பிபிசியின் முதன்மை சர்வதேச செய்தியாளர் லீஸ் டுசெட், டொனால்ட் டிரம்ப் தாலிபன்கள் குறித்து விவாதத்தில் குறிப்பிட்டவை பற்றி விவரித்துள்ளார்.

ஆப்கானிஸ்தானில் கடந்த ஆகஸ்ட், 2021இல் காபூலை நோக்கி தாலிபன்கள் எதிர்பாராத விதமாக முன்னேறியபோது, தங்களின் மீதமுள்ள படையினர் மற்றும் தங்கள் நாட்தனது நாட்டுக் குடிமக்களை அமெரிக்கா வெளியேற்றியது. அதைத் தொடர்ந்து அமெரிக்காவின் நீண்டகால போர் முடிவுக்கு வந்தது.

அமெரிக்காவின் இந்தத் தோல்வி குறித்து விவாதத்தில் பேசப்பட்டபோது, ஆச்சர்யத்திற்கு இடமின்றி அந்த விவகாரம் புறக்கணிக்கப்பட்டது.

“படையினரைத் திரும்பப் பெற்ற விதத்திற்கு நீங்கள் பொறுப்பேற்கிறீர்களா?” என்ற கேள்வியை கமலா ஹாரிஸ் திசை திருப்பினார்.

படையினரைத் திரும்ப பெற்றது குறித்து உன்னிப்பாகப் பின்தொடர்ந்து வரும் செய்தியாளராக, துரதிருஷ்டவசமான கடைசி வாரங்களில் முடிவுகள் எடுக்கப்பட்டபோது ஹாரிஸ் அந்த அறையில் இருந்ததாக நான் கேள்விப்படவே இல்லை. ஆனால், படையினரைத் திரும்பப் பெறும் அதிபர் பைடனின் முடிவை ஏற்றுக்கொண்டதாக ஹாரிஸ் தெளிவுபடுத்தியுள்ளார்.

“தற்போதும் தாலிபனின் தலைவராக உள்ள அப்துலிடம்” தான் கடுமையாகப் பேசியதாக டிரம்ப் பெருமையாகத் தெரிவித்தார்.

அமெரிக்க படையினரைத் திரும்பப் பெறுவதற்கான ஒப்பந்தத்தில் கையெழுத்திட்ட அப்துல் கானி பரடார்-ஐ டிரம்ப் குறிப்பிடுவதாகத் தெரிகிறது.

ஆனால், அவர் தாலிபனுக்கு எப்போதும் தலைமை வகித்ததில்லை. மேலும், தாலிபன் கட்டுப்பாட்டுக்கு ஆப்கன் வந்ததில் இருந்து அவர் ஓரங்கட்டப்பட்டுள்ளார்.

டிரம்ப் இவ்வாறு குறிப்பிட்டதில் இருந்து இணையத்தில் அப்துல் எனப் பெயரிட்டவர்கள் இதுதொடர்பாக கேலியான மீம்களை பகிர்ந்தனர். பலரும் இணையத்தில் “அப்துல் யார்?” எனக் கேட்டிருந்தனர்.

தாலிபனிடம் குறைகளுடன் கூடிய ஒப்பந்தத்தைச் செய்துகொண்டது குறித்து இரு வேட்பாளர்களும் கவனம் செலுத்தினர். டிரம்ப் அரசுதான் அமெரிக்க படையினரை திரும்பப் பெறும் திட்டத்திற்குப் பேச்சுவார்த்தை நடத்தியது; அதை பைடன் அரசாங்கம் அவசரமாக நிறைவேற்றியது.

“நாம் வெளியேறுவதால்” இந்த ஒப்பந்தம் சிறப்பானது என டிரம்ப் தெரிவித்தார்.

வேறு எந்த வழியும் இல்லை. ஆனால், படையினர் வெளியேறிய விதம், பேரழிவாக மாறியது. இதற்கு அனைத்துத் தரப்பையும் குற்றம் சொல்ல வேண்டும்.