കൊച്ചി: കേസുകളില്‍ വിധിയെഴുതാനോ തീര്‍പ്പില്‍ എത്താനോ എ.ഐ. സാങ്കേതികവിദ്യ ഉപയോഗിക്കരുതെന്നു ജഡ്‌ജിമാര്‍ക്കു ഹൈക്കോടതിയുടെ കര്‍ശന നിര്‍ദേശം. ഇതുസംബന്ധിച്ച മാര്‍ഗനിര്‍ദേശങ്ങളും പുറപ്പെടുവിച്ചു. കേസുകളിലെ കണ്ടെത്തലുകള്‍, ഉത്തരവുകള്‍, വിധി തീര്‍പ്പ്‌ എന്നിവയില്‍ എത്താന്‍ ഒരു കാരണവശാലും എ.ഐ. ടൂളുകള്‍ ഉപയോഗിക്കരുത്‌. ചാറ്റ്‌ ജി.പി.ടി, ഡീപ്‌ സീക്ക്‌ പോലുള്ളവയുടെ ഉപയോഗം പാടില്ല. എ.ഐ. ടൂള്‍ ഉപയോഗിച്ച്‌ നിയമപരമായ കുറിപ്പുകളോ മറ്റോ വിവര്‍ത്തനം ചെയ്‌താല്‍ അവ ജഡ്‌ജിമാര്‍ സ്വയം പരിശോധിക്കണം. കേസുകളുടെ ഷെഡ്യൂള്‍ ചെയ്യല്‍ പോലുള്ള ഭരണപരമായ ജോലികള്‍ക്ക്‌ അംഗീകൃത എ.ഐ. ഉപകരണങ്ങള്‍ ഉപയോഗിക്കാം. ഇതില്‍ മനുഷ്യമേല്‍നോട്ടം ആവശ്യമാണ്‌. കേസുകളുടെ റഫറന്‍സിനും മറ്റും ഹൈക്കോടതിയോ സുപ്രീം കോടതിയോ അംഗീകരിച്ച എ.ഐ. ടൂളുകള്‍ മാത്രം കര്‍ശന ഉപാധികളോടെ ഉപയോഗിക്കാം. എ.ഐ. ഉപയോഗത്തിലും സുതാര്യത, നീതി, ഉത്തരവാദിത്വം എന്നിവ ന്യായാധിപന്‍ ഉറപ്പാക്കണമെന്നും ഹൈക്കോടതി നിര്‍ദേശങ്ങളിലുണ്ട്‌.