இரானுக்கும் இஸ்ரேலுக்கும் இடையிலான சமீபத்திய மோதலின் போது, ஃபோர்டோ, நடான்ஸ் மற்றும் இஸ்பஹான் போன்ற மூன்று இரானிய அணுசக்தி தளங்களை அமெரிக்க ராணுவம் தாக்கியதாக, ஜூன் 22 அன்று, அமெரிக்க அதிபர் டொனால்ட் டிரம்ப் கூறினார்.

இந்தத் தாக்குதல்கள் “வெற்றிகரமாக” இருந்தன என்றும், இந்த தளங்கள் “அழிக்கப்பட்டன” என்றும் டிரம்ப் குறிப்பிட்டார்.

அதனைத் தொடர்ந்து, ஜூன் 22 அன்று, இந்தத் தாக்குதல்களைத் திட்டமிடுவதில் தனக்கும் அமெரிக்காவிற்கும் இடையே “முழுமையான ஒருங்கிணைப்பு” இருப்பதாக இஸ்ரேல் கூறியது.

இந்த தளங்களுக்கு மிகக் குறைந்த சேதம் மட்டுமே ஏற்பட்டதாக இரானிய அதிகாரிகள் ஆரம்பத்தில் கூறியிருந்தனர்.

மேலும், இந்த தாக்குதலில் பி2 குண்டுவீச்சு விமானங்கள் மற்றும் மாசிவ் ஆர்ட்னன்ஸ் பெனட்ரேட்டர்கள் (MOP- பதுங்கு குழியை தகர்க்கும் திறன் கொண்டவை என்றும் அழைக்கப்படுகிறது) எவ்வாறு பயன்படுத்தப்பட்டன என்பதை ஜூன் 22 அன்று நடந்த ஒரு செய்தியாளர் சந்திப்பில், அமெரிக்க பாதுகாப்பு செயலாளர் பீட் ஹெக்செத் விளக்கினார்.

“அமெரிக்காவின் பி2 ரகசிய குண்டுவீச்சு விமானங்கள் இரானுக்குள் நுழைந்து, அணுசக்தி தளங்களைத் தாக்கிவிட்டு திரும்பி வந்தன. உலகிற்கு இதனைப் பற்றி எந்தச் செய்தியும் கிடைக்கவில்லை” என்று பீட் ஹெக்செத் கூறினார்.

“இந்த தாக்குதலில், 2001 ஆம் ஆண்டுக்குப் பிறகு பி2 ஸ்பிரிட் குண்டுவீச்சு விமானங்கள் மிக நீண்ட தூரம் சென்று தாக்குதலில் ஈடுபட்டன. மேலும், எம்ஓபி எனப்படும் பதுங்கு குழியை தகர்க்கும் திறன் கொண்ட ஏவுகணைகளும் முதன்முறையாக பயன்படுத்தப்பட்டன” என்றும் அவர் தெரிவித்தார்.

இதற்கிடையில், ஏழு பி2 ஸ்டெல்த் குண்டுவீச்சு விமானங்கள் உட்பட 125 அமெரிக்க விமானங்கள் ‘ஆபரேஷன் மிட்நைட் ஹேமர்’ தாக்குதலில் ஈடுபட்டதாக கூட்டுப் படைத் தலைவர்களின் தலைவர் ஜெனரல் டான் கேன் கூறினார்.

இந்த நடவடிக்கையில் சுமார் 75 “துல்லியமான ஆயுதங்கள்” பயன்படுத்தப்பட்டதாக கேன் குறிப்பிட்டார். அதில் 14 எம்ஓபிக்களும் அடங்கும்.

அமெரிக்கத் தாக்குதல்களுக்கு இரண்டு நாட்களுக்குப் பிறகு, ஜூன் 24 அன்று, அமெரிக்க அதிபர் டொனால்ட் டிரம்ப் அனைத்து தரப்பினரும் சண்டை நிறுத்தத்திற்கு ஒப்புக்கொண்டதாகக் கூறினார்.

இருப்பினும், அந்த நேரத்தில் போர்நிறுத்தம் குறித்து எந்த உடன்பாடும் எட்டப்படவில்லை என்று இரான் கூறியிருந்தது.