ரன் வேகம் குறைந்ததால் மெல்ல பொறுமை இழந்த ஆர்சிபி பேட்டர்கள் பெரிய ஷாட்கள் அடிக்க முயன்று தங்கள் விக்கெட்டுகளை இழந்தார்கள். குருனால் பாண்ட்யா 1, ஜித்தேஷ் ஷர்மா 5, டிம் டேவிட் 13, ரொமாரியோ ஷெபர்ட் 22 என வந்த வேகத்தில் பெவிலியன் திரும்பிக்கொண்டே இருந்தார்கள்.

அதனால் 14 ஓவர்கள் முடிவில் 125 ரன்களை எடுத்து 7 விக்கெட்டுகளை இழந்தது ஆர்சிபி. அதனால் வெங்கடேஷ் ஐயர் முதல் இன்னிங்ஸிலேயே இம்பேக்ட் வீரராகப் பயன்படுத்தவேண்டிய நிலைக்கு அந்த அணி தள்ளப்பட்டது.

ஒருபக்கம் தொடர்ச்சியாக விக்கெட்டுகள் வீழ்ந்தாலும், ஆர்சிபி கேப்டன் ரஜத் பட்டிதார் நிலைத்து நின்று விளையாடினார். அவ்வப்போது பவுண்டரிகளை அடித்து அணியின் ரன் விகிதத்தையும் குறைக்காமல் பார்த்துக்கொண்டார். 40 பந்துகளை சந்தித்த அவர் 63 ரன்கள் எடுத்து ஆட்டமிழந்தார்.

ஒருகட்டத்தில் ஆர்சிபி 200 ரன்களைத் தொடுமா என்ற கேள்வி எழுந்தது. ஆனால், கடைசி ஓவரில் வெங்கடேஷ் ஐயர் அதிரடி காட்டியதால், அந்த அணி 201 ரன்களை எடுத்தது. வெங்கடேஷ் ஐயர் ஆட்டமிழக்காமல் 29 ரன்கள் எடுத்தார்.

ராஜஸ்தான் ராயல்ஸ் தரப்பில் ஆர்ச்சர், பிரிஜேஷ், பிஷ்னாய் ஆகியோர் தலா 2 விக்கெட்டுகள் வீழ்த்தினார்கள்.

ராஜஸ்தான் ராயல்ஸ் அணி வழக்கம்போல் முதல் ஓவரில் இருந்தே அதிரடியைத் தொடங்கியது.

யஷஷ்வி ஜெய்ஸ்வால் இரண்டாவது ஓவரிலேயே வெளியேறியிருந்தாலும், 15 வயது இளம் வீரர் வைபவ் சூர்யவன்ஷி புயல் வேகத்தில் விளையாடினார்.

அபினந்தன் சிங் வீசிய 3வது ஓவரில் 2 பவுண்டரிகளும் 1 சிக்ஸரும் விளாசினார் சூர்யவன்ஷி. முன்னணி வேகப்பந்துவீச்சாளர் ஜாஷ் ஹேசில்வுட் வீசிய அடுத்த ஓவரில் 3 பவுண்டரிகளும், 1 சிக்ஸரும் பறந்தன.

புவனேஷ்வர் குமார் வீசிய ஆட்டத்தின் ஐந்தாவது ஓவரில் அடுத்தடுத்து 2 சிக்ஸர்கள் அடித்து தன் அரைசதத்தையும் அவர் நிறைவு செய்தார். 15 பந்துகளில் அரைசதம் கடந்த தன் அதிவேக அரைசதத்தை அவர் மீண்டும் சமன் செய்தார். முன்னதாக சென்னை சூப்பர் கிங்ஸ் அணிக்கெதிரான போட்டியிலும் சூர்யவன்ஷி 15 பந்துகளில் அரைசதம் கடந்திருந்தார்.

மூன்றாவது விக்கெட்டுக்கு சூர்யவன்ஷியுடன் ஜோடி சேர்ந்த துருவ் ஜுரெலும் வேகமாக ஆட, ராஜஸ்தான் ராயல்ஸின் ரன்ரேட் அதிவேகமாக உயர்ந்தது. பவர்பிளே முடிவிலேயே அந்த அணி 97 ரன்கள் எடுத்தது. ராயல்ஸ் ஐபிஎல் வரலாற்றில் அந்த அணியின் அதிகபட்ச பவர்பிளே ஸ்கோர் இதுதான்.

இம்பேக்ட் பிளேயராக வெங்கடேஷ் ஐயரைப் பயன்படுத்தியதால், ஒரு பௌலர் குறைவாகவே விளையாடியது ஆர்சிபி. அது அவர்களின் பந்துவீச்சாளர்களுக்கு மேலும் நெருக்கடியை ஏற்படுத்தியது.

பவர்பிளேவுக்குப் பிறகும் அதிரடியைத் தொடங்கிய சூர்யவன்ஷி, குருனால், டிம் டேவிட் ஆகியோரின் சுழற்பந்துவீச்சையும் சிறப்பாக எதிர்கொண்டு பவுண்டரிகளும், சிக்ஸர்களும் விளாசினார். சதமடிப்பார் என்று எதிர்பார்த்திருந்த நிலையில் 78 ரன்களில் சூர்யவன்ஷி ஆட்டமிழந்தார். அவர் 26 பந்துகளைச் சந்தித்த அவர் 8 பவுண்டரிகளும், 7 சிக்ஸர்களும் விளாசினார்.

சூர்யவன்ஷியை அவுட்டாக்கிய அடுத்த பந்திலேயே ஹிட்மெயரையும் வெளியேற்றினார் குருனால். ஹேசில்வுட் வீசிய அடுத்த ஓவரில் கேப்டன் ரியான் பராக்கும் அவுட்டாக ராயல்ஸ் அணி மீது நெருக்கடி ஏற்பட்டது. ஆனால், ஐந்தாவது விக்கெட்டுக்கு ஜோடி சேர்ந்த பராக் – ஜடேஜா ஜோடி ஆட்டத்தை தங்கள் கட்டுக்குள் கொண்டுவந்தது.

ஜடேஜா மிகவும் நிதானமாக விளையாட, பராக் தன் சிறப்பான ஆட்டத்தைத் தொடர்ந்தார். 25 பந்துகளில் அரைசதம் கடந்த அவர், கடைசி வரை ஆட்டமிழக்காமல் 81 ரன்கள் எடுத்து தன் அணியை வெற்றிக்கு அழைத்துச் சென்றார்.

– இது, பிபிசிக்காக கலெக்டிவ் நியூஸ்ரூம் வெளியீடு