കൊച്ചി: ഫോര്‍ട്ട് കൊച്ചിയില്‍ മദ്യലഹരിയില്‍ മകന്‍ അമ്മയെ ചവിട്ടി കൊലപ്പെടുത്തി. 58കാരനായ മകന്‍ കണ്ണനാണ് അമ്മ ലക്ഷ്മിയെ (78) ക്രൂരമായി മര്‍ദിച്ച് കൊലപ്പെടുത്തിയത്. ഫോര്‍ട്ട് കൊച്ചി അമരാവതിയിലാണ് സംഭവം. കണ്ണനെ പൊലീസ് അറസ്റ്റ് ചെയ്തു
നിരന്തരം മദ്യപിക്കുന്നതിനായി കണ്ണൻ അമ്മ ലക്ഷ്മിയോട് പണം ആവശ്യപ്പെടാറുണ്ടായിരുന്നു. സംഭവദിവസം പകലും ഇയാൾ പണത്തിനായി അമ്മയെ സമീപിച്ചിരുന്നു. എന്നാൽ കയ്യിൽ പണമില്ലെന്ന് പറഞ്ഞ് ലക്ഷ്മി പണം നൽകാൻ തയ്യാറായില്ല. തുടർന്ന് വൈകുന്നേരത്തോടുകൂടി കടുത്ത മദ്യലഹരിയിൽ വീട്ടിലെത്തിയ ഇയാൾ വീണ്ടും അമ്മയുമായി തർക്കത്തിലേർപ്പെടുകയും ക്രൂരമായി മർദ്ദിക്കുകയും ചവിട്ടുകയുമായിരുന്നു. മർദനത്തിൽ ഗുരുതരമായി പരിക്കേറ്റ ലക്ഷ്മി സംഭവസ്ഥലത്തുവെച്ചുതന്നെ മരണപ്പെട്ടു.
വിവരമറിഞ്ഞ ഉടൻ തന്നെ ഫോർട്ട് കൊച്ചി പൊലീസ് സ്ഥലത്തെത്തുകയും പ്രതിയായ കണ്ണനെ കസ്റ്റഡിയിലെടുത്ത് അറസ്റ്റ് നടപടികൾ ആരംഭിക്കുകയും ചെയ്തു. മൃതദേഹം പോസ്റ്റ്‌മോർട്ടത്തിനായി എറണാകുളം ജനറൽ ആശുപത്രിയിലേക്ക് മാറ്റി.