தமிழ், கன்னடம், தெலுங்கு மற்றும் இந்தி ஆகிய 4 மொழிகளில் 200க்கும் மேற்பட்ட படங்களில் நடித்த பழம்பெரும் நடிகை சரோஜா தேவி, அவருடைய 87 வது வயதில் இன்று பெங்களூருவில் காலமானார்.

கர்நாடகா மாநிலத்தைச் சேர்ந்த சரோஜா தேவி, 1955 ஆம் ஆண்டில் தனது 17 வயதில் மகாகவி காளிதாஸ் என்ற கன்னட மொழிப்படத்தில் அறிமுகமானார். அதன்பின் 1957 ஆம் ஆண்டில் பாண்டுரங்க மகாத்யம் என்ற தெலுங்கு படத்தில் நடித்தார். அதற்குப் பின்பே தமிழ்த்திரையுலகில் பாதம் பதித்தார்.

அவரை தமிழ்த்திரையுலகில் அறிமுகம் செய்தது யார் என்பதில் பெரும் போட்டியே இருக்கிறது என்கிறார் தீனதயாளன். ஆனால் சிவாஜி நடித்த ‘தங்கமலை ரகசியம்’ படத்தில் நாயகியான ஜமுனாவிடம் தங்கமலை ரகசியத்தைச் சொல்லும் அந்தக் காட்சிதான் சரோஜா தேவியின் அறிமுகக் காட்சி என்கிறார் அவர். ஆனால் சரோஜா தேவியை தமிழகமே ‘யாரிந்த தேவதை’ என்று கேட்க வைத்தது நாடோடி மன்னன் படம்தான்.

எம்ஜிஆர் தயாரித்து இயக்கி நடித்த அந்தப் படத்தில் சரோஜா தேவியின் அழகும், கொஞ்சும் குரலும் தமிழ் ரசிகர்களை கவர்ந்து இழுத்தது. அந்தப் படம்தான் அக்காலத்தில் ஒரு கோடி வசூலைத் தொட்டது. அதிலிருந்து வசூல்ராணியாகவே அவர் வலம் வந்ததாக தமிழ்த்திரை விமர்சகர்கள் பலரும் அவரைப் பற்றி ஒருமித்த ஒரு குறிப்பைச் சொல்கின்றனர்.

சரோஜா தேவி நடித்த முதல் படம் ‘தங்கமலை ரகசியம்’ 1957 ஜூன் 29 அன்றுதான் வெளியானது. ஆனால் அடுத்த 3 ஆண்டுகளில் அதாவது 1960 கோடையில் சரோஜா தேவி உச்ச நட்சத்திரமாக ஜொலித்தார் என்று அவருடைய குறுகிய கால அசுர வளர்ச்சியைக் குறிப்பிடுகிறார் எழுத்தாளர் பா.தீனதயாளன். கடும் உழைப்பும், தொழிலில் பக்தியும் இருந்தாலும் பண விஷயத்தில் சரோஜா தேவியின் தாயார் கறார் என்கிறார் அவர்.

கண்டிப்பு நிறைந்த கன்னடக் குடும்பத்தில் கர்நாடக காவல்துறையில் பணியாற்றி பைரப்பாவின் மகளான சரோஜா தேவியின் தாயார் ருத்ரம்மா, சம்பள விஷயத்தில் ‘கறார் கண்ணம்மா’ என்கிறார் தீனதயாளன்.

தனது மகளுக்கு கேட்ட சம்பளம் கிடைக்கவில்லை என்றால் மறுநொடியே அடுத்த கம்பெனிக்கு டேராவைத் துாக்கி விடுவார் என்று அவர் குறிப்பிடுகிறார்.

அதனால்தான் அவர் திரைத்துறையை விட்டு விலகி, பல ஆண்டுகளான நிலையிலும், பெரும் கோடீஸ்வரியாக ஒரு ராஜ வாழ்க்கையை வாழ்ந்ததாகச் சொல்கிறார் நடிகர் சிவகுமார்.

சரோஜா தேவி மறைவுக்கு இரங்கல் தெரிவித்துப் பேசிய நடிகர் சிவகுமார், ”வழக்கமாக திரைத்துறையை விட்டு விலகிய பல நடிகைகள் வயதான காலத்தில் மிகவும் கஷ்டப்படுவார்கள். ஆனால் 87 வயதிலும் செல்வமும் செல்வாக்கும் மிக்க நல்லதொரு வாழ்க்கையை அவர் வாழ்ந்து மறைந்திருக்கிறார்.” என்கிறார் சிவகுமார்.

சிறு வயதிலிருந்தே தான் சரோஜா தேவியின் ரசிகன் என்று குறிப்பிடும் மூத்த நடிகர் விஜயகுமார், ”அவருடைய கொஞ்சும் தமிழ் கேட்பதற்குத் திகட்டாதது. திரையில் மட்டுமின்றி நேரில் பேசும்போதும் அதே கொஞ்சு தமிழில் அன்போடு விசாரிப்பார். எம்ஜிஆர் மறைந்து 30 ஆண்டுகளாகிவிட்டாலும் இன்றும் அவருடைய படங்கள் பேசப்படுவது போல, சரோஜா தேவியின் படங்களும் நிலைத்து நிற்கும்.” என்கிறார்.

முதல் முதலாக கன்னடப்படத்தில் நடிக்கும் வாய்ப்புக் கிடைக்கும் முன், தனக்கு குடும்பத்திலும், பொது வெளியிலும் நிகழ்ந்த அனுபவங்களை ஓர் இதழில் எழுதியிருந்தார் சரோஜா தேவி.

குடும்பத்தில் 3 மகள்களுக்குப் பின் அடுத்ததாவது மகனாகப் பிறக்க வேண்டுமென்று பல கோவில்களுக்கும் சரோஜா தேவியின் பாட்டனார் யாத்திரை போய் வந்தபின்னும் 4 வது மகளாகப் பிறந்தவர் சரோஜா தேவி. சிறு வயதிலேயே முடக்குவாதம். அது சரியாக விரதமிருந்து கோவில் சென்றிருக்கிறார் சரோஜா தேவியின் தாயார் ருத்ரம்மா.

அதற்கு பாட்டனார், ‘இது இருந்தால் என்ன செத்தால் என்ன…இது ஒன்றும் பையன் இல்லையே.. இதற்கு எதற்கு நீ பட்டினி கிடக்கிறாய்’ என்று திட்டுவாராம். அவர்தான் இப்போது என்னை ‘என் செல்லக்கண்ணு’ என்று கொஞ்சுகிறார் என்று தன் வாழ்க்கை அனுபவத்தை பதிந்துள்ளார் சரோஜா தேவி.