ക്രൈസ്റ്റ്ചര്‍ച്ച്: ന്യൂസിലൻഡിനെതിരായ അഞ്ച് മത്സരങ്ങളുടെ ടി20 പരമ്പരയ്ക്ക് മുന്നോടിയായി യുവതാരം വൈഭവ് സൂര്യവംശിയെ പ്ലേയിംഗ് ഇലവനില്‍ ഉൾപ്പെടുത്തുന്നതുമായി ബന്ധപ്പെട്ട് നിലപാട് വ്യക്തമാക്കി ഇന്ത്യൻ ക്യാപ്റ്റൻ ശ്രേയസ് അയ്യർ.
ടീമിൽ ഇടംനേടിയ ഉടൻ തന്നെ നേരിട്ട് പ്ലേയിംഗ് ഇലവനിൽ അവസരം ലഭിക്കുക എന്നത് വൈഭവിന് എളുപ്പമല്ലെന്നും, തന്റെ കരിയറിലെ അവസരത്തിനായി താരം കുറച്ചുകൂടി കാത്തിരിക്കേണ്ടതുണ്ടെന്നും ആദ്യ ടി20 മത്സരത്തിന് മുന്നോടിയായുള്ള വാർത്താസമ്മേളനത്തിൽ ശ്രേയസ് വ്യക്തമാക്കി.
യുവതാരത്തിന് പിന്തുണയും ഉപദേശവും
“വൈഭവ് വളരെ ചെറുപ്പമാണ്, നീണ്ടൊരു കരിയർ അവന്റെ മുന്നിലുണ്ട്. ഇത്രയും ചെറിയ പ്രായത്തിൽ തന്നെ മികച്ചൊരു പ്രതിഭ ഡ്രസ്സിങ് റൂമിന്റെ ഭാഗമാവുക എന്നതും അവിടെ സന്തോഷവാനായിരിക്കുക എന്നതും പ്രധാനമാണ്.
നിലവിൽ ടീമിലെത്തിയ ഉടൻ അവന് പ്ലേയിംഗ് ഇലവനിലേക്ക് നേരിട്ട് കടന്നുവരാനാകില്ല. കാരണം, നമ്മുടെ ഇപ്പോഴത്തെ ഓപ്പണർമാർ മികച്ച പ്രകടനം പുറത്തെടുക്കുന്നവരും ഇന്ത്യക്കായി മികച്ച സംഭാവനകൾ നൽകിയവരുമാണ്,” ശ്രേയസ് അയ്യർ വ്യക്തമാക്കി.
വിദേശ പര്യടനങ്ങളിൽ ടീമിനൊപ്പം സഞ്ചരിക്കുന്നത് വഴി അവിടത്തെ പിച്ചിന്റെ സ്വഭാവത്തെയും കാലാവസ്ഥയെയും കുറിച്ച് വൈഭവിന് കൃത്യമായ ധാരണ ലഭിക്കുമെന്നും, ഭാവിയിൽ ടീമിനായി കളത്തിലിറങ്ങുമ്പോൾ ഇത് അവനെ പൂർണ്ണ സജ്ജനാക്കുമെന്നും അദ്ദേഹം കൂട്ടിച്ചേർത്തു.
സഞ്ജു സാംസൺ, അഭിഷേക് ശർമ്മ എന്നിവരടങ്ങുന്ന ഓപ്പണിങ് സഖ്യത്തിന് മാനേജ്‌മെന്റിന്റെ പൂർണ്ണ പിന്തുണയുണ്ടെന്നും, വൈഭവിനെ ഘട്ടം ഘട്ടമായി മാത്രമേ ടീമിലേക്ക് പൂർണ്ണമായി ഉൾപ്പെടുത്തുകയുള്ളൂവെന്നും ശ്രേയസ് സൂചിപ്പിച്ചു.
ബാറ്റിങ് ഓർഡറിലെ ഫ്ലെക്സിബിലിറ്റിയെക്കുറിച്ച്
ടീമിലെ ബാറ്റിങ് ഓർഡറിലെ മാറ്റങ്ങളെക്കുറിച്ചും ക്യാപ്റ്റൻ മനസ് തുറന്നു. ടീമിന്റെയും മത്സര സാഹചര്യങ്ങളുടെയും ആവശ്യാനുസരണം ഏത് പൊസിഷനിലും ബാറ്റ് ചെയ്യാൻ കളിക്കാർ തയ്യാറാകണമെന്ന് അദ്ദേഹം ഓർമ്മിപ്പിച്ചു.
“ടീമിന്റെ ആവശ്യത്തിനനുസരിച്ച് ഫ്ലെക്സിബിൾ ആയി ബാറ്റ് ചെയ്യാൻ താരങ്ങൾ തയ്യാറാകണം. ലഭിക്കുന്ന ബാറ്റിങ് നമ്പർ ഏതുമാകട്ടെ, കളിക്കാർ അതിൽ തൃപ്തരായിരിക്കണം.
ഒരു പ്രത്യേക പൊസിഷനിൽ മാത്രമേ കളിക്കൂ എന്ന് ആർക്കും വാശിപിടിക്കാനാകില്ല. ഉദാഹരണത്തിന്, കഴിഞ്ഞ ലോകകപ്പിൽ ഇഷാൻ കിഷൻ മൂന്നാം നമ്പറിലാണ് ബാറ്റ് ചെയ്തത്.
ടീമിന് വേണ്ടി മുൻനിരയിൽ ബാറ്റ് ചെയ്യാൻ ഞാൻ പോലും എപ്പോഴും നിർബന്ധം പിടിക്കാറില്ല, ഏത് പൊസിഷനിലും കളിക്കാൻ ഞാൻ തയ്യാറാണ്,” ശ്രേയസ് അയ്യർ വ്യക്തമാക്കി.