ഐച്ചി-നഗോയ ഏഷ്യൻ ഗെയിംസ് 2026-ൽ ഇന്ത്യക്ക് വേണ്ടി സ്ക്വാഷിൽ വെള്ളി മെഡൽ തിളക്കം. പുരുഷ സിംഗിൾസ് ഫൈനലിൽ മലേഷ്യയുടെ നിലവിലെ ചാമ്പ്യൻ എയ്ൻ യോ എൻജിയോട് പൊരുതിത്തോറ്റാണ് ഇന്ത്യൻ താരം അഭയ് സിംഗ് വെള്ളി മെഡൽ സ്വന്തമാക്കിയത്. മത്സരത്തിൽ നേരിട്ടുള്ള ഗെയിമുകൾക്കാണ് മലേഷ്യൻ താരത്തിന്റെ വിജയം (സ്കോർ: 9-11, 5-11, 5-11).

ഈ തോൽവിയോടെ, സ്‌ക്വാഷ് ആദ്യമായി അരങ്ങേറ്റം കുറിക്കുന്ന 2028-ലെ ലോസ് ഏഞ്ചൽസ് ഒളിമ്പിക്‌സിലേക്കുള്ള നേരിട്ടുള്ള യോഗ്യതയാണ് അഭയ്‌ക്ക് നഷ്ടമായത്. ഏഷ്യൻ ഗെയിംസ് സിംഗിൾസിൽ വെള്ളി നേടുന്ന സൗരവ് ഘോഷാലിന് (2014, 2023) ശേഷം ഈ നേട്ടം കൈവരിക്കുന്ന രണ്ടാമത്തെ ഇന്ത്യൻ താരമായി അഭയ് സിംഗ് മാറിയിട്ടുണ്ട്.

ഇഞ്ചോടിഞ്ച് പോരാട്ടം

നഗോയ കിഞ്ചോ ഫ്യൂട്ടോ അരീനയിൽ നടന്ന ആവേശകരമായ മത്സരത്തിൽ മികച്ച തുടക്കമാണ് ഇരുതാരങ്ങളും പുറത്തെടുത്തത്. ആദ്യ ഗെയിമിൽ ഇഞ്ചോടിഞ്ച് പോരാട്ടമാണ് കണ്ടത്.

ഒരുവേള 8-8 എന്ന നിലയിൽ ഒപ്പത്തിനൊപ്പം പിടിച്ചെങ്കിലും, അനുഭവ സമ്പത്ത് മുതലെടുത്ത എയ്ൻ യോ ആദ്യ ഗെയിം 11-9 ന് സ്വന്തമാക്കുകയായിരുന്നു.

രണ്ടാം ഗെയിമിൽ പൂർണ്ണ ആധിപത്യം പുലർത്തിയ മലേഷ്യൻ താരം 11-5 എന്ന സ്കോറിന് അനായാസം വിജയം പിടിച്ചു.

കളിയിലേക്ക് തിരിച്ചുവരാൻ മൂന്നാം ഗെയിമിൽ അഭയ് സിംഗ് ശക്തമായ പോരാട്ടവീര്യം പുറത്തെടുത്തെങ്കിലും (4-2 ന് മുൻപിൽ എത്തിയിരുന്നു), ഒടുവിൽ സമചിത്തത കൈവിടാതെ കളിച്ച എയ്ൻ യോ 11-5 എന്ന സ്കോറിലും മൂന്നാം ഗെയിമും മത്സരവും സ്വന്തമാക്കുകയായിരുന്നു.

ഈ വിജയത്തോടെ എയ്ൻ യോ തന്റെ ഏഷ്യൻ ഗെയിംസ് കിരീടം നിലനിർത്തുകയും ലോസ് ഏഞ്ചൽസ് ഒളിമ്പിക്സ് യോഗ്യത ഉറപ്പാക്കുകയും ചെയ്തു.