ന്യൂസിലൻഡിനെതിരായ നാലാം ഏകദിനത്തിൽ ഇന്ത്യയ്ക്ക് വമ്പൻ തോൽവി. മൗണ്ട് മൗംഗനുയിയിലെ ബേ ഓവലിൽ നടന്ന മത്സരത്തിൽ 244 റൺസിന്റെ കൂറ്റൻ പരാജയമാണ് ഇന്ത്യ നേരിട്ടത്. 334 റൺസ് വിജയലക്ഷ്യം പിന്തുടർന്നിറങ്ങിയ ഇന്ത്യൻ ബാറ്റിംഗ് നിര, മാറ്റ് ഹെന്റിയുടെ മാരക ബൗളിംഗിന് മുന്നിൽ തകർന്ന് വെറും 26.4 ഓവറിൽ 89 റൺസിന് പുറത്തായി.

ഹെൻറി ആറ് വിക്കറ്റ് നേടിയാണ് ഇന്ത്യയെ വീഴ്ത്തിയത്. രോഹിത് ശർമ്മ, വിരാട് കോലി, ശ്രേയസ് അയ്യർ എന്നിവരെ ആദ്യ ഓവറിൽ തന്നെ പുറത്താക്കിയ ഹെന്റി മത്സരത്തിന്റെ ഗതി പൂർണ്ണമായും മാറ്റിമറിച്ചു. പിന്നീട് ഇഷാൻ കിഷൻ, കുൽദീപ് യാദവ്, ഗൂർനൂർ ബ്രാർ എന്നിവരെക്കൂടി വീഴ്ത്തിയ ഹെൻറി കിവീസിന് വിജയം സമ്മാനിച്ചു.

ആദ്യ ഓവറിലാണ് ഹെൻറി മൂന്ന് വിക്കറ്റുകളും നേടിയത്. ഏകദിനത്തിൽ ഒരു മത്സരത്തിന്റെ ആദ്യ ഓവറിൽ തന്നെ മൂന്നോ അതിലധികമോ വിക്കറ്റുകൾ നേടുന്ന മൂന്നാമത്തെ താരമാണ് ഹെൻറി.

ഷോൺ പൊള്ളാക്ക്, ചാമിന്ദ വാസ് എന്നിവരാണ് ഇതിനുമുമ്പ് ആദ്യ ഓവറിൽ മൂന്നിലധികം നേടിയത്. ഷോൺ പൊള്ളാക്ക് 1997ൽ പാകിസ്ഥാനെതിരെ ആദ്യ ഓവറിൽ നാല് വിക്കറ്റുകൾ നേടിയപ്പോൾ വാസ് 2003ൽ ബംഗ്ലാദേശിനെതിരെ മൂന്ന് വിക്കറ്റുകളും വീഴ്ത്തി.

ആദ്യം ബാറ്റ് ചെയ്ത ന്യൂസിലൻഡ് 108 പന്തിൽ 125 റൺസ് നേടിയ വിൽ യങ്, 58 റൺസ് നേടിയ ടീം സീഫെർട്ട് എന്നിവരുടെ മികവിലാണ് 50 ഓവറിൽ 334 റൺസെന്ന ശക്തമായ സ്കോർ പടുത്തുയർത്തിയത്.

നവംബർ 17നാണ് പരമ്പരയിലെ അവസാന പോരാട്ടം. നിലവിൽ 2-1ന് ഇന്ത്യ പരമ്പരയിൽ മുന്നിലാണെങ്കിലും അവസാന മത്സരം വിജയിച്ചാൽ ന്യൂസിലാൻഡിന് പരമ്പര സമനിലക്കാൻ സാധിക്കും.

The post ഏകദിനത്തിലെ മൂന്നാമത്തെ എറിഞ്ഞുവീഴ്ത്തൽ; ചരിത്രമെഴുതി ഹെൻറി appeared first on Chandrika Daily.