ബെംഗളൂരു: പ്രണയത്തില്‍ നിന്ന് പിന്‍മാറിയതിന് കാമുകന്റെ സഹോദരന്‍ നിയമ വിദ്യാര്‍ഥിനിയെ കുത്തിക്കൊന്നു. 22 വയസ്സുള്ള അമൃത എന്ന നാലാം വര്‍ഷ നിയമ വിദ്യാര്‍ഥിനിയാണ് മരിച്ചത്. ആശുപത്രിയില്‍ ചികിത്സയിലിരിക്കെ ജൂലൈ 15 വൈകുന്നേരത്തോടെയായിരുന്നു മരണം. സംഭവത്തില്‍ യുവതിയുടെ മുന്‍ കാമുനായ ധനുഷ്, ഇയാളുടെ സഹോദരന്‍ സൂര്യ എന്നിവരെ പോലീസ് അറസ്റ്റ് ചെയ്തു.

ബെംഗളൂരു കോടിഹള്ളി എച്ച്എഎല്‍ റോഡില്‍ ജൂലൈ 13-ന് വൈകുന്നേരമാണ് സംഭവം. അമൃതയുടെ വീടിന് സമീപം എത്തിയ പ്രതികള്‍ യുവതിയെ തടഞ്ഞുനിര്‍ത്തി. വാക്കേറ്റം രൂക്ഷമായതോടെ സൂര്യ കൈവശമുണ്ടായിരുന്ന കത്തി ഉപയോഗിച്ച് അമൃതയുടെ നെഞ്ചിലും പുറത്തുമായി നിരവധി തവണ കുത്തുകയായിരുന്നുവെന്നാണ് പോലീസ് പറയുന്നത്. ഗുരുതരമായി പരുക്കേറ്റ അമൃതയെ കുടുംബാംഗങ്ങള്‍ ഉടന്‍ ആശുപത്രിയിലെത്തിച്ചെങ്കിലും ഏകദേശം 48 മണിക്കൂറോളം മരണത്തോട് മല്ലടിച്ച ശേഷം ജൂലൈ 15-ന് മരിച്ചു. ആക്രമണത്തിന് ശേഷം രക്ഷപ്പെടാന്‍ ശ്രമിച്ച സൂര്യയെ സമീപവാസികള്‍ പിടികൂടി പോലീസിന് കൈമാറുകയായിരുന്നു.

സംഭവത്തെക്കുറിച്ച് പോലീസ് പറയുന്നത് ഇങ്ങനെയാണ്. അമൃതയും, കാമുനായ ധനുഷും, ഇയാളുടെ അനിയന്‍ സൂര്യയും ഒരേ നാട്ടുകാരാണ്. പ്രാദേശികമായ മതപരമായ ചടങ്ങുകളില്‍ പങ്കെടുക്കുന്നതിലൂടെയാണ് ഇരു കുടുംബങ്ങളും തമ്മില്‍ പരിചയപ്പെടുന്നത്. തുടര്‍ന്ന് അമൃതയും ധനുഷും തമ്മില്‍ അടുത്ത സൗഹൃദത്തിലാവുകയും പിന്നീട് ഇത് പ്രണയമായി മാറുകയും ചെയ്തു. എന്നാല്‍ ധനുഷ് തന്റെ ഭൂതകാലത്തെക്കുറിച്ചുള്ള സുപ്രധാനമായ ചില കാര്യങ്ങള്‍ ഒളിച്ചുവെച്ചതായി അമൃത കണ്ടെത്തിയതോടെയാണ് ബന്ധത്തില്‍ വിള്ളലുണ്ടായത്. ധനുഷ് വിവാഹമോചിതനും ഒരു കുട്ടിയുടെ പിതാവുമായിരുന്നു എന്ന സത്യം മനസ്സിലാക്കിയ അമൃത, താന്‍ വഞ്ചിക്കപ്പെട്ടതായി തിരിച്ചറിഞ്ഞ് ബന്ധം അവസാനിപ്പിക്കുകയും ധനുഷില്‍ നിന്ന് അകലം പാലിക്കുകയും ചെയ്തു.

തന്റെ ജ്യേഷ്ഠന്റെ പ്രണയം നിരസിച്ച അമൃതയോട് പ്രതികാരം ചെയ്യുമെന്ന് അനിയന്‍ സൂര്യ മുന്‍പ് മുന്നറിയിപ്പ് നല്‍കിയിരുന്നതായി പോലീസ് പറഞ്ഞു. ജൂലൈ 13-ന് അമൃതയുടെ വീട്ടിലെത്തിയ സൂര്യ അവിടെ വെച്ച് തര്‍ക്കത്തില്‍ ഏര്‍പ്പെടുകയും, തുടര്‍ന്ന് കൈയ്യില്‍ കരുതിയിരുന്ന കത്തി ഉപയോഗിച്ച് അമൃതയുടെ നെഞ്ചിലും മുതുകിലും കുത്തിപ്പരിക്കേല്‍പ്പിക്കുകയുമായിരുന്നു.

അറസ്റ്റിലായ ഇരുവരെയും പോലീസ് വിശദമായി ചോദ്യം ചെയ്ത് വരികയാണ്. സഹോദരന്റെ പ്രണയാഭ്യര്‍ത്ഥന തള്ളിയത് കൊണ്ട് മാത്രമാണോ സൂര്യ അമൃതയെ കൊലപ്പെടുത്തിയത് എന്ന സംശയം പോലീസിനുണ്ട്. ഇക്കാര്യത്തില്‍ വിശദമായ പരിശോധന നടത്തുമെന്ന് ബെംഗളൂരു ഈസ്റ്റ് ഡിവിഷന്‍ ഡിസിപി ഡോ. വിക്രം വ്യക്തമാക്കി. സംഭവത്തില്‍ ജെ.ബി.നഗര്‍ പോലീസ് കേസെടുത്ത് അന്വേഷണം തുടങ്ങിയിട്ടുണ്ട്.