ന്യൂദൽഹി: പാർലമെന്റിന്റെ മൺസൂൺ സമ്മേളനത്തിന്റെ ആദ്യ ദിവസം മുതൽ പ്രതിപക്ഷം സഭയിൽ ബഹളം വയ്ക്കുകയാണ്. ലോക്സഭയിൽ നിരവധി പ്രധാന ബില്ലുകൾ ചർച്ചയില്ലാതെയാണ് പാസായത്. ഈ സാഹചര്യത്തിൽ പാഴാക്കിയ പാർലമെന്റ് സമയത്തിനെതിരെ രാജ്യസഭാ എംപി സ്വാതി മാലിവാൾ പ്രതിപക്ഷത്തിനെതിരെ രംഗത്ത് വന്നു. ഈ മൺസൂൺ സമ്മേളനത്തിൽ വിലയേറിയ പാർലമെന്റ് സമയവും കോടിക്കണക്കിന് നികുതിദായകരുടെ പണവും തുടർച്ചയായി പാഴാക്കി എന്ന് അവർ വിമർശിച്ചു.
മൺസൂൺ സമ്മേളനം നാലാം ആഴ്ചയിലേക്ക് കടന്നിരിക്കുകയാണ്, പക്ഷേ പ്രതിപക്ഷം ഒരു ദിവസം പോലും പാർലമെന്റ് പ്രവർത്തിക്കാൻ അനുവദിച്ചിട്ടില്ല. ഈ സഭയിൽ നിരവധി ആളുകളുടെ പ്രതീക്ഷകൾ അർപ്പിക്കുന്നു. പ്രധാനപ്പെട്ട നിരവധി വിഷയങ്ങൾ ചർച്ച ചെയ്യേണ്ടതായിരുന്നു. എന്നാൽ പ്രതിപക്ഷം ചർച്ചയ്ക്ക് പകരം ബഹളവും മുദ്രാവാക്യം വിളിയും തിരഞ്ഞെടുത്തു എന്ന് സ്വാതി മാലിവാൾ ബുധനാഴ്ച രാജ്യസഭയിൽ പറഞ്ഞു. കൂടാതെ പാർലമെന്റ് ആർപ്പുവിളിക്കാനോ, മേശകളിൽ ഇടിക്കാനോ, കയ്യടിക്കാനോ ഉള്ള വേദിയല്ല. പാർലമെന്റ് പൊതുപ്രശ്നങ്ങൾ ഉന്നയിക്കാനുള്ള വേദിയാണെന്നും അവർ വ്യക്തമാക്കി.
പ്രതിപക്ഷത്തിന് തക്കതായ മറുപടി നൽകി സ്വാതി മാലിവാൾ
ജനങ്ങളുടെ ആശങ്കകൾ ഉന്നയിക്കാനാണ് ഞാൻ പാർലമെന്റിൽ വരുന്നത്. ഈ സമ്മേളനത്തിലുടനീളം പൊതുജനങ്ങളുടെ പ്രശ്നങ്ങൾ ശരിയായി പരിഹരിക്കാൻ കഴിയാത്തതിൽ എനിക്ക് അതിയായ ദുഃഖമുണ്ട്. ജനങ്ങളുടെ ജീവിതം സുഗമമാക്കാൻ ലക്ഷ്യമിടുന്ന ട്രൈബ്യൂണൽ പരിഷ്കരണ ബില്ലിനെക്കുറിച്ചുള്ള ചർച്ചയിൽ ഇന്നലെ പ്രതിപക്ഷം പങ്കെടുത്തില്ല. പൊതുജനങ്ങളെ പ്രതിനിധീകരിച്ച്, ചോദ്യങ്ങൾ ചോദിക്കുകയും, നിർദ്ദേശങ്ങൾ നൽകുകയും ചെയ്യേണ്ട സമയമായിരുന്നു അത്. എന്നാൽ അവർ വീണ്ടും അതേ പാത തിരഞ്ഞെടുത്തു, വെറും ബഹളം സൃഷ്ടിക്കലെന്നും സ്വാതി മാലിവാൾ സഭയിൽ പറഞ്ഞു. കൂടാതെ പാർലമെന്റ് സ്തംഭിച്ചാൽ സർക്കാരിനല്ല, പൊതുജനങ്ങളാണ് കഷ്ടപ്പെടുന്നതെന്നും പ്രതിപക്ഷത്തെ ഉപദേശിച്ചുകൊണ്ട് അവർ പറഞ്ഞു.