മുംബൈ : നാസിക്കിലെ പ്രമുഖ ഐ.ടി കമ്പനിയായ ടാറ്റാ കണ്‍സള്‍ട്ടന്‍സി സര്‍വീസസിന്റെ ഓഫീസിൽ ലൈംഗിക പീഡനവും നിർബന്ധിത മതപരിവർത്തനവും നടന്ന കേസിൽ കൂടുതൽ വെളിപ്പെടുത്തലുകൾ. പ്രതികളിൽ ഒരാൾ മറ്റുള്ളവരെ ഹിന്ദു സ്ത്രീകളെ വിവാഹം കഴിക്കാൻ പ്രേരിപ്പിച്ചതായി ഒരു സാക്ഷി അവകാശപ്പെട്ടു. ഇന്ത്യയിലെ ഏറ്റവും വലിയ സോഫ്റ്റ്‌വെയർ കയറ്റുമതിക്കാരായ കമ്പനിയുടെ ശാഖയിൽ നടന്നതായി പറയപ്പെടുന്ന സംഭവങ്ങളുമായി ബന്ധപ്പെട്ട ഒമ്പത് പരാതികൾ പോലീസ് നിലവിൽ അന്വേഷിച്ചുവരികയാണ്. ഇതുവരെ ആറ് പുരുഷന്മാരും ഒരു സ്ത്രീയും ഉൾപ്പെടെ ഏഴ് ജീവനക്കാരെ അറസ്റ്റ് ചെയ്തിട്ടുണ്ട്. മറ്റൊരു സ്ത്രീ ഒളിവിലാണ്.

“‘ഹിന്ദു പെൺകുട്ടികളെ നിങ്ങളുടെ കാമുകിമാരാക്കി വിവാഹം കഴിക്കൂ’ എന്ന് അവർ എന്നോട് പറയും. ‘നിങ്ങളുടെ മതം മാറ്റൂ’ എന്ന് അവർ എന്നോട് പറയും, അവരുടെ മതത്തെക്കുറിച്ച് സംസാരിക്കും.” – നാസിക് ഓഫീസിൽ ജോലി ചെയ്യുന്ന ഒരു കരാർ ജീവനക്കാരൻ എച്ച്ആർ പങ്കാളിത്തം ആരോപിച്ചുകൊണ്ട് പറഞ്ഞു. കൂടാതെ തങ്ങൾക്ക് ഇതിനായി പണവും നൽകിയിരുന്നു. 2021 മുതൽ ഇത് തുടരുന്നുവെന്നും സാക്ഷി പറയുന്നു. അതേ സമയം തന്നെ കേസിന്റെ അന്വേഷണം തുടരുകയാണ്. എട്ട് വനിതാ ജീവനക്കാർ സമർപ്പിച്ച പരാതികൾ അന്വേഷിക്കാൻ കഴിഞ്ഞ ആഴ്ച ഒരു പ്രത്യേക അന്വേഷണ സംഘത്തെ തന്നെ രൂപീകരിച്ചിട്ടുണ്ട്.

ദുർബലരായ വനിത ജീവനക്കാരെ ലക്ഷ്യം വയ്‌ക്കുന്നു

പോലീസ് വൃത്തങ്ങൾ പറയുന്നതനുസരിച്ച് കമ്പനിയുടെ നാസിക് ബ്രാഞ്ചിൽ നടന്നതായി ആരോപിക്കപ്പെടുന്ന മതപരിവർത്തന ശ്രമങ്ങളും ലൈംഗിക പീഡനവും സംബന്ധിച്ച നടന്നുകൊണ്ടിരിക്കുന്ന അന്വേഷണത്തിൽ ദുർബലരായ വനിത ജീവനക്കാരെ ലക്ഷ്യമിടുന്ന ഒരു രീതി കണ്ടെത്തിയിട്ടുണ്ട്. പരിശീലന സംഘത്തിലെ അംഗങ്ങളും ഒരു എച്ച് ആർ മാനേജരും ഉൾപ്പെടെയുള്ള പ്രതികൾക്ക് പുതുതായി റിക്രൂട്ട് ചെയ്യപ്പെട്ട ജീവനക്കാരെക്കുറിച്ചുള്ള വിശദമായ വിവരങ്ങൾ ഉണ്ടായിരുന്നുവെന്നും സാധ്യതയുള്ള ഇരകളെ തിരിച്ചറിയാൻ അത് ഉപയോഗിച്ചതായി ആരോപിക്കപ്പെടുന്നുവെന്നും അന്വേഷണ ഉദ്യോഗസ്ഥർ വെളിപ്പെടുത്തി.

പരാതിക്കാർ തങ്ങളുടെ മുതിർന്ന സഹപ്രവർത്തകർ മാനസികവും ലൈംഗികവുമായ പീഡനത്തിന് വിധേയരാക്കിയെന്നും മാനവ വിഭവശേഷി വകുപ്പ് തങ്ങളുടെ പരാതികൾ അവഗണിച്ചുവെന്നും അവകാശപ്പെട്ടു. 2022 ഫെബ്രുവരി മുതൽ 2026 മാർച്ച് വരെയാണ് ഈ സംഭവങ്ങൾ നടന്നത്.

വിവാഹ വാഗ്ദാനം നൽകി പീഡിപ്പിച്ചു

പ്രതികളിലൊരാൾ ഒരു ജീവനക്കാരിയെ വിവാഹം കഴിക്കാമെന്ന് വ്യാജ വാഗ്ദാനം ചെയ്ത് പലതവണ ശാരീരിക ബന്ധത്തിൽ ഏർപ്പെട്ടതായും റിപ്പോർട്ടുണ്ട്. കൂടാതെ മറ്റൊരു പ്രതി ഒരു ജീവനക്കാരിയെ അനാവശ്യമായി സ്പർശിക്കുകയും അവരുടെ വ്യക്തിപരവും ദാമ്പത്യപരവുമായ ജീവിതത്തെക്കുറിച്ച് അവഹേളിക്കുന്ന പരാമർശങ്ങൾ നടത്തുകയും ചെയ്തു. ഈ സംഭവങ്ങളെക്കുറിച്ച് പരാതിക്കാരി കമ്പനി മേധാവിയോട് ആവർത്തിച്ച് വാക്കാലുള്ള പരാതികൾ നൽകിയപ്പോൾ, അയാൾ അവരുടെ പരാതികൾ ശ്രദ്ധിച്ചില്ല; പകരം പ്രതിയുടെ പ്രവൃത്തികളെ പ്രോത്സാഹിപ്പിച്ചുവെന്നും പോലീസ് പ്രസ്താവനയിൽ പറഞ്ഞു.