തിരുവനന്തപുരം: കുട്ടികളെ സ്കൂള് ബസുകളില് മാത്രമേ സ്കൂളില് അയയ്ക്കാവൂ എന്ന തരത്തില് മോട്ടോര് വാഹന വകുപ്പിന്റേതായി പ്രചരിക്കുന്ന വാര്ത്ത അടിസ്ഥാനരഹിതമാണെന്ന് വകുപ്പ് വ്യക്തമാക്കി. സ്കൂള് വാഹനങ്ങളുമായി ബന്ധപ്പെട്ട നിലവിലെ ചട്ടങ്ങളില് മാറ്റം വരുത്തിയിട്ടില്ലെന്നും മോട്ടോര് വാഹന വകുപ്പ് അറിയിച്ചു. ഒാട്ടോ റിക്ഷകളിലും മറ്റും കുട്ടികളെ സ്കൂളിലയയ്ക്കുന്നത് വിലക്കിയിട്ടില്ല. നിലവിലുള്ള നിയമങ്ങളും സുരക്ഷാ മാനദണ്ഡങ്ങളും പാലിച്ച് അനുവദനീയമായ എണ്ണം കുട്ടികളുമായി സര്വീസ് നടത്താം.
കുട്ടികളെ സ്കൂള് ബസുകളില് തന്നെ അയക്കണമെന്നും ഓട്ടോയില് സ്കൂളില് അയക്കുന്നത് ഒഴിവാക്കണമെന്നും നിര്ദേശിച്ചതായി ചില മാധ്യമങ്ങളില് വാര്ത്ത വന്നിരുന്നു. തെറ്റായ വിവരങ്ങള് പ്രചരിപ്പിക്കുന്നതില് നിന്ന് വിട്ടുനില്ക്കണമെന്നും വകുപ്പ് അഭ്യര്ഥിച്ചു.