പീരുമേട്: മണ്ഡല-മകരവിളക്ക് മഹോത്സവത്തിന് നാളുകള്‍ മാത്രം ബാക്കിനില്‍ക്കെ, പ്രധാന തീര്‍ത്ഥാടന പാതയായ ദേശീയപാത 183-ല്‍ ഒരുവിധ മുന്നൊരുക്കങ്ങളും നടക്കാത്തതില്‍ പ്രതിഷേധം ശക്തമാകുന്നു. തമിഴ്നാട്ടില്‍ നിന്നും മറ്റ് അയല്‍സംസ്ഥാനങ്ങളില്‍ നിന്നും എത്തുന്ന ലക്ഷക്കണക്കിന് ശബരിമല തീര്‍ത്ഥാടകര്‍ കടന്നുപോകുന്ന പ്രധാന പാതയാണിത്. എന്നാല്‍, സീസണ്‍ ആരംഭിക്കാന്‍ ദിവസങ്ങള്‍ മാത്രം ശേഷിക്കെ റോഡിലെ കുഴികള്‍ അടയ്‌ക്കാനോ ടാറിംഗ് നടത്താനോ അധികൃതര്‍ തയ്യാറായിട്ടില്ല.
പാതയുടെ ഭൂരിഭാഗം സ്ഥലങ്ങളിലും കൂറ്റന്‍ കുഴികളും റോഡിന്റെ വശങ്ങള്‍ തകര്‍ന്നു കിടക്കുന്ന അവസ്ഥയുമാണ്. മഴ പെയ്ത് വെള്ളം കെട്ടിക്കിടക്കുന്നതിനാല്‍ കുഴികളുടെ ആഴം അറിയാതെ ഇരുചക്രവാഹനങ്ങളും ചെറുവാഹനങ്ങളും അപകടത്തില്‍പ്പെടുന്നത് പതിവായിട്ടുണ്ട്. രാത്രികാലങ്ങളില്‍ ആവശ്യത്തിന് തെരുവ് വിളക്കുകളോ മുന്നറിയിപ്പ് ബോര്‍ഡുകളോ ഇല്ലാത്തത് അപകടസാധ്യത ഇരട്ടിയാക്കുന്നു.
മണ്ഡലകാലത്തിന് മുന്നോടിയായി നടക്കേണ്ട റോഡ് നവീകരണ പ്രവര്‍ത്തനങ്ങളോ അടിസ്ഥാന സൗകര്യ വികസനങ്ങളോ ഇതുവരെ ആരംഭിച്ചിട്ടില്ല. അധികൃതരുടെ ഈ ഗുരുതരമായ വീഴ്ച കാരണം തീര്‍ത്ഥാടകരും പ്രദേശവാസികളും ഒരുപോലെ ദുരിതത്തിലായിരിക്കുകയാണ്.
തീര്‍ത്ഥാടന സീസണ്‍ ആരംഭിക്കുന്നതിന് മുന്‍പ് തന്നെ ദേശീയപാതയിലെ കുഴികള്‍ അടച്ച് ടാറിംഗ് പൂര്‍ത്തിയാക്കാനും ആവശ്യമായ സുരക്ഷാ ക്രമീകരണങ്ങള്‍ ഒരുക്കാനും അധികൃതര്‍ അടിയന്തരമായി ഇടപെടണമെന്നാണ് ഭക്തജനങ്ങളുടെയും നാട്ടുകാരുടെയും ആവശ്യം.