പത്തനംതിട്ട: ജില്ലയിലെ നാരങ്ങാനം പഞ്ചായത്തില്‍ യുഡിഎഫും എല്‍ഡിഎഫും കൈകോര്‍ത്ത് അവിശ്വാസ പ്രമേയം കൊണ്ടുവന്നതോടെ ബിജെപിക്ക് പ്രസിഡന്റ് സ്ഥാനം നഷ്ടമായി. 6 അംഗങ്ങളുള്ള യുഡിഎഫ് അവതരിപ്പിച്ച അവിശ്വാസ പ്രമേയത്തെ 2 അംഗങ്ങളുള്ള എല്‍ഡിഎഫ് പിന്തുണച്ചു. അങ്ങിനെ
6നെതിരെ 8 വോട്ടുകള്‍ക്ക് അവിശ്വാസ പ്രമേയം പാസായി. ആകെ 14 വാര്‍ഡുകളുള്ള നാരങ്ങാനം പഞ്ചായത്തില്‍ യുഡിഎഫ് 6,എന്‍ഡിഎ 6, എല്‍ഡിഎഫ് 2 എന്നിങ്ങനെയാണ് കക്ഷിനില.
ബി.ജെ.പി അംഗമായ പ്രസിഡന്റ് വി.വി. പ്രസാദാണ് അവിശ്വാസ പ്രമേയത്തിലൂടെ പുറത്തായത്. ബിജെപിയും യുഡി എഫും തുല്യശക്തികളായതിനാല്‍ നറുക്കെടുപ്പിലൂടെയായിരുന്നു ബിജെപിക്ക് അദ്ധ്യക്ഷ സ്ഥാനം ലഭിച്ചത്. പുതിയ അദ്ധ്യക്ഷ തെരഞ്ഞെടുപ്പിലും ഇടതുപക്ഷം യുഡിഎഫിനെ പിന്തുണക്കേണ്ടിവരും.