ഏഷ്യൻ ഗെയിംസില്‍ പുരുഷന്മാരുടെ ലോങ് ജംപില്‍ മലയാളി താരം എം. ശ്രീശങ്കറിന് വെള്ളി. 8.07 മീറ്റർ ചാടിയാണ് ശ്രീശങ്കറിന്റെ നേട്ടം. രണ്ടാം ചാട്ടത്തില്‍ തന്നെ ശ്രീശങ്കര്‍ വെള്ളിയിലേക്കുള്ള ദൂരം കുറിച്ചിരുന്നു. എന്നാല്‍, നാലാം ചാട്ടത്തിൽ പരിക്കേറ്റതിനെ തുടര്‍ന്ന് താരം പിന്മാറി. ചൈനയുടെ ഷി യുഹാവുവിനാണ് (8.17 മീറ്റര്‍) സ്വർണം. 8.06 മീറ്റര്‍ ചാടി ഉസ്‌ബെകിസ്താന്റെ അൻവറോവ് വെങ്കലവും സ്വന്തമാക്കി.

ശ്രീശങ്കറിന്റെ തുടർച്ചയായ രണ്ടാം ഏഷ്യൻ ഗെയിംസ് മെഡൽ നേട്ടമാണ്. 2023ലെ ഹാങ്ചൗവ് ഏഷ്യൻ ഗെയിംസില്‍ വെള്ളി നേടിയ ശ്രീശങ്കര്‍ ജൂലൈയിൽ നടന്ന ഗ്ലാസ്‌കോ കോമൺവെൽത്ത്‌ ഗെയിംസില്‍ 8.09 മീറ്റർ ദൂരം താണ്ടിയും വെള്ളി നേടിയിരുന്നു.

നേരത്തെ, 400 മീറ്റർ ഹർഡിൽസിൽ ഇന്ത്യയുടെ വിത്യ രാംരാജ് വെങ്കലം സ്വന്തമാക്കിയിരുന്നു. 54.75 സെക്കൻഡില്‍ 400 മീറ്റർ ഫിനിഷ് ചെയ്ത വിത്യ പി.ടി. ഉഷയുടെ 42 വർഷത്തെ റെക്കോർഡും തകർത്തു. 1984ലെ ലോസാലഞ്ചലസ് ഒളിംപിക്സില്‍ 55.42 സെക്കന്‍ഡിലാണ് ഉഷ 200 മീറ്റര്‍ ഫിനിഷ് ചെയ്തത്. ഇതോടെ, 400 മീറ്റർ 55 സെക്കൻഡിൽ താഴെ ഫിനിഷ് ചെയ്യുന്ന ആദ്യ ഇന്ത്യൻ വനിത താരമെന്ന റെക്കോർഡും വിത്യ സ്വന്തമാക്കി.

ഐച്ചി നഗോയയില്‍ ഇന്ത്യയുടെ മെഡല്‍ നേട്ടം 42 ആയി ഉയര്‍ന്നു. നാല് സ്വര്‍ണം, 18 വെള്ളി,20 വെങ്കലം എന്നിങ്ങനെയാണ് ഇന്ത്യയുടെ നേട്ടം. മെഡല്‍പ്പട്ടികയില്‍ 12മതാണ് ഇന്ത്യ.