ലണ്ടന്‍: ഇംഗ്ലണ്ട് സ്‌ട്രൈക്കര്‍ ബുക്കായോ സാകാ നേടിയ ഗോളിലൂടെ ആഴ്‌സണല്‍ യുവേഫ ചാമ്പ്യന്‍സ് ലീഗ് ഫൈനലില്‍ കടന്നു. അത്‌ലറ്റിക്കോ മാഡ്രിഡ് വെല്ലുവിളിയെ സ്വന്തം എമിറേറ്റ്‌സ് സ്റ്റേഡിയത്തില്‍ നടന്ന രണ്ടാം പാദ സെമിയില്‍ 1-0ന് മറികടന്നു. മാഡ്രിഡിലെ ആദ്യപാദം 1-1 സമനിലയില്‍ തീര്‍ന്നിരുന്നു. 20 വര്‍ഷത്തിന് ശേഷമാണ് ആഴ്‌സണല്‍ ചരിത്രത്തില്‍ രണ്ടാം വട്ടം യൂറോപ്യന്‍ ഫുട്‌ബോള്‍ ഫൈനലിലെത്തിയിരിക്കുന്നത്.

തുടക്കം മുതലേ മികച്ച മുന്നേറ്റം കാഴ്‌ച്ചവച്ച ആഴ്‌സണല്‍ ആദ്യ പകുതി പിരിയുന്നതിന് തൊട്ടുമുമ്പാണ് വിജയഗോള്‍ നേടിയത്. ഗണ്ണേഴ്‌സിന്റെ സൂപ്പര്‍ മിഡ്ഫീല്‍ഡര്‍ ഡെക്ലാന്‍ റൈസ് വലത് ഭാഗത്ത് നിന്ന് തുടങ്ങിയ അത്യുഗ്രന്‍ നീക്കമാണ് ഗോളില്‍ കലാശിച്ചത്. മധ്യവര പിന്നിട്ട് പന്തുമായി വലത് ഭാഗത്ത് കൂടി മുന്നേറിയ റൈസ് ബോക്‌സിന്റെ ഇടത് മൂലയിലേക്ക് ക്രോസ് നല്‍കി. അവിടെ ഇടത് വിങ്ങര്‍ ലിയാന്‍ഡ്രോ ട്രോസാര്‍ഡ് ഓണ്‍ ടാര്‍ജറ്റ് ഷോട്ട് തൊടുത്തു. അത്‌ലറ്റിക്കോ ഗോളി ജാന്‍ ഒബ്ലാക് തടുത്തിട്ടതിനെ തുടര്‍ന്നുണ്ടായ റീബൗണ്ടിനെ ക്ലോസ് റേഞ്ചിലെത്തിയ ബുക്കായോ സാകാ അതിവേഗം ഗോളാക്കുകയായിരുന്നു.

ഇതിന് മുമ്പ് വിഖ്യാത പരിശീലകന്‍ അഴ്‌സേന്‍ വെംഗറുടെ കാലത്താണ് ആഴ്‌സണല്‍ ചാമ്പ്യന്‍സ് ലീഗ് ഫൈനല്‍ കളിച്ചിട്ടുള്ളത്. 2006ല്‍ ബാഴ്‌സയുമായി കലാശപ്പോരിലേര്‍പ്പെട്ടെങ്കിലും പരാജയപ്പെടുകയായിരുന്നു.

30ന് ബുഡാപെസ്റ്റില്‍ ആണ് ഇത്തവണത്തെ ചാമ്പ്യന്‍സ് ലീഗ് ഫൈനല്‍. അതിന് മുമ്പേ ആഴ്‌സണല്‍ മുന്നിട്ടു നില്‍ക്കുന്ന പ്രീമിയര്‍ ലീഗ് ഫുട്‌ബോളിന് തിരശീല വീഴും.