കല്യാണി (ബംഗാള്): സര്ക്കാര് ജീവനക്കാര്ക്ക് കേന്ദ്രത്തിന് തുല്യമായ ആനുകൂല്യങ്ങള് നല്കാന് സംസ്ഥാന സര്ക്കാരുകള് തയാറാകണമെന്ന് ബിഎംഎസ് അഖിലേന്ത്യാ ഉപാദ്ധ്യക്ഷനും സര്ക്കാര് ജീവനക്കാരുടെ അഖിലേന്ത്യാ സംഘടനയായ രാഷ്ട്രീയ രാജ്യകര്മചാരി മഹാസംഘ് പ്രഭാരിയുമായ ഉണ്ണികൃഷ്ണന് ഉണ്ണിത്താന് ആവശ്യപ്പെട്ടു.
രാഷ്ട്രീയ രാജ്യകര്മചാരി മഹാസംഘ് അഖില ഭാരതീയ കാര്യകാരി സമിതി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ബംഗാളിലെ കല്യാണി വിധാന് ചന്ദ്ര കാര്ഷിക സര്വകലാശാലയില് നടന്ന ആര്ആര്കെഎം എസ് അഖിലേന്ത്യ പ്രവര്ത്തക സമിതി യോഗത്തില് പ്രസിഡന്റ് ഗൗരവ് സോണി അദ്ധ്യക്ഷത വഹിച്ചു.
പല സംസ്ഥാനങ്ങളിലും ശമ്പള കമ്മിഷന് നടപ്പിലാക്കേണ്ട കാലഘട്ടം കഴിഞ്ഞുവെങ്കിലും കമ്മിഷന് അംഗങ്ങളെ പോലും നിശ്ചയിച്ചിട്ടില്ലെന്ന് ഉണ്ണികൃഷ്ണന് ഉണ്ണിത്താന് പറഞ്ഞു. പല സംസ്ഥാനങ്ങളിലും വിരമിക്കല് പ്രായം വ്യത്യസ്തമാണ്. വിരമിക്കല് പ്രായം 62 വയസായി എല്ലാ സംസ്ഥാനങ്ങളും ഏകീകരിക്കണം. പെന്ഷന് ആനുകൂല്യങ്ങള് മെഡിക്കല് ആനുകൂല്യങ്ങള് എന്നിവ ഗുരുതരമായ പ്രതിസന്ധിയിലാണ്. കരാര് നിയമനം വ്യാപകമാകുന്നു. ഈ സാഹചര്യങ്ങള്ക്ക് അറുതിവരുത്തണം. ഇതിനായി നിയമനിര്മാണം കേന്ദ്ര സര്ക്കാര് നടപ്പിലാക്കണം. എട്ടാം ശമ്പളപരിഷ്കരണം എല്ലാ സംസ്ഥാനങ്ങളും അംഗീകരിക്കത്തക്ക തരത്തിലുള്ള നിയമങ്ങള് കേന്ദ്ര സര്ക്കാര് നിയമ നിര്മ്മാണത്തിലൂടെ നടപ്പിലാക്കാന് തയാറാകണമെന്നും ഉണ്ണികൃഷ്ണന് ഉണ്ണിത്താന് ആവശ്യപ്പെട്ടു.
കേരളത്തില് നിന്നും പ്രതിനിധികളായി ഫെറ്റോ ജനറല് സെക്രട്ടറി ജെ. മഹാദേവന്, എന്ജിഒ സംഘ് ട്രഷറര് സജീവന് ചാത്തോത്ത് എന്നിവര് പങ്കെടുത്തു. ബിഎംഎസ് അഖിലേന്ത്യാ സംഘടന സെക്രട്ടറി ഗണേശ് മിശ്ര, കേന്ദ്ര സര്ക്കാര് സെക്ടര് പ്രഭാരി എം.പി. സിംഗ്, രാഷ്ട്രീയ രാജ്യ കര്മ്മചാരി മഹാസംഘ് ജനറല് സെക്രട്ടറി രാജേന്ദ്രകുമാര് ശ്രീവാസ്തവ, എംഎല്എമാരായ അസീം സര്ക്കാര്, ബംങ്കിങ് ചന്ദ്രഘോഷ്, ബിഎംഎസ് ബംഗാള് സ്റ്റേറ്റ് ജനറല് സെക്രട്ടറി ദേവാഷി ഭട്ടാചാര്യ, രാഷ്ട്രീയ രാജ്യ കര്മ്മ ചാരി ബംഗാള് സ്റ്റേറ്റ് ജനറല് സെക്രട്ടറി ആശിഷ് ചന്ദ്രോപാദ്ധ്യായ, പ്രസിഡന്റ് അനുപം സര്ക്കാര് എന്നിവര് സംസാരിച്ചു.