ആഗ്രഹസാഫല്യത്തിനായി പല വഴിപാടുകളും നാം ക്ഷേത്രത്തിൽ സമർപ്പിക്കാറുണ്ട്. അതിൽ പ്രധാനമാണ് ദേവന് അല്ലെങ്കിൽ ദേവിക്ക് നേദ്യമായി സമർപ്പിക്കുന്ന പായസം വഴിപാട്.പായസവഴിപാടിൽ തന്നെ പാല്‍പായസം, എള്ളുപായസം, കടും പായസം എന്നിങ്ങനെ പലതരത്തിലുണ്ട്

ആചാര അനുഷ്ഠാനകളുടെ ഭാഗമായി ഓരോ ദേവനും ദേവിക്കും സമർപ്പിക്കുന്ന നേദ്യങ്ങൾ വിഭിന്നമായിരിക്കും. കടുംപായസ്സമാണ് ദേവി ക്ഷേത്രങ്ങളിൽ പ്രധാനം. ഉണക്കലരിയും ശർക്കരയും നെയ്യും ചേർന്ന ഈ നിവേദ്യത്തിന്റെ കടുത്ത മധുരം കാരണമാണ് കടുംപായസം എന്ന പേര് വന്നത്.

രോഗദുരിതശാന്തിക്കായും പായസം വഴിപാട് സമർപ്പിക്കാറുണ്ട്.കൃഷ്ണന്റെയും വിഷ്ണുഭഗവാന്റെയും ക്ഷേത്രത്തിൽ പാല്‍പായസമാണ്‌ പ്രധാനം. ശനി ദോഷശാന്തിക്കായി ശാസ്താ ക്ഷേത്രങ്ങളിൽ സമർപ്പിക്കുന്ന വഴിപാടാണ് എള്ളുപായസം.മിക്ക ക്ഷേത്രങ്ങളിലെയും പ്രധാന വഴിപാടാണ് ചതുശ്ശതം എന്ന ഇടിച്ചു പിഴിഞ്ഞ പായസം. പേര് സൂചിപ്പിക്കുന്നതുപോലെ 104 നാഴി അരി,104 തേങ്ങ, 104 കലം ശർക്കര, 104 തുടം നെയ്യ്, 104 കദളിപ്പഴം എന്നിവ ചേർത്താണ് ചതുശ്ശതം പായസം തയാറാക്കുന്നത്.