മാവേലിക്കര: കുടുംബത്തില് ഊന്നിയ ഭാരതത്തിന്റെ ധര്മവ്യവസ്ഥ അട്ടിമറിക്കാന് ആസൂത്രിത ശ്രമം നടക്കുന്നതായി മാവേലിക്കര ഉമ്പര്നാട് നരസിംഹ കൂശ്മാണ്ഡ സിദ്ധാശ്രമത്തിലെ സ്വാമി സത്സ്വരൂപാനന്ദ സരസ്വതി പറഞ്ഞു. മാവേലിക്കര വിദ്യാധിരാജ വിദ്യാപീഠത്തില് ആരംഭിച്ച ബാലഗോകുലം ദക്ഷിണ കേരളം വാര്ഷിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. നാളിതുവരെ പുലര്ത്തിയിരുന്ന ജീവിതമൂല്യങ്ങള് നഷ്ടപ്പെട്ടു പോകുന്ന കാലഘട്ടത്തിലൂടെയാണ് നാം കടന്നുപോകുന്നത്.
കുടുംബം എന്ന വ്യവസ്ഥയിലാണ് നമ്മുടെ സംസ്കാരത്തിന്റെ ചലനം ആചാര്യന്മാര് ചിട്ടപ്പെടുത്തിയിരുന്നത്. പ്രപഞ്ചഘടന തന്നെ കുടുംബ സങ്കല്പ്പത്തിലാണ് നിലനില്ക്കുന്നത്. പുതുതലമുറയ്ക്ക് കുടുംബം എന്ന സങ്കല്പ്പം ഇല്ലാതാകുന്നു. അത് വീണ്ടെടുക്കാന് നമ്മള്ക്ക് സാധിക്കണം. സ്വാതന്ത്ര്യം, സ്വകാര്യത എന്നതിന്റെ കാഴ്ചപ്പാടുകള് പോലും മാറിയിരിക്കുന്നു. ലോകഹിതത്തിനായും സമൂഹത്തിന് മാതൃകയായും ജീവിക്കാന് സാധിക്കണമെന്നും സ്വാമി പറഞ്ഞു.
ബാലഗോകുലം സംസ്ഥാന അധ്യക്ഷന് ആര്. പ്രസന്നകുമാര് മുഖ്യപ്രഭാഷണം നടത്തി. വ്യക്തിത്വം ആത്മനിര്ഭരമായിരിക്കണമെന്ന് അദ്ദേഹം പറഞ്ഞു. നേടുന്ന അറിവുകളെല്ലാം നമ്മുടെ നാടിനു വേണ്ടിയാകണം. രാഷ്ട്രം ഒന്നാമത് എന്നതായിരിക്കണം നാം ചിന്തിക്കേണ്ടത്. എന്റെ അറിവും കഴിവും തൊഴിലും നാടിനു വേണ്ടിയായിരിക്കണമെന്ന ചിന്ത ഓരോരുത്തരിലും ഉണ്ടാകണമെന്നും അദ്ദേഹം പറഞ്ഞു.
ദക്ഷിണകേരളം സംസ്ഥാന അധ്യക്ഷന് ഡോ. എന്. ഉണ്ണികൃഷ്ണന് അധ്യക്ഷത വഹിച്ചു. ലഹരി സാമൂഹ്യവിപത്താണെന്നും ഇതിനെതിരെ സമൂഹം ഒറ്റക്കെട്ടായി നീങ്ങണമെന്നും അദ്ദേഹം പറഞ്ഞു. ലഹരിവിപത്തിനെ കുറിച്ച് ബാലഗോകുലം ഒരുപടിമുന്നേ സമൂഹത്തിന് സന്ദേശം നല്കിയിരുന്നു. കുട്ടികള്ക്ക് വഴികാട്ടിയാകാന് മുതിര്ന്നവര്ക്ക് സാധിക്കണമെന്നും അദ്ദേഹം പറഞ്ഞു. ദക്ഷിണകേരളം പൊതുകാര്യദര്ശി ബി.എസ്. ബിജു, ചെങ്ങന്നൂര് ജില്ല ബാലസമിതി അധ്യക്ഷ സിദ്ധി ഉണ്ണി എന്നിവര് സംസാരിച്ചു.
ഇന്ന് രാവിലെ 10ന് പൊതുസഭ എം.ജി. സര്വകലാശാലയില് വൈസ് ചാന്സിലര് ഡോ. ഡി. മാവുത് ഉദ്ഘാടനം ചെയ്യും. ഡോ. എന്. ഉണ്ണികൃഷ്ണന് അധ്യക്ഷനാകും. സംസ്ഥാന ഉപാദ്ധ്യക്ഷന് എന്. ഹരീന്ദ്രന് മുഖ്യപ്രഭാഷണം നടത്തും. ബാലഗോകുലത്തിന്റെ 1202 വര്ഷത്തെ മലയാളം കലണ്ടര് ഡോ. ഡി. മാവൂത് പ്രകാശനം ചെയ്യും. വൈകിട്ട് മൂന്നിനാണ് സമാപന സഭ.