237 ரன்கள் இலக்கை துரத்திய நியூசிலாந்துக்கு வில்லியம்ஸன்(5), யங்(0) ஆகியோர் அதிர்ச்சிக்குரிய வகையில் ஆட்டமிழந்தனர், 75 ரன்களுக்கு 3 விக்கெட்டுகளை இழந்து நியூசிலாந்து தடுமாறியது. ஆனால், 4வது விக்கெட்டுக்கு ரச்சின் ரவீந்திரா, டாம் லேதம் கூட்டணி அணியை சரிவிலிருந்து மீட்டு ஆட்டத்தை கையில் எடுத்தனர்.

இருவரும் 4-வது விக்கெட்டுக்கு 130 ரன்கள் பார்ட்னர்ஷிப் அமைத்தனர். ரவீந்திரா சதம் அடித்து 112 ரன்களில் ஆட்டமிழந்தார். லேதம் 55 ரன்களில் ஆட்டமிழந்தார். பிலிப்ஸ் 21, பிரேஸ்வெல் 11 ரன்களுடன் இறுதிவரை ஆட்டமிழக்காமல் இருந்து அணியை வெற்றிக்கு அழைத்துச் சென்றனர்.

நியூசிலாந்தில் சிறந்த சுழற்பந்துவீச்சாளராக பிரேஸ்வெல் உருவாகி வருகிறார். இந்த ஆட்டத்தில் 10 ஓவர்கள் வீசி 26 ரன்கள் கொடுத்து 4 விக்கெட்டுகளை வீழ்த்திய அவர் ஆட்டநாயகன் விருது வென்றார்.

நியூசிலாந்து அணியின் கேப்டன் சான்ட்னர் கூறுகையில் ” சாம்பியன்ஸ் டிராபி அரையிறுதிக்கு தகுதி பெற்றது மகிழ்ச்சி. வங்கதேசம் சவாலாக இருப்பார்கள் எனத் தெரியும். பந்துவீச்சில் எங்களுக்கு சவாலாக இருந்தார்கள், சமாளித்துவிட்டோம். பிரேஸ்வெல் பந்துவீச்சு அற்புதம்.

இரவில் பனிப்பொழிவின் போதும், பகல் நேரத்திலும் இருவிதமாக ஆடுகளத்தின் தன்மை மாறியது. காயத்திலிருந்து மீண்டு வந்த ரவீந்திரா அருமையான இன்னிங்ஸ் கொடுத்தார். இந்தியாவுக்கு எதிராக சிறப்பாக ஆடுவார் என நம்புகிறேன். துபை வித்தியாசமான ஆடுகளம், வித்தியாசமான சூழல்” எனத் தெரிவித்தார்.

வங்கதேசத்தை வீழ்த்தியதன் மூலம் குரூப் ஏ பிரிவில் நியூசிலாந்து அணி 4 புள்ளிகளுடன் நிகரரன்ரேட்டில் 0.863 என்ற கணக்கில் முதலிடத்தில் இருக்கிறது. இந்திய அணியும் 4 புள்ளிகள் பெற்றிருந்தாலும் நிகர ரன் ரேட் அடிப்படையில் 0.647 புள்ளிகளுடன் 2வது இடத்தில் இருக்கிறது.

மார்ச் 2-ஆம் தேதி துபைல் நடக்கும் குருப் ஏ பிரிவு கடைசி லீக் ஆட்டத்தில் இந்தியா – நியூசிலாந்து அணிகள் மோதுகின்றன. இதில் வெல்லும் அணி குரூப் ஏ பிரிவில் முதலிடத்தைப் பிடிக்கும்.

போட்டியை நடத்தும் பாகிஸ்தான் அணி மோசமான தோல்விகளுடன் தொடரிலிருந்தே வெளியேறியது. இனி ஆறுதல் வெற்றிக்காக வங்கதேசத்துடன் வரும் 27-ஆம் தேதி ராவல்பிண்டியில் நடக்கும் போட்டியில் பாகிஸ்தான் மோதுகிறது.

பாகிஸ்தான் அணி கடந்த 1996ம் ஆண்டுக்குப்பின் ஐசிசி சார்பில் நடக்கும் போட்டியை 30 ஆண்டுகளுக்குப் பின் இப்போது நடத்தியது. இதற்காக கோடிக்கணக்கான செலவில் மைதானங்களை, அரங்குகளை, ஆடுகளங்களை சீரமைத்தது.

உலக டெஸ்ட் சாம்பியன்ஷிப் அட்டவணையில் கடைசி இடம், 3 உலகக் கோப்பைத் தொடர்களிலும் அரையிறுதிக்கு செல்ல முடியாத நிலை, டி20 உலகக்கோப்பைத் தொடரில் முதல் சுற்றோடு வெளியேற்றம், இப்போது ஐசிசி சாம்பியன்ஸ் தொடரை நடத்தியும் அதில் அரையிறுதி கூட தகுதி பெறாத நிலையில் மோசமான நிலைக்கு பாகிஸ்தான் தள்ளப்பட்டுள்ளது. கடந்த 1992ம் ஆண்டு உலக சாம்பியன் பட்டம் வென்ற பாகிஸ்தான் அணியின் ஒத்த தன்மைகள் ஏதும் இல்லாத நிலையில் இப்போது அந்த அணி இருக்கிறது.

கடந்த காலங்களில் பாகிஸ்தான் மிகப்பெரிய சரிவுகளுக்குச் சென்றிருந்தாலும், அவர்கள் யாரும் ஊகிக்க முடியாத வகையில் ஏதேனும் ஒன்றைச் செய்து மீண்டனர்.

பாகிஸ்தான் வீரர்கள் வெற்றிக்கு அருகே சென்று போராடி தோற்கவில்லை, அதேநேரத்தில் தோல்வியை ஏற்றுக் கொள்ள பழகி விட்டார்கள் என்பது பாகிஸ்தான் கிரிக்கெட்டுக்கு நல்லதல்ல என்று வர்ணனையாளர்கள் கூறுகிறார்கள்.

இந்திய அணிக்கு எதிரான பாகிஸ்தானின் தோல்வி ஆட்டத்தைப் பற்றிய விழிப்புணர்வு இல்லாமை அல்லது கவனக்குறைவால் ஏற்பட்டது அல்ல. அருமையான ஆடுகளத்தில் டாஸ் வென்று, வேகம் குறைந்த ஆடுகளத்தில் முதலில் பேட் செய்தனர். திட்டமிடலுடன்தான் களத்துக்கு பேட் செய்ய வந்தனர். இந்திய தரப்பில் பிரதான வேகப்பந்துவீச்சாளர் ஷமி இல்லாத நிலையில் எந்த விதமான ரிஸ்கும் எடுக்காமல் ஓவருக்கு ஐந்து ரன்கள் எடுத்து விளையாடும் அளவுக்கு கூட அவர்களின் பேட்டிங் இல்லை. டாட் பந்துகள் அதிகரித்து, இறுதியில் ரிஸ்க் எடுத்து ஆட முயன்ற போது விக்கெட்டுகள் விழுந்தன.