ദുബായ് : ആകാശത്ത് മരണത്തെ തോൽപ്പിച്ച് നൂറുകണക്കിന് നിരപരാധികളുടെ ജീവൻ രക്ഷിച്ച ഫ്ലൈദുബായുടെ ക്യാപ്റ്റൻ സ്മിത് മച്ചാറിന് ദുബായിയുടെ അഭിമാനകരമായ ബഹുമതിയായ ഓർഡർ ഓഫ് സായിദ് II, ഫസ്റ്റ് ക്ലാസ് ലഭിച്ചു. പരിക്കേറ്റ കൈയിൽ ബ്രേസുമായി ക്യാപ്റ്റൻ സ്മിത്ത് തന്റെ സംഘത്തോടൊപ്പം ചടങ്ങിൽ എത്തിയപ്പോൾ ഈ യഥാർത്ഥ നായകന്റെ അഭിനിവേശത്തിലും സമർപ്പണത്തിലും എല്ലാവരും അഭിമാനവും ആദരവും കൊണ്ട് നിറഞ്ഞു.

യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ക്യാപ്റ്റൻ മച്ചാറിനെ ആലിംഗനം ചെയ്തു. ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമും ഇരു എമിറേറ്റുകളിലെയും രാജകുടുംബാംഗങ്ങളും പങ്കെടുത്തു. ഫ്ലൈദുബായുടെ ക്യാപ്റ്റനെയും ക്രൂവിനെയും ഈ അവസരത്തിൽ ആദരിച്ചു.

പ്രതിസന്ധി ഘട്ടങ്ങളിൽ അവരുടെ ധൈര്യം, ഉത്തരവാദിത്തബോധം, വേഗത്തിൽ തീരുമാനമെടുക്കൽ എന്നിവ യുഎഇയുടെ വ്യോമയാന മേഖലയിലെ ഉയർന്ന നിലവാരത്തെ പ്രതിഫലിപ്പിക്കുന്നുവെന്ന് ക്രൂ അംഗങ്ങൾക്ക് മെഡലുകൾ സമ്മാനിച്ചുകൊണ്ട് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് പറഞ്ഞു.

യുഎഇയുടെ അഭിമാനകരമായ സിവിലിയൻ സൈനിക ബഹുമതിയാണ് ഓർഡർ ഓഫ് സായിദ് II. രാജ്യത്തിനും സമൂഹത്തിനും അസാധാരണവും ധീരവും മികച്ചതുമായ സംഭാവനകൾ നൽകിയ വ്യക്തികൾക്ക് ഇത് നൽകുന്നത്.

174 യാത്രക്കാരുടെയും ജീവനക്കാരുടെയും ജീവൻ ആകാശത്ത് വെച്ച് രക്ഷപ്പെട്ടു.

സെപ്റ്റംബർ 30 ന് ദുബായിൽ നിന്ന് ടെൽ അവീവിലേക്കുള്ള വിമാനയാത്രയ്‌ക്കിടെ വിമാനം തകർക്കുക എന്ന ലക്ഷ്യത്തോടെ ഒരു ഒമാനി സഹപൈലറ്റ് പെട്ടെന്ന് കോക്ക്പിറ്റിൽ ആക്രമണം നടത്തി. ഈ ഭയാനകമായ സാഹചര്യത്തിൽ,

ഗുരുതരമായി പരിക്കേറ്റിട്ടും, ഇന്ത്യൻ ക്യാപ്റ്റൻ സ്മിത് മച്ചാർ അസാധാരണമായ ധൈര്യവും സമാനതകളില്ലാത്ത മനസ്സാന്നിധ്യവും പ്രകടിപ്പിച്ചു. കഠിനമായ വേദന അനുഭവിച്ചിട്ടും അദ്ദേഹം കോക്ക്പിറ്റ് വാതിൽ തുറന്നു. തുടർന്ന് വേഗത്തിൽ താഴേക്ക് പതിച്ചുകൊണ്ടിരുന്ന വിമാനത്തിൽ ആക്രമണം നടത്തിയ സഹപൈലറ്റിനെ കീഴ്പ്പെടുത്താൻ ക്രൂ അംഗങ്ങൾക്കും യാത്രക്കാർക്കും ഇത് സഹായകമായി. മച്ചാറിന്റെ അവസരോചിതമായ ഇടപെടലിൽ നൂറ് കണക്കിന് യാത്രക്കാർക്കാണ് ജീവൻ തിരിച്ച് കിട്ടിയത്.

അദ്ദേഹത്തിന്റെ ധീരതയെ മാനിച്ച് സ്വാതന്ത്ര്യദിനത്തിൽ ദീപം തെളിയിക്കാൻ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു പ്രധാനമന്ത്രി മോദിയെയും ക്യാപ്റ്റൻ സ്മിത് മച്ചാറിനെയും തന്റെ രാജ്യത്തേക്ക് വിളിക്കുകയും ചെയ്തത് എല്ലാ ഭാരതീയർക്കും അഭിമാനമുണ്ടാക്കിയ നിമിഷമായിരുന്നു.