വെസ്റ്റ് ഇൻഡീസിനെതിരായ രണ്ടാം ട്വന്റി20 മത്സരത്തിൽ തകർപ്പൻ പ്രകടനം പുറത്തെടുത്ത മലയാളി താരം സഞ്ജു സാംസണെ വാനോളം പുകഴ്ത്തി മുൻ ഇന്ത്യൻ സ്പിന്നർ രവിചന്ദ്രൻ അശ്വിൻ.

തന്റെ യൂട്യൂബ് ചാനലായ ‘ആഷ് കി ബാത്തി’ലൂടെയാണ് സഞ്ജുവിന്റെ കരിയറിനെക്കുറിച്ചും താരത്തിന്റെ മാച്ച് വിന്നിംഗ് മികവിനെക്കുറിച്ചും അശ്വിൻ സംസാരിച്ചത്.

സഞ്ജുവിന്റെ കരിയറിൽ ഒട്ടനവധി ഉയർച്ച താഴ്ചകൾ ഉണ്ടായിട്ടുണ്ടെങ്കിലും, ക്രീസിൽ നിലയുറപ്പിച്ചാൽ ഒറ്റയ്ക്ക് മത്സരം ജയിപ്പിക്കാൻ സാധിക്കുന്ന വിരളം ചില കളിക്കാരിൽ ഒരാളാണ് അദ്ദേഹമെന്ന് അശ്വിൻ വ്യക്തമാക്കി.

സഞ്ജുവിന്റെ കരിയറിനെക്കുറിച്ച് അശ്വിന്റെ വാക്കുകൾ:

“ചില കളിക്കാർക്ക് വളരെ എളുപ്പമുള്ള കരിയർ യാത്രയായിരിക്കും ലഭിക്കുക, എന്നാൽ മറ്റുള്ളവർക്ക് അത് കൂടുതൽ ബുദ്ധിമുട്ട നിറഞ്ഞതായിരിക്കും.

സഞ്ജു സാംസൺ തന്റെ യാത്രയിൽ നിരവധി ഉയർച്ച താഴ്ചകൾ നേരിട്ട ഒരു കളിക്കാരനാണ്. എന്നാൽ സത്യം പറഞ്ഞാൽ, എപ്പോൾ വേണമെങ്കിലും ഒറ്റയ്ക്ക് മത്സരങ്ങൾ വിജയിപ്പിച്ചു നൽകാൻ കഴിയുന്ന തരത്തിലുള്ള അപൂർവ്വ പ്രതിഭയാണ് അദ്ദേഹം,” അശ്വിൻ പറഞ്ഞു.

പവർപ്ലേയിലെ തന്ത്രങ്ങളും സഞ്ജുവിന്റെ തിരിച്ചുവരവും

മത്സരത്തിന്റെ തുടക്കത്തിൽ റൺ കണ്ടെത്താൻ പാടുപെട്ട സഞ്ജുവിന്, വിൻഡീസ് ക്യാപ്റ്റൻ ഷായ് ഹോപ്പ് വരുത്തിയ പിഴവാണ് വഴിത്തിരിവായതെന്നും അശ്വിൻ ചൂണ്ടിക്കാട്ടി.

പവർപ്ലേയിൽ അകേൽ ഹൊസൈനെ തുടർച്ചയായി മൂന്ന് ഓവറുകൾ എറിയിച്ചത് വിശക്കുന്ന സിംഹത്തിന് ആടിനെ ഒരു തളികയിൽ വിളമ്പുന്നത് പോലെയുള്ള അബദ്ധമാണെന്ന് അദ്ദേഹം വിശേഷിപ്പിച്ചു.

ആ അവസരം കൃത്യമായി മുതലെടുത്ത സഞ്ജു അകേൽ ഹൊസൈനെ ആക്രമിച്ചു കളിച്ച് (തുടർച്ചയായ നാല് ബൗണ്ടറികൾ ഉൾപ്പെടെ) ആത്മവിശ്വാസം വീണ്ടെടുക്കുകയും, 41 പന്തിൽ 82 റൺസ് നേടി ഇന്ത്യയെ 249/5 എന്ന കൂറ്റൻ സ്കോറിലെത്തിക്കാൻ സഹായിക്കുകയും ചെയ്തു.

“സ്വയം സംരക്ഷണമല്ല, സഞ്ജു ടീമിനാണ് മുൻഗണന നൽകുന്നത്”

തുടർച്ചയായ പരാജയങ്ങൾക്ക് ശേഷം ടീമിൽ സ്ഥാനം നിലനിർത്താൻ സമ്മർദ്ദത്തിലായിരുന്നിട്ടും സഞ്ജു കാണിച്ച നിസ്വാർത്ഥമായ മനോഭാവത്തെ അശ്വിൻ പ്രത്യേകം അഭിനന്ദിച്ചു:

“മോശം ഫോമിലൂടെ കടന്നുപോകുമ്പോൾ സ്വന്തം വിക്കറ്റ് സംരക്ഷിച്ച് കളിക്കുകയെന്നതാണ് ഏതൊരു മനുഷ്യന്റെയും സ്വാഭാവിക രീതി. എന്നാൽ സഞ്ജു തന്റെ വ്യക്തിഗത സ്കോറിന് മുൻഗണന നൽകാതെ ടീമിനായി റിസ്കുകൾ ഏറ്റെടുക്കുന്നത് തുടരുകയാണ്. അത്തരം പോസിറ്റീവായ മനോഭാവമാണ് ഭാഗ്യം അദ്ദേഹത്തിന്റെ വഴിക്ക് കൊണ്ടുവരുന്നത്.”

മത്സരത്തിൽ ഇന്ത്യ പരാജയപ്പെട്ടെങ്കിലും, സഞ്ജുവിന്റെ ഈ കിടിലൻ ഫോമും പ്രകടനവും പരമ്പരയിലെ വരാനിരിക്കുന്ന മത്സരങ്ങളിൽ ഇന്ത്യൻ ടീമിന് വലിയ ആത്മവിശ്വാസമാണ് നൽകുന്നത്.