மூன்று ஓவர்கள் முடிவில் 21/3 என்ற நிலையில் இருந்தது இலங்கை. பின்னடைவைச் சந்தித்திருந்த காரணத்தால், இலங்கையை தொடர்ந்து அட்டாக் செய்ய முடிவு செய்தார் ப்ரூக். மீண்டும் ஆர்ச்சர் கையில் பந்தைக் கொடுத்தார். தன்னுடைய முன்னணி பௌலருக்கு பவர்பிளேவுக்குள்ளாகவே மூன்று ஓவர்களை முடிப்பது பற்றி அவர் அஞ்சவில்லை. சூழ்நிலையை தனக்கு சாதகமாகப் பயன்படுத்திக்கொள்ள நினைத்தார். அதற்கு அந்த ஓவரில் பலனும் கிடைத்தது.

ஆர்ச்சர் வீசிய அதிவேக பந்தை ஆஃப் சைட் அடிக்க நினைத்த கமில் மிஷாரா, எட்ஜாகி கல்லி திசையில் ஜேமி ஓவர்டனிடம் கேட்ச் ஆனார். அந்த ஃபீல்டிங் மிகவும் வித்தியாசமாக இருந்தது. ஸ்லிப் என யாரும் இருக்கவில்லை. ஷார்ட் மேன் போலவும் இருக்கவில்லை. கல்லி திசையில், ஆனால் சற்று பின்னால் ‘ஃப்ளையிங் ஸ்லிப்’ என்று சொல்லப்படும் இடத்தில் நிற்கவைக்கப்பட்டிருந்தார் ஓவர்டன். பந்து சரியாக அவர் கையில் சென்று தஞ்சமடைந்தது. இலங்கை – 22/4.

பவர்பிளேவின் கடைசி ஓவரையும் ஜேக்ஸ்-ஐ வைத்தே முடித்தார் ப்ரூக். அந்த ஓவரில் இரண்டு பவுண்டரிகள் அடித்த வெல்லாலகே, இன்னொரு பவுண்டரிக்கு ஆசைப்பட்டு தூக்கி அடிக்க, மிட் ஆன் திசையில் நின்றிருந்த ப்ரூக்கிடமே பந்து சென்றது. ஜேக்ஸ் மூன்றாவது விக்கெட்டைக் கைப்பற்ற, இலங்கை தங்கள் ஐந்தாவது விக்கெட்டை இழந்தது. அந்த அணி தங்கள் பவர்பிளேவை 34/5 என முடித்தது.

இந்த மோசமான தொடக்கத்திலிருந்து இலங்கை அணியால் மீண்டு வர முடியவில்லை. கேப்டன் ஷனகா மட்டும் போராடி 30 ரன்கள் எடுத்தார். எந்தவொரு பார்ட்னர்ஷிப்புமே 20 ரன்கள் கூட தாண்டாததால், இலங்கை அணியால் படுதோல்வியைத் தவிர்க்க முடியவில்லை.

ஸ்பின்னை சரியாக ஆடக்கூடிய இலங்கை பேட்டர்கள் கூட இன்று தடுமாறியது ஏமாற்றமளித்ததாக இந்தப் போட்டியின் வர்ணனையின்போது சங்கக்காரா கூறினார். இந்தப் போட்டியில் ஓப்பனராகக் களமிறக்கப்பட்ட மிஷாரா முதலிரு ஓவர்களில் ‘இன்டென்ட்’ காட்டி ரன் சேர்க்காதது மற்ற பேட்டர்களுக்கு நெருக்கடியை ஏற்படுத்தியதாகவும் அவர் தெரிவித்தார்.

இந்தப் போட்டியில் 4 ஓவர்கள் வீசிய வில் ஜேக்ஸ் 22 ரன்கள் மட்டுமே கொடுத்து 3 விக்கெட்டுகள் வீழ்த்தினார். ஆனால், அவர் பங்களிப்பு பந்துவீச்சோடு நின்றுவிடவில்லை. பேட்டிங், ஃபீல்டிங் இரண்டிலுமே தாக்கம் ஏற்படுத்தினார் ஜேக்ஸ்.

இங்கிலாந்து அணி 94/5 என்ற நிலையில் இருந்தபோது பேட்டிங் செய்ய வந்தார் ஜேக்ஸ். இலங்கை ஸ்பின்னர்கள், வேகப்பந்துவீச்சாளர்கள் அனைவரும் சிறப்பாக பந்துவீசிக்கொண்டிருந்ததால் மிகவும் நிதானமாக ஆட்டத்தைத் தொடங்கினார் அவர். இலங்கை பௌலர்கள் பெரும்பாலும் ஸ்டம்ப் லைனிலேயே பந்துவீசிய நிலையில், அந்தப் பந்துகளை கவனமாக எதிர்கொண்டார்.

அதேசமயம் ஆஃப் சைடில் கொஞ்சம் வெளியே சென்றாலும் கவர்/எக்ஸ்டிரா கவர் திசையில் டிரைவ் செய்து பந்தை பவுண்டரி ஆக்கினார். மஹீஷ் தீக்‌ஷனா, துஷ்மந்தா சமீரா, தில்ஷன் மதுஷங்கா என அனைவரின் பந்துவீச்சிலும் அது நடந்தது. இலங்கை வேகப்பந்துவீச்சாளர்கள் ஆஃப் சைடில் மூன்று ஃபீல்டர்களை பவுண்டரி எல்லையில் நிறுத்தியிருந்தபோதும், இடைவெளியை சரியாகக் கண்டறிந்தார் அவர். அவர் அடித்த நான்கு பவுண்டரிகளுமே கவர் மற்றும் எக்ஸ்டிரா கவர் திசையில் தான் அடிக்கப்பட்டன.

14 பந்துகளில் 21 ரன்கள் அடித்த அவர் கடைசி கட்டத்தில் இங்கிலாந்து அணி 140 ரன்களைக் கடக்க முக்கியக் காரணமாக அமைந்தார். இந்த இன்னிங்ஸில் ஃபில் சால்ட்-க்குப் (62 ரன்கள்) பிறகு அதிக ரன்கள் அடித்த இங்கிலாந்து வீரர் இவர்தான்.

இதோடு மட்டுமல்ல, ஃபீல்டிங்கிலும் ஒரு சிறந்த பங்களிப்பைக் கொடுத்தார் ஜேக்ஸ். கடைசி கட்டத்தில் இலங்கை கேப்டன் தசுன் ஷனகா சற்று அதிரடி காட்டினார். அவர் இருக்கும்வரை இலங்கை அணிக்கு கொஞ்சமேனும் வெற்றி வாய்ப்பு இருக்கும் என்று கருதப்பட்டது. அவரை தன் ஃபீல்டிங்கால் வெளியேற்றினார் ஜேக்ஸ்.

ஆதில் ரஷீத் பந்தை மிட்விக்கெட் திசையில் சிக்ஸர் அடிக்க நினைத்து தூக்கி அடித்தார் ஷனகா. சற்று பின் நகர்ந்து பந்தை கேட்ச் செய்த ஜேக்ஸ், நிலைத்தன்மை இல்லாமல் பவுண்டரி எல்லையை நோக்கி சற்று நகர்ந்தார். வழக்கமாக இதுபோன்ற தருணங்களில் நிறைய ஃபீல்டர்கள் பந்தைத் தூக்கிப் போட்டு பவுண்டரி எல்லைக்குள் சென்று மீண்டும் மைதானத்துக்குள் திரும்பி கேட்ச் பிடிப்பார்கள். ஆனால், பவுண்டரி எல்லையைப் போலவே அருகில் இருந்த மற்றொரு இங்கிலாந்து ஃபீல்டரான டாம் பேன்டனையும் கவனித்த ஜேக்ஸ், பவுண்டரி எல்லைக்குள் செல்வதற்கு முன்பாக பேன்டனை நோக்கிப் பந்தை வீசினார். பேன்டன் அதைப் பிடித்துவிட, அப்போது இங்கிலாந்தின் ஒரே அச்சுறுத்தலாகக் கருதப்பட்ட ஷனகாவும் வெளியேறினார்.

இப்படி பேட்டிங், பௌலிங், ஃபீல்டிங் என மூன்று பிரிவிலும் பங்களித்த வில் ஜேக்ஸ், ஆட்ட நாயகன் விருதையும் வென்றார். இந்த உலகக் கோப்பையில் அவர் வெல்லும் மூன்றாவது ஆட்ட நாயகன் விருது இது!

இது, பிபிசிக்காக கலெக்டிவ் நியூஸ்ரூம் வெளியீடு