തൃശൂര്: സംസ്ഥാനത്തെ അതിരൂക്ഷമായ വൈദ്യുതി പ്രതിസന്ധി ആരോഗ്യ-വ്യവസായ മേഖലകളില് ഗുരുതര പ്രത്യാഘാതം ഉണ്ടാക്കുന്നു. സര്ക്കാര് മെഡിക്കല് കോളജുകളില് അടിയന്തര ശസ്ത്രക്രിയകള് പോലും മാറ്റിവയ്ക്കുന്ന സാഹചര്യമാണ്. മെഡിക്കല് കോളജുകള് ഉള്പ്പെടെ ആരോഗ്യ മേഖലയിലെ സ്ഥാപനങ്ങളില് വൈദ്യുതി മുടങ്ങാതിരിക്കാന് പ്രത്യേക പരിഗണന നല്കുന്നുണ്ടെന്ന് കെഎസ്ഇബി അവകാശപ്പെടുമ്പോഴും ഗ്രിഡിലെ പ്രതിസന്ധി മൂലം പലപ്പോഴും വിതരണം തകരാറിലാകുന്നുണ്ട്. ഇതുമൂലം മണിക്കൂറുകള് നീണ്ടുനില്ക്കുന്ന സങ്കീര്ണമായ ശസ്ത്രക്രിയകള് ചെയ്യാന് ബുദ്ധിമുട്ടുണ്ടെന്ന് ഡോക്ടര്മാര് പറഞ്ഞു.
ദീര്ഘനേരം നീണ്ടുനില്ക്കുന്ന ശസ്ത്രക്രിയകള് വൈദ്യുതി പ്രതിസന്ധി മൂലം മാറ്റിവയ്ക്കുകയാണ് മിക്കയിടത്തും. തൃശൂര് ഗവ. മെഡിക്കല് കോളജില് രണ്ടാഴ്ചയ്ക്കിടെ ഒട്ടേറെ ശസ്ത്രക്രിയകള് മാറ്റിവച്ചു. ഒരുമാസം കഴിഞ്ഞുള്ള തീയതികളാണ് നല്കിയിട്ടുള്ളതെന്ന് രോഗികളും ബന്ധുക്കളും പറയുന്നു. എന്നാല് വൈദ്യുതി പ്രതിസന്ധി മൂലമാണ് ശസ്ത്രക്രിയകള് മാറ്റുന്നതെന്ന് മെഡി. കോളജ് അധികൃതര് സമ്മതിക്കുന്നില്ല. ഐസിയു, എമര്ജന്സി വാര്ഡുകളില് പോലും വൈദ്യുതി വിതരണത്തില് തടസമുണ്ടാകുന്നുണ്ട്. കടുത്ത ചൂട് ആയതിനാല് മറ്റ് വാര്ഡുകളിലും രോഗികള്ക്കും കൂട്ടിരിപ്പുകാര്ക്കും വൈദ്യുതി മുടങ്ങുങ്ങുന്നത് വലിയ ബുദ്ധിമുട്ടാകുന്നുണ്ട്.
വ്യവസായ മേഖലയേയും വൈദ്യുതി പ്രതിസന്ധി ഗുരുതരമായി ബാധിച്ചിട്ടുണ്ട്. തൃശൂര് ജില്ലയിലെ പ്രമുഖ ടയര് നിര്മാണ കമ്പനിയിലെ ഉത്പാദനം മൂന്നില് രണ്ടായി കുറഞ്ഞു. ചെറുകിട വ്യവസായ രംഗത്താണ് പ്രതിസന്ധി രൂക്ഷം. വര്ക്ക്ഷോപ്പുകള്, സ്വയം തൊഴില് സംരംഭങ്ങള് എന്നിവയ്ക്ക് വലിയ പ്രതിസന്ധിയാണ് വൈദ്യുതി ക്ഷാമം സൃഷ്ടിച്ചിട്ടുള്ളത്. ഇനിയും കൂടുതല് നിയന്ത്രണങ്ങളും അപ്രഖ്യാപിത കട്ടും വന്നാല് പ്രതിസന്ധി രൂക്ഷമാകും.