മുകേഷിനെതിരെ ലൈംഗികാരോപണം ഉന്നയിച്ച യുവതി പോക്സോ കേസില്‍ മുന്‍കൂര്‍ ജാമ്യം തേടി ഹൈക്കോടതിയില്‍. മൂവാറ്റുപുഴ പൊലീസ് രജിസ്റ്റര്‍ ചെയ്ത പോക്സോ കേസിലാണ് യുവതിയുടെ മുന്‍കൂര്‍ ജാമ്യാപേക്ഷ. അറസ്റ്റ് തടയണമെന്നും മുന്‍കൂര്‍ ജാമ്യം നല്‍കണമെന്നുമാണ് ഹര്‍ജിയിലെ ആവശ്യം.
ചെന്നൈയിലെത്തിച്ച് ലൈംഗിക അതിക്രമത്തിന് ഇരയാക്കി എന്ന് ബന്ധുവായ പെണ്‍കുട്ടിയുടെ പരാതിയിലാണ് യുവതി മുന്‍കൂര്‍ ജാമ്യം തേടി ഹൈക്കോടതിയിലെത്തിയത്. പെണ്‍കുട്ടിയുടെ ആരോപണം വ്യാജമാണെന്ന് പരാതിക്കാരി പറഞ്ഞു. തനിക്കെതിരെ കേസ് രജിസ്റ്റര്‍ ചെയ്തിട്ടുണ്ടോയെന്ന വിവരാവകാശ അപേക്ഷയ്ക്ക് പൊലീസ് മറുപടി നല്‍കിയില്ലെന്നും യുവതി പറഞ്ഞു.
ബന്ധുവായ പെണ്‍കുട്ടി നല്‍കിയ പരാതിയിലാണ് യുവതിക്കെതിരെ മുവാറ്റുപുഴ പൊലീസ് കേസെടുത്തത്. 16 വയസുള്ളപ്പോള്‍ സെക്സ് മാഫിയക്ക് വില്‍ക്കാന്‍ ശ്രമിച്ചെന്നാണ് പരാതി.
അതേസമയം മുകേഷിനെതിരായ പരാതിയില്‍ മുകേഷിനെ അറസ്റ്റ് ചെയ്ത് ജാമ്യത്തില്‍ വിട്ടിരുന്നു. മുകേഷുള്‍പ്പടെ സിനിമാ മേഖലയിലെ ഏഴ് പേര്‍ക്കെതിരെയാണ് നടി ആരോപണം ഉന്നയിച്ചത്.