இந்தியா தங்கம் மற்றும் வெள்ளி மீதான இறக்குமதி வரியை 6 சதவீதத்திலிருந்து 15 சதவீதமாக உயர்த்தியுள்ளது. இது தொடர்பாக மத்திய அரசு புதன்கிழமை அறிவிப்பை வெளியிட்டது.
வெளிநாடுகளில் இருந்து விலையுயர்ந்த உலோகங்களை வாங்குவதைக் குறைக்கவும், நாட்டின் அந்நியச் செலாவணி கையிருப்பு மீதான அழுத்தத்தைக் குறைக்கவும் மேற்கொள்ளப்படும் நடவடிக்கைகளின் ஒரு பகுதியாக இந்த நடவடிக்கை எடுக்கப்பட்டுள்ளது.
குறைந்தது ஒரு வருடத்திற்காவது தங்க நகைகளை வாங்க வேண்டாம் என்று பிரதமர் நரேந்திர மோதி சமீபத்தில் நாட்டு மக்களுக்கு வேண்டுகோள் விடுத்திருந்தார்.
“தங்கம் வாங்குவது என்பது அதிக அந்நியச் செலாவணியை நுகரும் மற்றொரு அம்சமாகும். நாட்டின் நலன் கருதி, ஒரு வருடம் முழுவதும் வீட்டில் ஏதேனும் விழாக்கள் நடந்தால், நாம் தங்க நகைகளை வாங்க மாட்டோம் என்று முடிவு செய்ய வேண்டும்” என்று அவர் கூறியிருந்தார்.
மேலும், “நாம் அந்நியச் செலாவணியைச் சேமிக்க வேண்டும்” என்று அவர் கூறியிருந்தார்.
தங்கம் மற்றும் வெள்ளி இறக்குமதி மீது 10% அடிப்படைச் சுங்க வரி மற்றும் 5% விவசாய உள்கட்டமைப்பு மற்றும் மேம்பாட்டு வரியை அரசு விதித்துள்ளது. இதன் மூலம் நடைமுறை இறக்குமதி வரி 6 சதவீதத்திலிருந்து 15 சதவீதமாக உயர்ந்துள்ளது.
அதாவது இந்தியாவுக்குள் வரும் தங்கம் மற்றும் வெள்ளி வர்த்தகர்கள், நகைக்கடைக்காரர்கள் மற்றும் இறுதியில் நுகர்வோரை அதிக விலையில் சென்றடையும் என்பதுதான் இதன் பொருள்.
இந்த முடிவு சர்வதேச தங்க விலையில் எந்தப் பாதிப்பையும் ஏற்படுத்தாது என்றாலும், இது உள்நாட்டு தங்கம் மற்றும் வெள்ளி விலையில் தாக்கத்தை ஏற்படுத்தக்கூடும்.
தங்கம் மீதான இறக்குமதி வரியை 6 சதவீதத்திலிருந்து 15 சதவீதமாக உயர்த்துவது சாமானிய நுகர்வோர் மீது நேரடிப் பாதிப்பை ஏற்படுத்தும் என்று கூறப்படுகிறது.
பட மூலாதாரம், Getty Images
அரசு இப்போது இறக்குமதி வரியை உயர்த்தியது ஏன் ?
தங்கம் மற்றும் வெள்ளி மீதான இறக்குமதி வரியை உயர்த்துவதற்கான நேரம் என்பது வெறும் விலையுடன் மட்டும் தொடர்புடையது அல்ல, மாறாக இந்தியாவின் பொருளாதாரத்தின் மீதான அழுத்தத்தைக் குறைப்பதையும் நோக்கமாகக் கொண்டுள்ளது.
ராய்ட்டர்ஸ் செய்தியின்படி, 2025-26 ஆம் ஆண்டில் இந்தியாவின் தங்க இறக்குமதி 71 பில்லியன் டாலர்களைத் தாண்டும் என்று கணிக்கப்பட்டுள்ளது. கச்சா எண்ணெய்க்குப் பிறகு நாட்டின் இறக்குமதி செலவில் இது இரண்டாவது பெரிய அங்கமாக மாறும்.
தங்கத்தை இறக்குமதி செய்ய இந்தியா அந்நியச் செலாவணியைச் (டாலர்கள்) செலவிட வேண்டியுள்ளது. இது நாட்டின் அந்நியச் செலாவணி கையிருப்பில் நேரடித் தாக்கத்தை ஏற்படுத்துகிறது. மேலும், டாலருக்கான தேவை தொடர்ந்து அதிகரித்து வருவதால், இந்திய ரூபாயின் மீது அழுத்தத்தை ஏற்படுத்துகிறது. தற்போது டாலருக்கு நிகரான ரூபாயின் மதிப்பு குறைந்த நிலையில் உள்ளது.
ரஷ்யா-யுக்ரேன் போர் மற்றும் இரான் போர் காரணமாக, முதலீட்டாளர்கள் தங்கத்தில் பெருமளவில் முதலீடு செய்துள்ளனர்.
இதனால் கடந்த சில மாதங்களில் சர்வதேச தங்கத்தின் விலை கணிசமாக உயர்ந்துள்ளதுடன், நாட்டின் இறக்குமதிச் செலவும் அதிகரித்துள்ளது.
இதனால் தேவையின் மீது என்ன தாக்கம் ஏற்படும்?
இந்தியாவில் குடும்பச் சேமிப்பு மற்றும் செலவினங்களில் தங்கம் ஒரு முக்கிய அங்கமாக இருப்பதால், இந்தியா உலகின் மிகப்பெரிய சந்தைகளில் ஒன்றாகத் திகழ்கிறது.
அரசாங்கத் தரவுகளின்படி, 2024-25 நிதியாண்டில் இந்தியாவின் தங்க இறக்குமதி 51.4 பில்லியன் டாலராக மதிப்பிடப்பட்டுள்ளது, இது 2023 இல் 45.54 பில்லியன் டாலராக இருந்தது. இது 2024-25 இல் 13.7 சதவீத உயர்வைக் காட்டுகிறது.
“எதிர்பார்த்தபடியே அரசாங்கம் வரியை உயர்த்தியுள்ளது. இருப்பினும், தங்கம் மற்றும் வெள்ளி விலைகள் ஏற்கனவே அதிகமாக இருப்பதால், இது சந்தை தேவையில் பாதிப்பை ஏற்படுத்தக்கூடும்” என்று இந்திய தங்கம் மற்றும் நகை வியாபாரிகள் சங்கத்தின் தேசிய செயலாளர் சுரேந்திர மேத்தா எகனாமிக் டைம்ஸ் இதழிடம் தெரிவித்தார்.
கடந்த ஓராண்டில் பங்குச் சந்தையில் நிலவும் எதிர்மறை வருவாய் மற்றும் சமீபத்திய தங்க விலை உயர்வு ஆகியவற்றால், இந்தியாவில் முதலீட்டு நோக்கத்திற்காக தங்கம் வாங்குவது அதிகரித்துள்ளது.
பட மூலாதாரம், Getty Images
கடந்த ஆண்டு இதே காலப்பகுதியுடன் ஒப்பிடுகையில், மார்ச் காலாண்டில் இந்தியாவின் தங்க இடிஎஃப் முதலீடுகள் 186% அதிகரித்துள்ளதாக உலக தங்க கவுன்சில் கடந்த மாதம் தெரிவித்தது.
பிரதமர் நரேந்திர மோதியின் வேண்டுகோளைத் தொடர்ந்து, நகை வணிகத்தில் ஈடுபட்டுள்ள நிறுவனங்களின் பங்குகள் கடும் அழுத்தத்திற்கு உள்ளாகியுள்ளன.
கடந்த இரண்டு நாட்களில் டைட்டன் , கல்யாண் ஜூவல்லர்ஸ் , ராஜேஷ் எக்ஸ்போர்ட்ஸ் போன்ற நிறுவனங்களின் பங்குகள் 10 முதல் 15 சதவீதம் வரை சரிந்துள்ளன.
தங்கம் வாங்குவது ரூபாயை எவ்வாறு பாதிக்கிறது?
குடும்பங்கள் அதிக அளவில் தங்கம் அல்லது நகைகளை வாங்கும்போது, அந்தத் தங்கத்தை இறக்குமதி செய்ய நாடு அதிக டாலர்களைச் செலவிட வேண்டியிருக்கும். இது இறக்குமதி மற்றும் ஏற்றுமதிக்கு இடையிலான பற்றாக்குறையை அதிகரிக்கிறது.
விரிவடையும் நடப்புக் கணக்குப் பற்றாக்குறை பெரும்பாலும் ரூபாயின் மதிப்பை பலவீனப்படுத்துகிறது, ஏனெனில் நாடு ஈட்டுவதை விட அதிகமான அந்நியச் செலாவணியைச் செலவிடுகிறது. இதனால்தான் இத்தகைய சூழ்நிலைகளில் அரசாங்கங்கள் பெரும்பாலும் தங்க இறக்குமதி விஷயத்தில் எச்சரிக்கையாக இருக்கின்றன.
பொருளாதார நெருக்கடி காலங்களில் அதிகப்படியான தங்க இறக்குமதியைத் தவிர்க்க இந்தியா இதற்கு முன்பும் நடவடிக்கைகளை எடுத்துள்ளது.
கடந்த காலங்களில், அரசாங்கங்கள் தங்கம் மீதான இறக்குமதி வரிகளை அதிகரித்துள்ளன. மேலும் தங்கப் பத்திரங்கள் மற்றும் இடிஎஃப் போன்ற முதலீட்டு வாய்ப்புகளை ஊக்குவித்துள்ளன.
இந்த நடவடிக்கைகள் அனைத்தும் அந்நியச் செலாவணி கையிருப்பு மீதான அழுத்தத்தைக் குறைப்பதையும் ரூபாயின் மதிப்பை நிலைப்படுத்துவதையும் நோக்கமாகக் கொண்டவை.
