ட்னர்ஷிப் 69 பந்துகளில் 97 ரன்கள் சேர்த்து வெற்றிக்கான ரன்ரேட்டை வெகுவாக குறைத்தது. ஆனாலும் வெற்றிக்கு 123 ரன்கள் தேவையிருந்தது.
யான்சென், ப்ரெட்ஸ்கி அடுத்தடுத்து ஆட்டமிழக்க தென் ஆப்ரிக்கா அணி 228 ரன்களுக்கு 7 விக்கெட்களை இழந்து தடுமாறியது. சுப்ரயானும், ஆண்ட்ரே பர்கரும் தலா 17 ரன்கள் எடுத்து ஆட்டமிழந்தனர்.
ஒருபுறம் விக்கெட்டுகள் சரிந்து வந்தாலும் தென் ஆப்ரிக்க அணி சீராக ரன் குவித்து வந்தது. போஷ் தனது அதிரடியை தொடர்ந்து வந்தார். 51 பந்துகளில் 67 ரன்கள் எடுத்த போஷ் பிரசித் கிருஷ்ணா வீசிய 50 ஓவரில் ஆட்டமிழந்தார். இந்திய அணி 17 ரன்கள் வித்தியாசத்தில் வெற்றி பெற்றது.
