இந்த விபத்தின் தொழில்நுட்ப அம்சங்களைப் பற்றி பேசுகையில் பாதுகாப்பு நிபுணர் டேவிச் சுசி, எரிபொருள் சுவிட்சுகள் விமானியின் தலையீட்டின் பேரிலேயே ஆன் அல்லது ஆஃப் செய்யும் வழியில் வடிவமைக்கப்பட்டுள்ளதாகக் கூறுகிறார் எனத் தெரிவித்துள்ளது. ‘அனைத்து எரிபொருள் சுவிட்சுகளும் தற்செயலாக நிறுத்தப்படும் சூழல் மிக அரிது’ என அவர் தெரிவித்துள்ளார்.

“இந்த சுவிட்சுகள் கடந்த வருடங்களில் மேம்பட்டுள்ளதாகவும் அவற்றை தற்செயலாக ஆன் அல்லது ஆஃப் செய்துவிட முடியாது” என்றும் சுசி தெரிவித்துள்ளார்.

டிஜிசிஏவின் படி, கேப்டன் சுமித் சபர்வாலுக்கு 8200 மணி நேரம் விமானம் ஓட்டிய அனுபவம் உள்ள நிலையில் துணை விமானி கிளைவ் குந்தருக்கு 1100 மணி நேரம் விமானம் ஓட்டிய அனுபவம் உள்ளது.

பிரிட்டன் நாளிதழான டெலகிராப் முதல்கட்ட விசாரணை பற்றிய செய்திக்கு , “இந்த கோரமான விபத்துக்கு சற்று முன்பு ஏர் இந்திய விமானி எரிபொருள் விநியோகம் ஏன் நிறுத்தப்பட்டது எனக் கேட்டிருந்தார்” என தலைப்பு வைத்துள்ளது.

“கருப்பு பெட்டி தரவுகள் பதிவிறக்கம் செய்து, ஆய்வு செய்து பகிர்வதில் உள்ள மெதுவான நடைமுறையால் அமெரிக்க அதிகாரிகள் எரிச்சலடைந்துள்ளதாக அரசு வட்டாரங்கள் தெரிவிக்கின்றன” என டெலகிராப் தனது செய்தியில் எழுதியுள்ளது.

இந்தச் செய்தியில் விமான பாதுகாப்பு ஆய்வாளர் டேவிட் லீயின் கருத்தும் இடம்பெற்றுள்ளது.

“இந்த விசாரணை, விமானி யாரெனும் இதை வேண்டுமென்றே செய்துள்ளனரா அல்லது சுவிட்சு தவறுதலாக பயன்படுத்தப்பட்டதா என்பதை ஆராயும். மேலும் சுவிட்சில் ஏதேனும் எலக்ட்ரிக்கல் அல்லது எலெக்ட்ரானிக் கோளாறு இருந்ததா என்பதும் ஆராயப்படும்” என டேவில் லீ தெரிவித்துள்ளார்.

கடந்த காலங்களிலும் இதுபோன்ற சில சுவிட்சுகள் லாக்கிங் பிரச்னைகளை சந்தித்ததாகக் கூறும் அவர் இதுவும் விசாரணையின் ஒரு அங்கமாக இருக்கும் எனத் தெரிவிக்கிறார்.

ராய்டர்ஸ் செய்தி முகமை அமெரிக்க விமான பாதுகாப்பு நிபுணரான ஜான் காக்ஸிடம் பேசியுள்ளது. அவரின் கூற்றுப்படி, எரிபொருள் கட் ஆப் சுவிட்சுகளுக்கும் அவற்றுடன் இணைக்கப்பட்டுள்ள எரிபொருள் வால்வுகளுக்கும் தனித்தனி மின்சார அமைப்புகள் மற்றும் வயரிங் உள்ளன.

ராய்டர்ஸிடம் பேசிய மற்றுமொரு அமெரிக்க விமான பாதுகாப்பு நிபுணரான ஜான் நேன்ஸ், “எந்த விமானியும் பயணத்தின்போது எரிபொருள் சுவிட்சை ஆப் செய்ய மாட்டார்” எனத் தெரிவித்தார்.

கத்தார் ஊடகமான அல் ஜசீரா முதல்கட்ட விசாரணை பற்றி வெளியிட்ட செய்தியில் “விபத்துக்குள்ளான ஏர் இந்தியா விமானத்தின் என்ஜின்களின் எரிபொருள் கட்டுப்பாடு சுவிட்சுகள் விபத்துக்குச் சற்று முன்பு ‘ரன்’ என்கிற நிலையிலிருந்து ‘கட் ஆஃப்’ என்கிற நிலைக்குச் சென்றது” எனத் தெரிவித்துள்ளது.

இந்த விசாரணையில் ‘ஒரு பிழையையும்’ அல் ஜசீரா சுட்டிக்காட்டியுள்ளது.

“முதல்கட்ட அறிக்கை அந்த விமானத்தில் சுவிட்சு எப்படி ‘கட் ஆஃப்’ நிலைக்குச் சென்றது என்பதை விளக்கவில்லை” என அல் ஜசீரா செய்தியில் தெரிவிக்கப்பட்டுள்ளது.

நடைமுறை தவறுகள், காக்பிட் உரையாடல்கள் மற்றும் பரந்த பாதுகாப்பு கேள்விகள் உள்ளிட்ட விசாரணையின் முடிவுகள் பற்றிய ஆழமான அலசல் ஒன்றை நியூயார்க் டைம்ஸ் வெளியிட்டுள்ளது.

அதற்கு ‘ஏர் இந்தியா விமானம் மோதுவதற்கு முன்பாக எரிபொருள் துண்டிக்கப்பட்டுள்ளது’ என தலைப்பு வைக்கப்பட்டுள்ளது.

எனினும் முழுமையான தகவல்கள் இன்னும் வெளிவர வேண்டியுள்ளது எனவும் அதில் தெரிவிக்கப்பட்டுள்ளது.