തൃശൂര്: കഴിഞ്ഞ ദിവസം വല്ലച്ചിറ സ്വദേശിനി ബിജി ലിവിന് തൃശൂര് ടൗണിലേക്ക് കുഞ്ഞിന് ആഭരണം വാങ്ങുന്നതിനായി അച്ഛനോടൊപ്പം എത്തിയിരുന്നു. ആഭരണം വാങ്ങി പുറത്തിറങ്ങി അടുത്ത കടയിലേക്ക് കയറിയപ്പോള് തന്റെ കയ്യില് ധരിച്ചിരുന്ന വജ്രം പതിച്ച ബ്രേസ് ലെറ്റ് കാണുന്നില്ല എന്നറിഞ്ഞു. ഏറെ വിലമതിച്ച ബ്രേസ് ലെറ്റ് കാണാതായപ്പോള് ഉടന്തന്നെ അച്ഛനോട് വിവരം പറഞ്ഞ് ജ്വല്ലറിയില് നിന്നും ഷോപ്പിലേക്ക് വന്ന വഴികളില് പലവട്ടം തെരഞ്ഞുനടന്നു.
ആഭരണം കണ്ടുകിട്ടാതായപ്പോള് കടയിലെ സി സി ടി വി പരിശോധിച്ചു. ദൃശ്യങ്ങളില് കടയിലേക്ക് കയറുമ്പോള് ആഭരണമില്ല റോഡില് തന്നെ പോയിക്കാണുമെന്നു കരുതി വീണ്ടും തെരയുകയും പിന്നീട് ഈസ്റ്റ് പോലീസ് സ്റ്റേഷനില് പരാതിനല്കുകയും ചെയ്തു.
പരാതി ലഭിച്ച ഉടനെ ഈസ്റ്റ് പോലീസ് സിവില് പോലീസ് ഓഫീസര് മനീഷ് മോഹനനെ ചുമതലപ്പെടുത്തി സ്ഥലത്തേക്ക് അയച്ചു. സ്ഥലത്തെത്തിയ മനീഷ് മോഹന് ജ്വല്ലറിയിലെ സി സി ടി വി ദൃശ്യങ്ങള് പരിശോധിച്ചപ്പോള് കയ്യില് ആഭരണം കാണുകയും ചെയ്തു. എന്നാല് പുറത്തിറങ്ങുമ്പോഴാണ് ആഭരണം നഷ്ടപെട്ടതെന്ന് മനസ്സിലാക്കി. തിരക്കേറിയ റോഡിലെ ദൃശ്യങ്ങള് ഏറെ ക്ഷമയോടെ സമയമെടുത്ത് പരിശോധിച്ചപ്പോള് ജ്വല്ലറിയില്നിന്നും പുറത്തിറങ്ങിയ ഒരു കസ്റ്റമര് എന്തോ കുനിഞ്ഞെടുക്കുന്നത് മനീഷിന്റെ ശ്രദ്ധയില്പെട്ടു. ഉടന്തന്നെ ജ്വല്ലറിയിലെ ജീവനക്കാരുമായി ബന്ധപ്പെട്ട് അവരെ തിരിച്ചറിഞ്ഞ് വിശദവിവരം പരിശോധിച്ച് ഫോണില് വിളിച്ചു.
കടവല്ലൂരില് നിന്നും ആഭരണമെടുക്കാന് എത്തിയ സ്വദേശി ജ്വല്ലറിയില് നിന്നും പുറത്തിറങ്ങിയപ്പോഴാണ് റോഡില് ഒരു ബ്രേസ് ലെറ്റ് കിടക്കുന്നത് കണ്ടത്. ഇമിറ്റേഷന് ഗോള്ഡ് ആയിരിക്കുമെന്ന് കരുതി അത് എടുക്കുകയും ചെയ്തു. വീട്ടിലെത്തി പരിശോധിച്ചപ്പോള് അതിലെ സ്വര്ണ്ണവും വജ്രവും കണ്ട് ഇമിറ്റേഷന് ഗോള്ഡ് അല്ല എന്ന് തിരിച്ചറിഞ്ഞപ്പോള് പോലീസ് സ്റ്റേഷനില് അറിയിക്കാന് ഇറങ്ങുമ്പോഴാണ് സിവില് പോലീസ് ഓഫീസര് മനീഷിന്റെ ഫോണ് കോള് വരുന്നത്. ഉടന്തന്നെ ആള് സ്റ്റേഷനിലെത്തി ആഭരണം പോലീസിന് കൈമാറുകയും ചെയ്തു.
ഉച്ചകഴിഞ്ഞ് രണ്ടരയോടെയാണ് പോലീസ് സ്റ്റേഷനില് പരാതി ലഭിച്ചത്. മണിക്കൂറുകള്ക്കുള്ളില് അഞ്ചുമണിയോടെ ആഭരണം തിരിച്ചു ലഭിക്കുകയും ചെയ്തു. ബിജി ലിവിനിന് ഏറെ വിലപിടിപ്പുള്ള നഷ്ടപ്പെട്ട ആഭരണം ഇനി കിട്ടാന് സാധ്യതയില്ല എന്നുറപ്പിച്ചിരിക്കുമ്പോഴാണ് ആഭരണം കിട്ടിയിട്ടുണ്ട് എത്രയും വേഗം സ്റ്റേഷനിലെത്തണം എന്ന് മനീഷ് വിളിച്ച് അറിയിക്കുന്നത്. ആഭരണം ഏറ്റുവാങ്ങിയ ബിജി ലിവിന് പോലീസുകാര്ക്ക് ഏറെ നന്ദി അറിയിച്ച് ഏറെ സന്തോഷത്തോടെയാണ് സ്റ്റേഷനില് നിന്നും യാത്രയായത്.