കൊച്ചി : പിറന്നാൾ ദിവസം ആഭ്യന്തരമന്ത്രി തന്നെ സന്ദർശിച്ചതിനെ വിമർശിക്കുന്ന മട്ടന്നൂർ സിപിഎം എംഎൽഎ വികെ സനോജിന് തക്ക മറുപടിയുമായി ശ്രീജിത്ത് പണിക്കർ . വിഡി സവർക്കറുടെ പിറന്നാൾ ആഘോഷത്തെ പറ്റിയും, അതിന് ചുക്കാൻ പിടിച്ച ഇന്ത്യൻ കമ്യൂണിസ്റ്റ് പ്രസ്ഥാനത്തിന്റെ സ്ഥാപക നേതാക്കളിൽ ഒരാളായ ശാന്താറാം മിറാജ്കറെയും പറ്റിയാണ് ശ്രീജിത്ത് പണിക്കരുടെ പോസ്റ്റ് .
സനോജിന് ധൈര്യമുണ്ടെങ്കിൽ സവർക്കറുടെ പിറന്നാൾ ആഘോഷമാക്കിയതിനും, സവർക്കറെ പ്രശംസിച്ചതിനും മിറാജ്കറെ ഒന്ന് തള്ളിപ്പറയൂ എന്ന വെല്ലുവിളിയും ശ്രീജിത്ത് പണിക്കരുടെ പോസ്റ്റിലുണ്ട്.
ഫേസ്ബുക്ക് കുറിപ്പ്…
എന്നെ പിറന്നാൾ ദിവസം ആഭ്യന്തരമന്ത്രി സന്ദർശിച്ചതിനെ വിമർശിക്കുന്ന മട്ടന്നൂർ സിപിഎം എംഎൽഎ വികെ സനോജിന് ഒരു കഥ പറഞ്ഞു തരാം.
വർഷം 1958. മെയ് മാസം 28. അന്നൊരു പിറന്നാൾ ദിവസമാണ്. വിനായക് ദാമോദർ സവർക്കറിന് 75 വയസ്സ് തികയുന്ന ദിവസം.
അതിന് ദിവസങ്ങൾക്ക് മുൻപ് ബോംബെ മുനിസിപ്പൽ കോർപ്പറേഷൻ അധ്യക്ഷൻ ശാന്താറാം മിറാജ്കർ സവർക്കറെ കണ്ട് ഒരു ആഗ്രഹം അറിയിക്കുന്നു. അദ്ദേഹത്തിന്റെ 75ആം പിറന്നാൾ ദിവസം ബോംബെ കോർപറേഷന്റെ നേതൃത്വത്തിൽ പൗരാവലിയുടെ ഒരു സ്വീകരണം നൽകാൻ താല്പര്യം ഉണ്ടെന്ന്. സവർക്കർ ക്ഷണം സ്വീകരിക്കുന്നു.
തുടർന്ന് ഇക്കാര്യത്തിനായി കോർപ്പറേഷനിൽ ഒരു പ്രമേയം അവതരിപ്പിക്കപ്പെടുന്നു. എതിർപ്പുകളില്ലാതെ അത് പാസാകുന്നു.
പിറന്നാൾ ദിവസമെത്തി. ആഘോഷ പരിപാടികളുടെ വേദി കമലാ നെഹ്റു പാർക്ക്. ആർത്തുവിളിക്കുന്ന ആയിരങ്ങളുടെ ഇടയിലൂടെ സവർക്കർ വേദിയിലേക്ക്.
സവർക്കറെ കുറിച്ച് മിറാജ്കർ ഇങ്ങനെ പ്രസംഗിച്ചു:
“വിപ്ലവാത്മക യാഥാർത്ഥ്യ വാദത്തിന്റെ കവിയായും, ചരിത്രകാരനായും, പണ്ഡിതനായും, വിമർശകനായും, വ്യാഖ്യാതാവായും, അയിത്ത നിർമാർജ്ജനത്തിനായി പോരാടിയ ധീരനായകനായും ലോകം സവർക്കറെ അറിയുന്നു. സ്വാതന്ത്ര്യത്തിനു വേണ്ടി അദ്ദേഹം നടത്തിയ മഹത്തായ പരിശ്രമങ്ങളും, സന്തോഷപൂർവ്വം സഹിച്ച എണ്ണമറ്റ ദുരിതങ്ങളും ത്യാഗങ്ങളും ഭാരത ചരിത്രത്തിലെ തിളക്കമുള്ള മാതൃകയായി എന്നും നിലനിൽക്കും; അവ ലക്ഷക്കണക്കിന് ആളുകളെ തുടർന്നും പ്രചോദിപ്പിക്കും.”
ഇനി ആരാണ് മിറാജ്കർ എന്ന് സനോജിന് പറഞ്ഞുതരാം.
ഇന്ത്യൻ കമ്യൂണിസ്റ്റ് പ്രസ്ഥാനത്തിന്റെ സ്ഥാപക നേതാക്കളിൽ ഒരാൾ.
ബ്രിട്ടീഷുകാർക്കെതിരായ മീററ്റ് ഗൂഢാലോചന കേസിലെ 31 കമ്യൂണിസ്റ്റുകളിൽ പ്രമുഖൻ.
ട്രേഡ് യൂണിയൻ രംഗത്തെ പ്രഗത്ഭ നേതാവ്.
13 വർഷത്തിലധികം AITUC അധ്യക്ഷൻ.
മേൽപറഞ്ഞ കാലയളവിൽ ബോംബെ മേയർ.
1964ലെ കമ്യൂണിസ്റ്റ് പാർട്ടി വിഭജനത്തെ തുടർന്ന് സിപിഎമ്മിൽ.
ധൈര്യവാനെങ്കിൽ മിറാജ്കറെ ഒന്ന് തള്ളിപ്പറയൂ, സനോജ്. ഒന്ന്, സവർക്കറുടെ പിറന്നാൾ ആഘോഷമാക്കിയതിന്. രണ്ട്, സവർക്കറെ പ്രശംസിച്ചതിന്.
കാണട്ടെ മിടുക്ക്