വിദ്യാര്ഥികളുടെ പ്രശ്നത്തില് പാര്ലമെന്റില് ചര്ച്ച നടത്താമെന്ന സര്ക്കാര് നിലപാട് തള്ളി ലോക്സഭ പ്രതിപക്ഷ നേതാവ് രാഹുല് ഗാന്ധി രംഗത്ത്. കല്പ്പിത സംഭാഷണങ്ങളില് തങ്ങള്ക്ക് താല്പ്പര്യമില്ലെന്ന് രാഹുല് ഗാന്ധി തുറന്നടിച്ചു. വിദ്യാര്ഥികളുടെ വിഷയങ്ങളില് പൊതുവായ ചര്ച്ചയല്ല, മറിച്ച് ജൂണ് 20ന് ഡല്ഹിയില് വിദ്യാര്ഥികള്ക്കെതിരെ നടന്ന പൊലീസ് നടപടിക്ക് ആഭ്യന്തര മന്ത്രി ഉത്തരവിട്ടിരുന്നോ എന്നതിനാണ് പ്രതിപക്ഷത്തിന് വ്യക്തമായ മറുപടി വേണ്ടതെന്നും അദ്ദേഹം ഡല്ഹിയില് വാര്ത്ത സമ്മേളനത്തില് പറഞ്ഞു.
‘മിസ്റ്റര് അമിത് ഷാ പാര്ലമെന്റില് വന്ന് പൊതു കാര്യങ്ങളെക്കുറിച്ച് സംസാരിക്കുമോ എന്നല്ല ഞങ്ങളുടെ ചോദ്യം. ഡല്ഹിയില് യുവാക്കള്ക്കു നേരെയുള്ള പൊലീസ് വെടിവെപ്പിന് ആര് അനുമതി നല്കി എന്നതാണ് ചോദ്യം. ഉത്തരവാദിത്തം ഏറ്റെടുക്കാനും എന്ത് സംഭവിച്ചുവെന്ന് പറയാനും 15 ദിവസമായിട്ടും അവര്ക്ക് ധൈര്യമില്ല. ഈ നടപടിക്ക് അമിത് ഷാ ഉത്തരവിട്ടോ എന്ന് അദ്ദേഹം വ്യക്തമാക്കണം. ഉത്തരവിട്ടെങ്കില് അദ്ദേഹം കുറ്റക്കാരനാണ്’ -രാഹുല് പറഞ്ഞു.
വിദ്യാര്ഥികളുടെ വിഷയത്തില് വിശദമായ ചര്ച്ചയ്ക്ക് സര്ക്കാര് തയ്യാറാണെന്നും പ്രതിപക്ഷം ഉന്നയിക്കുന്ന എല്ലാ വിഷയങ്ങള്ക്കും അമിത് ഷാ മറുപടി നല്കുമെന്നും പാര്ലമെന്ററികാര്യ മന്ത്രി കിരണ് റിജിജുവാണ് അറിയിച്ചത്. ചര്ച്ച തടസ്സപ്പെടുത്താതെ അമിത് ഷായുടെ മറുപടി കേള്ക്കാന് പ്രതിപക്ഷം തയ്യാറാകണമെന്നും അദ്ദേഹം ആവശ്യപ്പെട്ടു. ഡല്ഹിയിലെ പോലീസ് നടപടിയില് പ്രതിഷേധിച്ച് പ്രതിപക്ഷം പാര്ലമെന്റില് പ്രതിഷേധം തുടരുന്നതിനാല് സഭ നടപടികള് സ്തംഭിച്ച പശ്ചാത്തലത്തിലാണ് കിരണ് റിജിജു ഇക്കാര്യം വ്യക്തമാക്കിയത്.