அண்ணாமலை, பாட்ஷா உள்பட சுமார் 400க்கும் மேலான படங்களின் இசையமைப்பாளர் தேவா காலமானார்.
தேனிசைத் தென்றல் என ரசிகர்களால் அழைக்கப்படும் இசையமைப்பாளர் தேவா, தமிழ் திரையுலகில் தனக்கென்று தனித்த இடம் பிடித்த இசையமைப்பாளர்களில் ஒருவர்.
கடந்த 1989ஆம் ஆண்டு வெளிவந்த ‘மனசுக்கேத்த மகாராசா’ என்கிற படத்தின் மூலம் அறிமுகமான தேவா பல்வேறு மொழிகளில் 400க்கும் மேற்பட்ட படங்களுக்கு இசையமைத்துள்ளார்.
கடந்த 90களில் இளையராஜா ஒருபுறம், ஏ.ஆர் ரஹ்மான் மறுபுறம் ஆதிக்கம் செலுத்தி வந்த காலகட்டத்தில் தேவாவின் பாடல்களுக்குத் தனித்த ரசிகர் பட்டாளம் இருந்தது. 2022ஆம் ஆண்டு ‘தேவா தேவாதான்’ இசை நிகழ்ச்சியில் பேசிய நடிகர் ரஜினிகாந்த் இதை சிலாகித்துப் பேசியிருப்பார்.
கானா பாடல்களை திரையுலகில் மைய நீரோட்டப்படுத்தியதில் தேவா முக்கியமானவராக அறியப்படுகிறார். தன்னை கானா பாடல்களோடு முத்திரை குத்துவது பற்றி தேவா பல இடங்களில் பேசியிருந்தாலும் அது தனக்கு மகிழ்ச்சி தருவதாகவும் குறிப்பிட்டுள்ளார்.
பட மூலாதாரம், City Production/instagram
தான் தனித்துத் தெரிவது குறித்து ஒரு முறை பேசியபோது, “கானாக்கள் என் சிறப்பம்சமாக ஆகிவிட்டன. எத்தனையோ இசையமைப்பாளர்கள் ‘மெலடி’ பாடல்களைத் தருகிறார்கள். அவர்களில் ஒருவராகிப் போயிருப்பேன். ஆனால், கானா பாடல்களைத் தந்த காரணத்தால்தான் வித்தியாசமாக நிற்கிறேன்” என்றார் இசையமைப்பாளர் தேவா.
அதோடு, “உலகமெங்கும் வசிக்கும் தமிழ் மக்கள் தங்கள் மகிழ்ச்சிக்கும் துக்கத்திற்கும் அந்த கானா பாடல்களைப் பயன்படுத்துவதைக் கேள்விப்படும்போது மிகுந்த மகிழ்ச்சியாக இருக்கிறது” என்றும் பிபிசி தமிழுக்கு அளித்த ஒரு நேர்காணலில் அவர் தெரிவித்திருந்தார்.
குறிப்பாக தனக்கு “கானா ஒரு கண் என்றால் மெலடி மற்றொரு கண்” என சமீபத்தில் நிகழ்ச்சி ஒன்றில் பேசுகையில் தேவா குறிப்பிட்டிருந்தார்.
கானா பாடல்கள், மெலடி பாடல்கள், பின்னணி இசை, ஹீரோ அறிமுகப் பாடல்கள் எனப் பல ஜானர்களில் அவர் தடம் பதித்துள்ளார். அவர் தனது திரைப்படங்கள் மட்டுமல்லாது பிற இசையமைப்பாளர்களின் இசையிலும் பாடல்களைப் பாடியுள்ளார்.
தேவா இசையமைத்த பல பாடல்கள் அவருடையதுதான் எனத் தெரியாமலே கேட்கப்படுவதுண்டு. கடந்த 2024ஆம் ஆண்டு வெளியான லப்பர் பந்து படத்திலும் ஒரு காட்சி இடம்பெற்றிருக்கும். பேருந்தில் பாடல் ஒலித்துக் கொண்டிருக்கும்போது முதியவர் ஒருவர் ‘ராஜா ராஜாதான்’ எனக் குறிப்பிடுகையில் இளைஞர் ஒருவர் இது தேவா பாடல் எனப் பதிலளிப்பார்.
பட மூலாதாரம், DEVA/X
மேடை கச்சேரிகளில் தேவாவின் ஆதிக்கம்
சமீபத்தில் நிகழ்ச்சி ஒன்றில் இதைக் குறிப்பிட்டுப் பேசிய தேவா, “நான் ஒரு கச்சேரிக்காகச் சென்றபோது அதில் பாடவிருந்த பாடல்களின் பட்டியலை நிகழ்ச்சி ஒருங்கிணைப்பாளரிடம் வழங்கினேன். அதற்கு அவர் ‘உங்கள் பாடல்களைப் பாடுங்கள் எனக் கூறினார்’. தொடர்ந்து புல்வெளி புல்வெளி’ நீங்கள் இசையமைத்தா என என்னிடமே கேட்டார்” எனக் குறிப்பிட்டிருந்தார்.
முன்பு ஒருமுறை தேவா குறித்து பிபிசி தமிழிடம் பேசிய மேடை பாடகரான தியாகராஜன், “மேடை இசைக் கலைஞர்களுக்கு தேவா கடவுள் போன்றவர்,” என்றார். கடந்த 40 ஆண்டுகளாக மேடைக் கச்சேரிகள் நடத்திய அனுபவம் கொண்ட தியாகராஜன், திருநெல்வேலி மாவட்ட மேடை இசைக் கலைஞர்கள் சங்கத்தின் துணைத் தலைவராகவும் உள்ளார். தேவாவுடன் நிகழ்ச்சிகளிலும் கலந்து கொண்டுள்ளார்.
திரைப் பாடல்களைக் கடந்து தேவாவின் பக்திப் பாடல்களும் கச்சேரிகளில் பிரபலமானவை என அவர் குறிப்பிடுகிறார். “மூன்று மணிநேர கச்சேரி நடந்தால் அதில் சுமார் 1.5 மணி நேரம் தேவா பாடல்கள்தான் ரசிகர்கள் கேட்பார்கள்” என அவர் குறிப்பிட்டார்.
“நாட்டுப்புறப் பாடல்களை 90களின் தொடக்கத்தில் மீண்டும் பிரபலமாக்கியதில் தேவாவுக்கு முக்கியப் பங்கு உண்டு. தேவா பாடகர்களை மட்டுமல்ல பல இசைக் கலைஞர்களையும் அறிமுகம் செய்துள்ளார்” என்று தெரிவித்தார் தியாகராஜன்.
“நடிகர்கள் ரஜினி, கமலுக்கு மட்டுமல்லாது விஜய் மற்றும் அஜித்தின் தொடக்க காலத்தில் பல படங்களில் தேவா பணியாற்றி பல்வேறு ஹிட் பாடல்களைக் கொடுத்துள்ளார். 90களின் பிரபலமான நடிகர்களை எடுத்துக் கொண்டால் தேவாவுடன் ஒரு ஹிட் பாடலேனும் கொடுத்திருப்பார்கள்” என்றார் தியாகராஜன்.
