ஹரியாணா அணிக்காக 14 வயதுக்கு உட்பட்டோர், 16 வயதுக்கு உட்பட்டோர் மற்றும் 19 வயதுக்கு உட்பட்டோர் கிரிக்கெட்டில் அன்ஷுல் விளையாடியுள்ளார். 2020ஆம் ஆண்டில், 19 வயதுக்கு உட்பட்டோர் உலகக் கோப்பை அணிக்கும் அன்ஷுல் தேர்ந்தெடுக்கப்பட்டார். ஆனால் போட்டிக்கு சற்று முன்பு ஏற்பட்ட காயம் காரணமாக அவரால் அதில் பங்கேற்க முடியவில்லை. அந்த நேரத்தில் அன்ஷுல் மிகவும் ஏமாற்றமடைந்தார்.

“நான் அன்ஷுலுக்கு நிலைமையை புரிய வைக்க முயன்றேன். தினமும் ஒன்று அல்லது இரண்டு மணிநேரம் தொலைபேசியில் பேசுவோம். ‘இன்னும் எதுவும் முடிந்துவிடவில்லை, உன் முழு எதிர்காலமும் அங்கு இருக்கிறது’ எனக் கூறுவேன்” என பயிற்சியாளர் சதீஷ் ராணா கூறுகிறார்.

கொரோனா காலத்தில் ஊரடங்கு உத்தரவு அமலில் இருந்தபோது, அன்ஷுல் கிராம மைதானத்தில் தனது பயிற்சியைத் தொடர்ந்தார்.

அன்ஷுல் காம்போஜின் மாமா கௌரவ் காம்போஜ் இவ்வாறு கூறுகிறார், “ஊரடங்கு காலத்தில், நாங்கள் கிராமத்தில் உள்ள மைதானத்தில் விளையாடுவோம். அப்போது நாங்களும் கிராமத்தில் இருந்தோம். ஊரடங்கு காலம் முழுவதும், கிராமத்தில் நான்கு முதல் ஐந்து மணிநேரம் வரை பயிற்சி செய்வோம்.”

“எந்தவிதமான சூழ்நிலையாக இருந்தாலும் அனுசரித்து வாழக் கூடியவர் அன்ஷுல். கிராமத்தில் உள்ள அனைவரும் அவரை நினைத்து மிகவும் பெருமைப்படுகின்றனர். இது அவரது வெற்றி மட்டுமல்ல, முழு கிராமத்தின் வெற்றி” என கௌரவ் காம்போஜ் கூறுகிறார்.

கடந்த 2023ஆம் ஆண்டு விஜய் ஹசாரே டிராபியில் அன்ஷுல் தனது பந்துவீச்சில் முத்திரையைப் பதித்தார்/ ஹரியாணாவை வெற்றி பெறச் செய்வதில் முக்கியப் பங்கு வகித்த அன்ஷுல், அந்தத் தொடரில் 10 போட்டிகளில் விளையாடி 17 விக்கெட்டுகளை வீழ்த்தினார்.

விஜய் ஹசாரே கோப்பைத் தொடரில் மிளிர்ந்த அவரது திறமை ஐபிஎல் தொடரில் விளையாடும் வாய்ப்பை பெற்றுக் கொடுத்தது. 2024ஆம் ஆண்டில், மும்பை இந்தியன்ஸ் அணி அன்ஷுலை ரூ.20 லட்சத்திற்கு வாங்கியது. முதல் சீசனில், அன்ஷுல் மூன்று போட்டிகளில் இரண்டு விக்கெட்டுகளை மட்டுமே வீழ்த்தினார்.

ஆனால் அதே ஆண்டில், ரஞ்சி கிரிக்கெட்டில் வரலாறு படைத்த அன்ஷுல், கேரளாவுக்கு எதிரான ரஞ்சி போட்டியில், 30.1 ஓவர்களில் 49 ரன்களுக்கு 10 விக்கெட்டுகளை வீழ்த்தினார். ரஞ்சி டிராபியில் இந்தச் சாதனையை நிகழ்த்திய மூன்றாவது பந்து வீச்சாளர் என்ற பெருமையும் அவருக்கு வந்து சேர்ந்தது.

இதன் பிறகு, சென்னை சூப்பர் கிங்ஸ் அணி அன்ஷுலை ரூ.3.8 கோடிக்கு வாங்கியது. இந்த ஆண்டு ஐபிஎல் தொடரில், அன்ஷுல் 8 போட்டிகளில் விளையாடி 8 விக்கெட்டுகளை வீழ்த்தினார்.

“ஆரம்பத்தில் இருந்தே, அன்ஷுல் வேகப்பந்து வீச்சாளராக விரும்பினார். அவர் க்ளென் மெக்ராத் போல தனது லைன் அண்ட் லென்த்-ஐ கட்டுப்படுத்தி பந்து வீசினார். அதனால்தான் அவரது லைன் அண்ட் லென்த் மிகவும் நன்றாக இருக்கிறது” என்று சதீஷ் ராணா கூறுகிறார்.

“எப்போதுமே தனது விளையாட்டில் கவனம் செலுத்தி வந்த அன்ஷுல், தற்போதும் அதை அப்படியே தொடர்கிறார். தினசரி 8 முதல் 10 மணி நேரம் வரை பயிற்சி செய்யும் அன்ஷுல், காலையில் அகாடமிக்கு வந்துவிட்டால், மாலையில்தான் கிளம்புவார். இரவும் பகலும் கடுமையாக உழைத்த அன்ஷுல் சிறப்பான வீரராக உருவெடுத்துள்ளார்.”

“ரஞ்சி போட்டியில் 10 விக்கெட்டுகளை வீழ்த்திய பிறகு நிலைமை மாறியது. சென்னைக்காக சிறப்பாக விளையாடிய அன்ஷுல், தோனியுடன் விளையாடியதன் பலனையும் பெற்றுள்ளார். தோனி மிகவும் கூலாக இருக்கிறார் என்று அன்ஷுல் சிலாகித்துப் பேசுவார்” என சதீஷ் ராணா கூறுகிறார்.

தனது அறிமுகப் போட்டிக்கு ஒரு நாள் முன்பு அன்ஷுல், தனது பயிற்சியாளர் சதீஷ் ராணாவுடன் பேசினார். அப்போது, “எனக்கு அறிமுக வாய்ப்பு கிடைத்தால், எனது 100 சதவிகித திறமையையும் காட்ட முயல்வேன் என்று அன்ஷுல் கூறினார்” என சதீஷ் ராணா கூறுகிறார்.

இது, பிபிசிக்காக கலெக்டிவ் நியூஸ்ரூம் வெளியீடு