இதுபற்றி பிபிசி தமிழிடம் விளக்கிய ஈரோடு நகர துணை காவல் கண்காணிப்பாளர் முத்துக்குமரன், ”ஆதித்யாவை ஆயுதத்தால் யாரும் தாக்கவில்லை. கையால் அடித்ததில் கன்னத்தில் மட்டுமே ஒரே ஒரு காயம் இருந்தது. மாணவர்கள் தாக்கியதில் கீழே விழுந்ததில் தலையில் அடிபட்டதா என்று தெரியவில்லை. ஆனால் கீழே விழுந்ததும் மயங்கிவிட்டார். பல்ஸ் மிகவும் குறைந்துள்ளது. அவருக்கு உடலில் வேறு ஏதேனும் பாதிப்பு இருந்ததா என்பதும் தெரியவில்லை. பிரேத பரிசோதனை அறிக்கை வந்தால்தான் தெரியும். மாணவர்கள் பலர் இருந்தாலும் இருவர் மட்டுமே தாக்கியதால் அவர்களை கைது செய்தோம்.” என்றார்.

இந்த மாணவர்களுக்கு இடையில் சாதி ரீதியாகவோ, வேறு விதமாகவோ எந்த மோதலும் இல்லை என்று கூறிய துணை காவல் கண்காணிப்பாளர் முத்துக்குமரன், முதற்கட்ட விசாரணையில் இவர்களுக்கு இடையில் கடந்த சில நாட்களாகவே தொடர்ந்து மோதல் இருந்தது தெரியவந்துள்ளது, மாணவிகளிடம் பேசியதில் ஏற்பட்ட பிரச்னை மட்டும்தான் காரணமா என்பது விசாரணையில்தான் தெரியவரும் என்றார்.

பிபிசி தமிழிடம் பேசிய ஆதித்யாவின் தந்தை சிவா, ”வழக்கமாக எனது பைக்கில் கொண்டு போய் பள்ளியில் விடுவேன். அன்று அவனே புறப்பட்டுச் சென்றான். மாலையில் அவன் மயங்கிக் கிடப்பதாகத் தகவல் தெரிந்து நாங்கள் மருத்துவமனைக்கு போவதற்குள் அவன் இறந்துவிட்டான் என்று கூறிவிட்டனர். சீருடையுடன் வீட்டிலிருந்து புறப்பட்ட அவன் சீருடை இல்லாமல் மாற்று உடையில் இருந்தான். அவன் இறந்தபின்பே, அன்று பள்ளிக்கு வரவில்லை என்று தெரிவித்தனர். காலையிலேயே தெரிந்திருந்தால் நாங்கள் தேடியிருந்திருப்போம்.” என்றார்.

முன்பு கருங்கல்பாளையத்தில் குடியிருந்த தங்களின் குடும்பம், குமலன்குட்டை பள்ளியில் தரமான கல்வி கிடைப்பதாக அறிந்து, அதற்காகவே 4 ஆண்டுகளுக்கு முன்பு அப்பகுதிக்கு குடிபெயர்ந்து வந்ததாகத் தெரிவித்தார். கடந்த 9 ஆம் வகுப்பிலிருந்து 3 ஆண்டுகளாக அங்கு ஆதித்யா படித்துள்ளார். இவருக்காகவே தங்களுடைய மகளையும் அந்தப் பள்ளியில் கொண்டு வந்து சேர்த்ததாகவும் சிவா தெரிவித்தார்.

”எனது மகன் படிக்கும் பள்ளியில் வேறு சில குரூப்களில் படிக்கும் மாணவர்கள், அவர்கள் வகுப்பு மாணவிகளிடம் பேசக்கூடாது என்று மிரட்டியதாகக் கூறினான். நான் வகுப்பாசிரியரிடம் சொல்லச் சொல்லி சமாதானப்படுத்தினேன். அதன்பின் என்ன நடந்தது என்றே தெரியவில்லை. இப்போது எனது மகன் இறந்தபின் போதையில் இருந்தான் என்று பொய் சொல்கின்றனர். எனது மகனுக்கு அதுபோன்று எந்தப் பழக்கமும் கிடையாது. அவனை மோசமாகத் தாக்கியதில்தான் அவன் உயிரிழந்திருக்கிறான்.” என்றார் சிவா.