കോട്ടയം: യുഡിഎഫിനുള്ളില് തന്നെ പ്രശ്നങ്ങള് രൂക്ഷമായതോടെ പാലാ നഗരസഭയില് ഭരണ പ്രതിസന്ധി. കോണ്ഗ്രസ് കൗണ്സിലര് ബിജു മാത്യൂസ് ഫയലും വാച്ചും മോഷ്ടിച്ചെന്ന് ആരോപിച്ച് നഗരസഭാ അധ്യക്ഷ ദിയ ബിനു പുളിക്കകണ്ടം പൊലീസില് പരാതി നല്കി.എന്നാല് നഗരസഭ അധ്യക്ഷയുടെ പരാതി കൗണ്സിലര് ബിജു മാത്യൂസ് തള്ളി.
വാട്ടര് അതോറിറ്റിയുമായി ബന്ധപ്പെട്ട നിര്ണായക ഫയലും അതില് വച്ചിരുന്ന വാച്ചുമാണ് മോഷണം പോയതെന്നാണ് പരാതി. കൗണ്സിലര് ബിജു മാത്യൂസ് കഴിഞ്ഞ ദിവസം ചെയര്പേഴ്സന്റെ ക്യാബിനില് കയറിയ ശേഷം ആണ് ഫയലും വാച്ചും കാണാതായതെന്നാണ് ആരോപണം.
മുമ്പ് പാലാ നഗരസഭയില് എയര്പോഡ് മോഷണം വിവാദം ഉയര്ന്നത് ശ്രദ്ധ നേടിയിരുന്നു.അന്ന് ആരോപണ വിധേയനായ ആളാണ് കൗണ്സിലര് ബിനു പുളിക്കകണ്ടം. ഇന്ന് വീണ്ടും മോഷണ ആരോപണം ഉയരുമ്പോള് കേസില് പരാതിക്കാരി ബിനു പുളിക്കകണ്ടത്തിന്റെ മകളാണ്.ചെയര്പേഴ്സണ് ദിയ ബിനു പുളിക്കണ്ടം ആണ് പരാതിക്കാരി.
യുഡിഎഫ് പിന്തുണയില് ചെയര്പേഴ്സണ് ആയ സ്വതന്ത്ര അംഗം ദിയാബിനു പുളിക്കകണ്ടം കോണ്ഗ്രസ് കൗണ്സിലര്ക്കെതിരെയാണ് പരാതി നല്കിയെന്നത് കൗതുകം. കഴിഞ്ഞദിവസം യുഡിഎഫ് പാര്ലമെന്ററി പാര്ട്ടി യോഗത്തില് വച്ച് കൗണ്സിലര്മാരായ ബിനു പുളിക്കകണ്ടവും സഹോദരന് ബിജു പുളിക്കകണ്ടവും കയ്യേറ്റം ചെയ്തെന്ന് ആരോപിച്ച് ബിജു മാത്യൂസ് പൊലീസില് പരാതി നല്കിയിരുന്നു. പിന്നാലെയാണ് മോഷണ പരാതി എത്തുന്നത്. കയ്യേറ്റം ചെയ്ത കേസില് മഹസര് തയാറാക്കാന് എത്തിയ പൊലീസുകാര്ക്കൊപ്പം നഗരസഭയില് പോവുക മാത്രമാണ് ചെയ്തതെന്ന് ബിജു മാത്യൂസ് പറഞ്ഞു.
ആരോപണവും പൊലീസ് കേസുമൊക്കെ ആയി യുഡിഎഫിനകത്തെ തമ്മില്പോര് കൂടുതല് രൂക്ഷമാവുകയാണ്. എന്നാല് യുഡിഎഫിലെ മറ്റ് അംഗങ്ങള്ക്ക് യാതൊരു തരത്തിലുള്ള പ്രശ്നങ്ങളില്ലെന്നും ബിജു മാത്യൂസിന്റെ ചില താല്പര്യങ്ങളാണ് എല്ലാത്തിനും കാരണമെന്നും ബിനു പുളിക്കകണ്ടം പ്രതികരിച്ചു.