കൊച്ചി: നടന് മമ്മൂട്ടി തമിഴ്നടന് സൂര്യയ്ക്ക് ഭക്ഷണകാര്യങ്ങളെക്കുറിച്ച് നല്കിയ ഉപദേശം കണ്ണുതുറപ്പിക്കുന്ന ഒന്നാണ്. ഭക്ഷണത്തെക്കുറിച്ച് മമ്മൂട്ടി നല്കിയ ഉപദേശങ്ങള് താൻ വ്യക്തിജീവിതത്തില് ഇപ്പോഴും പിന്തുടരാറുണ്ടെന്നും നടൻ സൂര്യ.
ദ് ഹോളിവുഡ് റിപ്പോർട്ടർ ഇന്ത്യയ്ക്ക് നല്കിയ അഭിമുഖത്തിലാണ് താരം മനസ്സ് തുറന്നത്. “ഇഷ്ടമുള്ളതെല്ലാം കഴിക്കാം, എന്നാല് ഇഷ്ടമുള്ളത്ര അളവില് കഴിക്കരുത്”- ഇതായിരുന്നു മമ്മൂട്ടി തനിക്ക് നല്കിയ പ്രധാന ഉപദേശമെന്നും സൂര്യ പറഞ്ഞു. ദിവസവും എട്ട് മുതല് ഒമ്പത് മണിക്കൂർ വരെയുള്ള ഉറക്കം ഒരു കാരണവശാലും ഒഴിവാക്കരുതെന്നും മമ്മൂട്ടി ഉപദേശിച്ചിരുന്നുവത്രെ.
സിക്സ് പാക്ക് ബോഡി ഉണ്ടാക്കലല്ല, സമീകൃതമായ ജീവിതരീതിയിലാണ് ആരോഗ്യം അടങ്ങിയിരിക്കുന്നതെന്നും സൂര്യ പറഞ്ഞു. ഉറക്കം, ഭക്ഷണം, മാനസിക സമ്മർദ്ദം, ജോലി എന്നിവയ്ക്കിടയില് കൃത്യമായ സന്തുലനം ആവശ്യമാണ്. അതുപോലെ വിറ്റാമിൻ ഡി, വിറ്റാമിൻ ബി 12 തുടങ്ങിയ അവശ്യ പോഷകങ്ങള് ശരീരത്തിന് ഉറപ്പുവരുത്തേണ്ടതിന്റെ പ്രാധാന്യത്തെക്കുറിച്ചും സൂര്യ വ്യക്തമാക്കുന്നു.
ഇരുപതുകളില് സിക്സ് പാക്കും മസിലുകളുമായിരുന്നു ഫിറ്റ്നസ് എങ്കില്, ഇപ്പോള് ശരീരത്തിന്റെ ഫ്ലെക്സിബിലിറ്റിക്കും മൊബിലിറ്റിക്കുമാണ് പ്രാധാന്യമെന്നും സൂര്യ പറയുന്നു.