കോക്ക്‌റോച്ച് ജനതാ പാര്‍ട്ടി (സി.ജെ.പി) നേതാക്കളായ സൗരവ്, അശു, അജിങ്ക്യ എന്നിവരെ ഡല്‍ഹി പോലീസ് നിയമവിരുദ്ധമായി തടങ്കലില്‍ വെച്ചിരിക്കുകയാണെന്നും വക്കീലന്മാരെ കാണാന്‍ അനുവദിക്കുന്നില്ലെന്നും പാര്‍ട്ടി സ്ഥാപകന്‍ അഭിജിത് ദീപകെ ആരോപിച്ചു.
പാര്‍ട്ടി നേതാക്കളെ നിയമവിരുദ്ധമായി കസ്റ്റഡിയില്‍ വെച്ചതിനെ ചോദ്യം ചെയ്ത് അഭിജിത് ദീപകെ എക്‌സ് (X) പ്ലാറ്റ്ഫോമില്‍ പോസ്റ്റ് ചെയ്തു. നിയമോപദേശം തേടാനുള്ള അവകാശമാണ് ഇവിടെ നിഷേധിക്കപ്പെടുന്നതെന്നും അദ്ദേഹം കുറ്റപ്പെടുത്തി. സി.ജെ.പി നേതാക്കള്‍ ഇപ്പോഴും നിയമവിരുദ്ധ തടവിലാണെന്നും, ഡല്‍ഹി പോലീസ് കേന്ദ്ര ആഭ്യന്തരമന്ത്രിയുടെ ‘തടവുകാരായി’ മാറിയെന്നും അദ്ദേഹം മറ്റൊരു പോസ്റ്റില്‍ ആരോപിച്ചു.
മുഖ്യ തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് സി.ജെ.പി അംഗങ്ങളും പിന്തുണയ്ക്കാരും നടത്തിവരുന്ന പ്രതിഷേധങ്ങളുടെ പശ്ചാത്തലത്തിലാണ് ഈ സംഭവവികാസങ്ങള്‍. കസ്റ്റഡിയെക്കുറിച്ചുള്ള മറ്റ് വിവരങ്ങളോ പോലീസിന്റെ പ്രതികരണമോ ഇതുവരെ വ്യക്തമായിട്ടില്ല.