ചെന്നൈ: തമിഴ്നാട്ടില് എഐഎഡിഎംകെയുടെ നേതൃത്വത്തിലുള്ള എന്ഡിഎ സഖ്യം അധികാരത്തിലെത്തുമെന്ന് എഐഎഡിഎംകെ ജനറല് സെക്രട്ടറി എടപ്പാടി പളനിസ്വാമി. പരസ്യ പ്രചരണത്തിന്റെ അവസാന ദിനമായ ഇന്നലെ സേലം ജില്ലയില് നടന്ന പൊതുയോഗത്തില് സംസാരിക്കുകയായിരുന്നു അദ്ദേഹം.
തമിഴ്നാടിനെയും സംസ്ഥാനത്തെ ജനങ്ങളെയും ചൂഷണം ചെയ്യുന്ന ഒരു കുടുംബത്തിനായുള്ള തെരഞ്ഞെടുപ്പായിരുന്നു ഇതുവരെ നിയമസഭാ തെരഞ്ഞെടുപ്പ്. ഒരു കുടുംബത്തിന് ജീവിക്കാന് വേണ്ടി അവര് എട്ട് കോടി ജനങ്ങളെ ചൂഷണം ചെയ്തു. ഈ കുടുംബവാഴ്ചയും പിന്തുടര്ച്ച രാഷ്ട്രീയവും എഐഎഡിഎംകെയുടെ നേതൃത്വത്തിലുള്ള എന്ഡിഎ സഖ്യം അവസാനിപ്പിക്കുമെന്നും അദ്ദേഹം പറഞ്ഞു.
തമിഴ്നാട്ടില് അനുദിനം കുറ്റകൃത്യങ്ങള് വര്ദ്ധിക്കുകയാണ്. കുറ്റവാളികള്ക്ക് സംരക്ഷണം നല്കുന്നത് ഡിഎംകെ സര്ക്കാരാണ്. അതിനാല് ഈ സര്ക്കാരിനെതിരെ ജനങ്ങള്ക്കിടയില് പ്രതിഷേധം ശക്തമാണ്. ജനങ്ങള് അവരുടെ പ്രതിഷേധം വോട്ടിലൂടെ വ്യക്തമാക്കും. ഇത്തവണ ഡിഎംകെക്ക് 200 സീറ്റുകള് ലഭിക്കുമെന്നാണ് എം.കെ. സ്റ്റാലിന് പറയുന്നത്. എന്നാല് അവര്ക്ക് 20 സീറ്റുകള് ലഭിച്ചാല് തന്നെ അത്ഭുതമാണെന്നും പളനിസ്വാമി പറഞ്ഞു.
തമിഴ്നാട്ടില് സ്ത്രീകള്ക്ക് ലഭ്യമായ നിയമപരമായ അവസരം ഡിഎംകെ തടഞ്ഞു. നിയമപരമായി പാര്ലമെന്റിലും നിയമസഭയിലും സ്ത്രീകള്ക്ക് 33 ശതമാനം സംവരണം ലഭിക്കേണ്ടതായിരുന്നു, പക്ഷേ അവര് അത് തടഞ്ഞു. ഈ അവകാശങ്ങള് കവര്ന്നെടുത്ത പാര്ട്ടി ഡിഎംകെയും കോണ്ഗ്രസുമാണ്. അതിനാല്, സ്ത്രീകള് ചിന്തിക്കേണ്ട സമയമാണിത്. വനിതാ ബില്ലിനെ പരാജയപ്പെടുത്തിയ പാര്ട്ടിയെ ഉചിതമായ പാഠം പഠിപ്പിക്കണമെന്നും അദ്ദേഹം പറഞ്ഞു.